Lalremsiami Hockey Playground tur laih hna ṭan


Kolasib | July 10, 2020: India Hockey player, Mizo nula Lalremsiami Hockey Playground tur chu vawiin khan JCB hmangin laih tan a ni.

Lalremsiami Hockey Playground hmun tur (ram) hian Pu Lalfamkima, Kolasib College Veng chuan a mimal ram a sahthlak a, Hockey Mizoram hruaituten an sawi dan chuan Hockey playground tur hi a dung meter 48 leh a vang meter 31.76 ani dawn a, hei hi khawvel hmun dangah pawh an pawm dan tlang lawn ani. 
     Lalremsiami Hockey Playground tur JCB hmanga laih tan anih hma hian Kolasib MNF Block President Pu Lalzawmmawia chuan thutawi sawiin, Kolasib in hmasawnna rahbi thar kan chuangkai tur chu a lawmawm tak zet a, hemi kawnga hmalatu Kolasib bialtu MLA Pu K. Lalrinliana, Minister of State chungah lawmthu ka sawi ani, a ti.



Report a tarlan a nih danin Lalremsiami Hockey playground laih nan hian Kolasib bialtu MLA chuan a MLA LAD fund atangin JCB darkar 100 hmanna tur pawisa a pe chhuak dawn a ni.

Tluangpuia Hilthang
| CHAWIMAWI TLAK REMSIAMI | 

Vawiin chu National Women Hockey Player Nl Remsiami hming a Hockey Ground siamna tur a, hna  tanna ah ka tel ve theih hlauh mai a. He Ground siam a nih theihna tura ram petu Pu Lalfamkima College veng leh Pu K. Lalrinliana Bialtu M.L.A, a puitlin theihna tura M.L.A. fund ui miah lo a petu te an fakawm khawp mai. An ni pahnih zar ah Kolasib chuan Hockey Ground tha tak kan nei chhoh thuai a rinawm.

Sport Discipline hrang hrang ah mimal leh pawl ang pawh a, National huap a tel leh lawmman la kan awm ve nual tawh a. Hetiang a mimal hming a Ground han siam sak erawh kan la nei lo niin a lang. A ni Remsiami pawh hian a phu chuang bik em ni? tih pawh zawhna awm thei tak a ni. Ngun taka han ngaihtuah chuan Remsiami ang em a hlawhtling hi kan la awm lo niin a lang a. Chung kar ah amah chawimawi nan a Ground tur ram petu an han awm te, chumi ti hlawtling thei tura M.L.A satliah mai ni lo, Minister hial khaw pa kan neih vanneihna a ni bawk awm e.

A thiamna leh hlawhtlinna chu thuhran, Mizo nula tlawm leh chapo lo tak a nihna avang pawh hian phu ka lo ti khawp mai a. Nikum a pa boral tum a lo haw khan inthlahrung deuh mai in ka va ral ve a. Chuta a incheina leh nun tlawm tak ka hmuh khan ka ngaihsanna a zual hle a ni. A thiamna avang in sum tamtak a vaw chhuak tawh a. Duh se chu Branded thawmhnaw man to tak tak a in bel thei ngei ang. Chuti chung chuan incheina man tlawm tih hriat ngawih ngawih mai hi a lo in bel a. Chuta ka hmuh chu zahawmna hi kan thawmhnaw in bel man to lam ah ni lo in, kan hnathawh hlawhtlinna ah zawk a awm tih a chiang hle mai.
Khaw khat chanchinbu ah tak ngial pawh ka hlawhtlinna chhuah tur a la awm loh lai in, a ni chu State huap chu sawi loh National level Media te chuan a chanchin an chhuah chuai chuai a. Chung te chu chapo phah nan a hmang miah lo in, kei veng hmawr a pa hriat hlawh loh ber mai leh vawi khat pawh a la hmuh ngai loh kha, hlim em em mai khan min lo dawng sawng a. Amah ngei in thingpui min lum sak in, no seng in a sil leh nghal vek a. Chu mai pawh la duh tawk lo in, ka haw tur kawt thleng in min la rawn thlah zui a. Mizo nula nihna ropui taka a hlen chhuak kan hmu kha, Remsiam i hockey thiamna leh hlawhtlinna  chu thuhran, Mizo nula i nihna ang pawh a chawimawi i va phu tak em ka ti vawng vawng mai a. Vawin ah a pual a Hockey Ground laih an han ni ta pawh hi ! ka lawmpui hle a ni.

Post a Comment

He post chungchanga i ngaihdan lo sawi ve rawh:

Previous Post Next Post