PM in Manipur a Water Supply project siamna tur lungphum a phum.


  • He project hmang hian mi maktaduai tam takin an inchhungah tui thianghlim intur an dawng thei dawn a ni
  • Dinhmun tha zawk nei turin khawsak awlsamna hi thil tul a ni a, tun hun hi khawsak harsa zawkte hlamchhiah lova hmalak hun a ni: PM


July 23, 2020: Vawiin khan Prime Minister chuan video conferencing hmangin Manipur a water supply project lungphum a phum a.

He hunah hian thusawiin Prime Minister chuan ramin COVID-19 hripui dova theihtawp a hma a lak mek lai hian India ram chhaklam leh hmarchhakte chuan  ruahsur nasa avanga tuilian leh harsatna dang hmachhawn an ngai a, nunna chan leh chenna in leh lo chante tam tak awm a ni a ti.

Prime Minister chuan Manipur Sorkarin inkarkhip chhungin state pawn atang a hawte tan ruahmanna felfai tak a a buatsaih chu lawmawm a tih thu a sawi a.

Manipur-ah hian Pradhan Mantri Gatub Kalyan Anna Yojana hnuaiah  mi rethei nuai 25 velin a thlawna buhfai an dawn thusawiin Ujjwala scheme hnuaiah hmeichhia nuai 1.5 chuang a thlawn a eirawngbawlna gas cylinder dawngtu an awm bawk a ni a ti.

Cheng vaibelchhe 3000 seng a Water Supply Project siam tur chungchang sawiin state in tui lama harsatna a hmachhawn thin a sukiang dawn a, a bikin State chhung a hmeichhiate tan zangkhaina nasa tak a thlen dawn a ni a ti a. Pu Modi chuan project hi Greater Imphal bakah  khawpuite zawk 25 leh khaw 1700 a chengte'n an chhawr thei dawn a ni a ti a. He project hi kum 20 vel lo kal leh tur thlir chung a duan a ni a ti.

He project hmang hian mi maktaduai tam takin an inchhungah tui thianghlim an dawng thei dawn tih sawiin mi sang engemawzat tan eizawnna a awm phah dawn bawk a ni a ti.

Prime Minister chuan kum kalta khan rampumah Jal Jeevan Mission hawn anih thusawiin hemi hnuaiah hian chenna in vaibelchhe 15 chuang tan tui pekna pipe siam tum a nih thu leh tundinhmunah hian ramchhungah nitin tui connection nuai khat chuang install a ni a, hemi kawngah hian mipuite pawhin a tul angin sorkar an puibawm a ni a ti.

Prime Minister chuan dinhmun tha zawk nei turin khawsak awlsam zawkna a pawimawh thusawiin mi harsa zawkte hlamchhiahlo zawng a hmalak a pawimawh a ni a ti.

Kum 6 kalta atang khan kawng hrang hrangin level hrang hrangah hmalakna neih anih thusawiin a bikin mi retheite khawsak awlsam zawkna atan hma nasa tak a lak a ni a ti a. Manipur tiamin India ram pumpui chu pawna inthiar awmlohna (open defecation free) a ni ta chu lawmawm a tih thu a sawi a. LPG gas pawhin mi rethei berte a thlen phak tawh thute, khawtin kawngpui thain a pawh tawh thute leh chenna in neilote tana pucca building din anih thute a sawi a ni. 

Prime Minister chuan in tina tui thianghlim in tur pek kawng a hmalakna chu mission mode ang a kalpui a ni a ti.

Pu Modi chuan dinhmun tha zawk chu connectivity nena inzawm annih thusawiin Hmarchhak a connectivity tihchangtlun chu ram himna atana pawimawh a ni a, Atmanirbhar Bharat tihhlawhtlinna atan pawh a tul a ni a ti a. Hei hi India ram hmalakna Act East Policy atan a tangkai anih bakah ram chhung a veivahna tha leh tourism sector tih changtlunna atan a pawimawh a ni a ti.

Hmarchhak chu modern infrastructure leh roadways, Highways, Airways, Waterways leh i-ways bakah gas pipelines hmang a thuam changtlun mek anih thu sawiin kum 6 kalta chhung khan Hmarchhak pumpui a infrastructure dinna atan hian cheng vaibelchhe sang tam tak sen a ni tawh a ni a ti.

Prime Minister chuan Hmarchhak State a khawpui ber pali chu khawpui dangte nen a inkalpawh thei tura siam tuma hmalak anih thusawiin district headquarter zawng zawng lane hnih kawng a siamte leh thingtlang khua zawng zawng kumtluan a kalpawh theihna tur kawng siam tum a ni a ti a. Hemi tihlawhtling tur hian kawng kilometer 3000 vel siam tura hmalak mek anih tih sawilangin kawng kilometer 60000 a thui siamna tur project pawh kalpui leh mek a ni a ti.

Hmarchhakah hian rail connectivity lamah hmasawnna nasa tak a awm thusawiin railway station thar siamna tur project te ruahman a ni a, rel kawng (rail network) awmsate tilian tura hmalak a nih thu pawh a sawi a. Hetiang bawk hian Hmarchhak state  khawpui (capital) zawng zawng rel hmang a inkalpawh tir theih tuma hmalakna pawh kum 2 kalta atang khan chak taka kalpui a ni a ti.

Road leh railways lama hmalakna bakah hian Hmarchhak a air connectivity pawh a pawimawh hle tih thusawiin tundinhmunah hian Hmarchhakah hian airport hmanlai 13 a awm a; Imphal Airport tiamin Hmarchhak a airport awmsate cheithatna atan cheng vaibelchhe sangthum chuang hman mek a ni a ti.

Prime Minister chuan Hmarchhak a waterway pakhat awm tiamin ramchhung a waterways 20 chuangte chungchang sawiin hengte hian inkalpawh leh intlawhpawh lamah nasa takin awlsamna a thlen dawn a ni a ti.

Prime Minister chuan Hmarchhak hi India rama Cultural diversity leh  hausakna entirtu pawimawh a ni tih thusawiin tourism lamah kawng eng tak a nei a, hei hi tun thleng hian haichhuah a la nilo a ni a ti a. Prime Minister chuan Hmarchak hi ram tana hmasawnna khalh kaltu a ni dawn a ni a ti.

Prime Minister chuan tunah chuan Hmarchhak a thalaite leh mipuite hian tharum thawhna lam chi hnualsuatin hmasawnna lam pana kal an thlang tawh zawk a ni tih thusawiin Manipur than mawhbawk pawh tunah chuan hmanlai thil a chang ta a ni a ti.

Pu Modi chuan Assam, Tripura leh Mizoram mipuite chuan tharum thawh a chetna lam chi hnualsuatin Bru-Reang refugee-te pawhin dinhmun tha zawk lam duhin hmalam an pan a ni a ti.

Bamboo/Mau industry lam leh organic product siamchhuah lama Hmarchhakte kawng eng neih tarlangin Prime Minister chuan AatmaNirbhar Bharat campaign hnuaiah value addition lama hmalakna atan cluster-te siam mek anih bakah tualchhung product siamte zawrhchhuahna atan market ruahman a ni a ti.

Agro Start-ups leh industry dangte chuan he cluster hi an chhawr tangkai dawn tih thusawiin Hmarchhak hian India in Bamboo (mau) ramdang atang a a lakluhte chu an tharchhuah leh siamchhuah hmangin an luahlan thei dawn a ni a ti a. Ramchhungah hian incense stick mamawhna a sang hle a, tun thleng hian billion engemawzat man incense stick hi ramdang atangin kan la lalut reng a ni tih sawiin PM chuan hemi titawp tur hian Mau chingtute, handicrafts  lam a tui mi artist-te leh facility dang atan National Bamboo Mission-ah cheng vaibelchhe za tam tak invest mek a ni a ti a. He hmalakna hian Hmarchhak thalai tam takin an chhawr dawn a ni a ti.

Prime Minister chuan Hmarchhakah hian health, education, skill development, start-ups leh training dang atan institution thahnem tak din mek a nih thusawiin Manipur a Sports university leh world class stadium din tur chuan Manipur chu ram chhung a sports lam talent tha awmna hmunpuiah a siam dawn a ni a ti.

- PIB Aizawl

Post a Comment

0 Comments