'Hri leng, Dan zawm leh a kenkawh'

- J Sawma Vanchhawng

Lawngtlaia Covid-19 kai hmuh thar mi pahnih,  Guwahati atanga lo hawte chu Thenzawl-a Hotel pakhatah an chawlh bakah, a bul dawrah thil an lei tih hriat chhuah a ni a, hotel neitute leh thil an leina dawr neitute home quarantine nghal an ni.

Two wheeler hmanga haw an ni a,  Thenzawl an paltlang hun hi June ni 29 a ni tawh a, an chawl tih hriat chhuah a nih hun,  vawiin, 5th July nen a inkarah hapta khat deuh thaw a tla hman a,  hetih chhunga hotel leh a bul dawr tlawhtute chhui vek hautak tham khawpin hun a tla rei hman a ni.

State pawn atanga lo haw turte hi sorkarin thu delhkilh fel tak neiin phalna a pe a.  Haw phalna (Inter State Movement Permit) a pekah an zawm turte chiang taka ziah lan a ni a,  point no. 2 & 3 ah te chuan 'Lirthei khalhtu leh passenger te kawng lakah khawi khuaah mah an ding tur a ni lo' tih leh,  'an kalna tur an thlen hma chuan midang an hnaih tur a ni lo' tih tarlan a ni. 

Hri leng mek hi chhiatna, disaster-ah puan a ni a,  DM Act,  2005 tlawhchhana thupek siam zawm duh lote chu Section 51 hnuaiah hrem theih an ni a,  kum 1 lung in tantir leh pawisa chawitir theih an ni a,  an thu awih lohna chuan thihna emaw,  midang tana hlauhawm emaw a thlen anih chuan kum 2 lung in tantir theih an ni. 

IPC 188 hnuaiah pawh sorkara thuneituten Dan hnuaia thupek an siam bawhchhiaa midangte nunna atana hlauhawm thlentirtu chu thla 6 lung in tantir leh pawisa chawitira hrem theih a ni. 

State danga kan mi leh sa tangkhangte,  lo haw khawm tura rilru in hawng taka kan awm laiin,  sorkar thupek leh Dan zawm lote avanga mi tam tak buaina a thleng hi a pawi hle.  

Khua leh tui tha chuan Dan a zawm/ngaipawimawh tur a ni a,  chutih rual chiah chuan Dan hi mi nawlpui himna tura duan a nih avangin a hunah chuan khauh taka kenkawh tur a ni.  Chu chuan Dan bawhchhiat mai pawisak lohna rilru lo neite a ti tim a,  Dan an lo zawm phah thin a ni si.