Ka legal writer ngaihsân K.L. Liana (1960 - 2020)

- K Remruatfela

Columnist, EXPLORE MIZORAM

America ramah Billy Graham lehkha thawn i duh chuan *Dr Billy Graham* tih ringawt pawhin a address ziak mah la, khawi Post Office pawhin i lehkhathawn chu i duhna hmun takah a thlenpui thei ang che an ti thin a. Chutiang bawkin, Zofate zinga legal writer ropui K.L. Liana pawh hi a chanchin zawh chian ngai lova mi tinte hmelhriat leh hriatchian sa a ni awm e.

Kan naupan laiin ka pa hian *Sakeibaknei* Chanchinbu hi a la thin a. Chu Chanchinbuah chuan issue tin maiah Pu K.L. Liana article hi chhiar tur a awm deuh reng thin a. A thuziah apiang chu chhiar mâkmawha ngaiin ngaihnawm ti tak hian ka chhiar chhuak parh thin a. Chumi hnuah pawh Chanchinbu hrang hrangah a kutziak chhiar tur ka hmu chho ta zel a. Tu nge a nih a, eng ang hmel pu nge a ni tih pawh ka hriatchian hma hauhin a hming tawi fel tha tak hi  ka thinlungah a mikhual lo hle!

Pawl 12 te ka han zir zawh a, dân lam te ka han zir chhoh tâk hnuah phei chuan kan tana kawng lo sât kaw tawhtu amah, Pu K.L. Liana ngei mai chu râwn berah ka nei chho ta a. Ani pawhin a article ziah thar apiang chu ka email ah mi a rawn thawn tir fo thin a, keipawh ka thuziak thelêm ve tak takte chu ka thawn lêt ve bawk thin a. Chutiang chuan tuina inang leh _subject_ inang ta na na na chu pafa ang mai hian Phone call ah te kan inbe bawrh bawrh thin a. Vawi tam tak hi ka bulah, _"Nang chu i zir chhuah hunah pawh dân lamah lo lùt ve duh suh, keipawh phuartu ka nei a, duh angin thu a ziah that theih loh, law book emaw law magazine emaw te siam la, thuziah lamah insawr bing tawp zâwk rawh",_ min ti thin a. Nimahsela, a mi duhsakna chu zahawm viau mah se, *Advocate* nih hi naupan têt ata tawh ka nih tum a lo ni ve tawh bawk si a, chumai bakah heti lama insawrbing tawp tur chuan kan ram mipui hian a la phâk lova hriatna te ka nei bawk si a, inthlahrung takin ka lo tum sa lam chu ka han zawh chho ta zâwk chu a ni a. Vawiina min kalsan tâk hnuah hian ami duhsakna tawngkam kha ka thinlungah a lo kiu thar leh vawng vawng mai.

Tichuan, Pathian khawngaihna zarah law chu ka han zir chhuak ve a, a kawi a ngilin a thu chu lo zâwm thei lo mah ila, ama finchhuahna zârah ni 17.8.2015 atang khan *Dân Hriatna Legal Journal* chu kan han tihchuak ve ta râwih a, tlâwmngaiin *Contributor* ah min tansak ve nghal a. Kan tangkaipui thin hle a ni. Nimahsela, eizawna kawnga han luh tak tâk hnuah erawh chuan tun hmaa anga inkawm bawrh bawrh leh infiam bawrh bawrh ang kha a lo rem ta chiah lova. Kan hnain min phuarna chen a lo awm tâk avangin a biak pawh kan inbe khât ta tial tial a. Tun hma ang ngawta literature khawvela han titi dun bawrh bawrh ang kha a rem ta meuh lo a ni ber mai!

Amah Pu KL Liana hi kum bi chhiar dana a bul tan ni tak, Janurary ni 1, kum 1960 khan Pu PC Lalhela leh Pi Laichhungi te fa hming koh ni turin Sumsuih khuaah a piang a. Sumsuih khua hi Hmuifang leh Sialsuk inkara awm a ni. Sumsuih Primary Sikul atangin Primary a pass chhuak a. Middle School erawh Aizawl ah zir zawmin High School hi JL Higher Secendary School atangin a chhuak. Kum 1980 khan Aizawl College atangin BA a zo a. Kum 1990 khan Mizoram Law College atangin LL.B a zo leh a ni.

BA a pass hlim hian kum 3 chhûng zet zirtirtu-ah a tang hman a. Middle School Zirtirtu hna a thawh laiin, Kum 1983 khan Competitive exam atangin Judicial Service ah a lut a. _(Hetih hun lai hi chuan Law degree nei kher lo te tan pawh Judicial Service hna hi a dil theih a ni.)_ Chumi hnuah kum 2 chhûng Law Department-ah Under Secretary hna a thawk leh a. Kum 1998 khan ADM (J) ah a kaisang leh a ni. Chumi hnuah chuan District Court lamah Judicial Officer hna chi hrang hrang a thawk chho a. A service tawp hmaa a hna chelh hnuhnung ber chu Presiding Officer hna,  Motor Accident Claims Tribunal (MACT)-ah a ni.

Tu hnial rual lovin amah, Pu K.L. Liana hi Zofate zinga dân lam hawi article ziak hnem ber a nih a rinawm a. A dàn lam hawi thuziakte hi Reference atana hman tur chi, thu ril leh khirhkhân tak tak te ni hlawm thin lo mah se, a mi nâwlpui tana hriat fiah awlsam leh zirtirna nei tha tak vek vekte an ni a. Hetianga fiah taka a sawi tum leh a rilru chhungrila awm mawlmang taka a han ziak chhuak thlap thlap thei thinte hi amah Pu KLa 'brand', Pu KL Liana ti KL Lian tu, amah ti hlu tu ber pakhat pawh a niin ka hria. Kei ka ngaihsanna ber chu châwl leh bahlah awm miah lova dân lam hawi article a ziak reng thei thin hi a ni. Tunah chuan thu ziah thar nei thei dâwn tawh lo mah se, a kutchhuak hnutchhiahte hian Zoram hmun kil tin a dap chhuah tlat tawh avangin legal literature lama a sûlhnu hi engtikah mah theihngilh a ni ngai tawh lovang. Pu.., mangtha aw...RIP😢