HSSLC result buaia mawhphurtu hrem dawn!

Aizawl | July 20, 2020: Higher Secondary School Leaving Certificate (HSSLC) 2020 result chhuakah tihsual a tam avangin Mizoram Board of School Education (MBSE) chuan a mawhphurtu chu an hrem dawn.



HSSLC result tihchhuah takah Lalhlimpuii, St Joseph Higher Secondary School chu a mark belh that a nih hnuah mark 500 a 454 hmutu, pakhatna a puan Christina Lalchhandami, Greenland Higher Secondary School nen an mark hmuh a in an avangin pakhatna a puan a ni ve leh a. Hei bakah hian Providence Higher Secondary School naupang fail a puante pawh result an complain hnuah 1st Division leh 2nd Division ah an pass a.

Anni bakah hian result complain thahnemtak MBSE ah hian thehluh a ni bawk. MBSE Chairman Pu F. Lianhmingthanga chuan hemi chungchangah hian enquiry committee din a ni dawn a ti a, inhnamhnawih zawng zawngte chu insawifiah tura tih an nih dawn bakah a mawhphurtu chu an lo tih thin dan angin black list ah dahin exam reng reng khawih tawh lo tura hrem a ni dawn tih a sawi.

Hemi chungchangah hian MZP chuan MBSE chairman hi hmuin sawrkar chu thil tisualtu hrem ngei turin an phut a, sawrkar in hma a lak hun a tan hun tiam an pe bawk.

Post a Comment

He post chungchanga i ngaihdan lo sawi ve rawh:

Previous Post Next Post