COVID 19: Favang-ah India dinhmun engnge ni dawn?

Aizawl | July 17, 2020: Indian Institute of Technology (IIT) Bhubaneswar leh AIIMS Bhubaneswar țangdun chuan, tuna India ram chhunga hri țaidarh dan leh hri pui zeizia ațangin zir chianna an nei a. Kumin thlasik lo thleng turah hian COVID-19 hri hi tuna India rama a țai darhna aia nasa zawk hian darh thei dinhmunah a awm tih tuna hri kai pun chak dan an zir chianna chuan a tar lang.

Zir chianna ațanga an hmuh dan chuan khaw lum lam " Celcius degree khat (1° C) a khaw lum a belh chhah hian hri kai zat 0.99% in a tla hniam a, hei hian hri kai a leta pun chhoh theihna ni 1.13  chhung a pawtsei sawt thei" tih an sawi. He zir chianna hian a sawi zel dan chuan boruaka hnawng tam ( increase in relative humidity) hian hri kai darh a ti pung sawt thei, tih tuna India ram khaw awm dan nen an zirna chuan a tar lang.

IIT Bhubaneswar & AIIMS Bhubaneswar țangdun te zir ang tho hian a hrangin  Indian Institute of Science (IISc) Bengaluru chuan hri pui zei zia leh tuna India ram dinhmun ațang hian an zir bawk a, he an zir chianna ațang hian thil chi hnih — a chhe ber thleng thei leh a ziaawm lam thleng thei, kawng hnihin an zir a. 

A chhe ber thleng thei tura an hrilhlawk ( projects) dan chuan, India ram hian September 1 ah chuan hri kai nuai 35 a nei tling tawh ang a, tuna hri kai let 3 aiin a sang  zawk a, heng zinga nuai 10 zet chu hri vel lai mek (active cases) an ni ang a, hri avanga thi pawh 1.4 lakh an tling ang. November 1 ah chuan India ramah hri kai nuai 120 an chuang tawh ang a, thi pawh nuai 5 an chuang tawh ang.  January 1,2021 ah chuan hri kai nuai 290 an tling tawh ang a, thi pawh nuai 10 an chuang tawh ang. Hei hi a chhe ber thleng thei lama an hrilhlawkna a ni a, March thla tawp thlengin an hrilhlawk a,  March 2021 tawpah chuan hri kai nuai 620 chuang an awm theih thu leh chung zinga nuai  82 te chu hri vei lai (active cases) an ni ang a, thi pawh nuai  28 an tling ang.

 IISc  zir chianna hian a țha lam zawnga India ram hri pui zeizia ațanga an hrilhlawk ve thung chu : India ram hian September 1 ah chuan hri kai nuai 20 chuang a nei ang a, chung zinga nuai 4.75 te chu hri vei lai ( active cases) an ni ang a, hri vanga thi 88,000 an tling ang.

Source :

Times of India

July 16, 2020

====17==07==20==

Huna Kawlvawm