Aizawl | July 02, 2020: China chuan UNO Security Council ah June 29 ni a Pakistan Stock Exchange terrorist ten an beihna chungchanga thil ti sualtute demna thu chhuah siam tur leh India inhnamhnawih ngeia puhna leh demna thu chhuah siam turin nimin Nilaini khan a pulut a ni. He thilah hian US chu inrawlhin lehkha tih chhuah tur chelh tlai turin țan a rawn la nghal a ni. Karachi Stock Exchange mi firfiakte beih demna tur (draft press statement) hi chelh khaw tlai turin US chuan țan a rawn la a, Germany chuan US chu a rawn thlawp a, Germany hian Thawhlehni khan a lo chelh tlai tawh bawk a ni.
US leh Germany ten UN Security Council thu chhuah tur an chelh tlai hi India tan chuan thil lawmawm tak a ni. Pakistan Foreign Minister Shah Mehmood Qureshi leh a hnuah PM Imran Khan te chuan Karachi Stock Exchange beihnaah hian India a inrawlh ngei a ni tih leh India demna uar takin an chhak chhuak a ni.
He press statement hi China put luh leh ziak a ni. Pakistan Sorkar chu Stock Exchange beihna vanga tuarpuina leh pawi tihna thu leh UNSC chu Pakistan ram lamah an țang tlat a ni tih te thu chhuah turah hian a awm a ni. “Security Council a member te chuan thil ti sualtute man chhuah a țul a ti a, he thil huaihawttute, suma țanpuitute leh a hlawhtlin theihna tura beitute hi a demin an thil tih hi firfiakte thil tih a nih avangin ram zawng zawngte chu International law hnuaia an awm an intiam ang leh Security Council in thurel a lo neih tawh te tlawh chhanin heng thil sual titute zawn chhuah kawngah hian Pakistan Sorkar an thawhpui tur a ni, " tih chu an resolution ah a tel a ni.
China hian he thu hi Thawhlehni khan pawmpui turin UN Security Council ah dan ang takin a pulut a, mahse New York sanaa tlai lam dar 4:00 thleng pawhin tu ram mahin an sawi zui lo a, " an ngawi țhup” vek a ni. Khawi ram pawhin firfiakte kut an tuarin demna thu hi UNSC tih chhuah țhin dan a ni. Hetianga ngawi renga hnial kalhtu an awm loha an hun tiam a thlen chuan thu put luh chu pawma ngaih a ni.
Mahse tlai dar 4:00 a lo rik chuan Germany chuan aw rawn neiin he thu chhuah tur hi tih tlai a rawt ta a ni. Diplomat te sawi dan chuan Pakistan Foreign Minister , S M Qureshi thu chhuahah he tha rum thawhnaah hian India a demna leh a thu chham chhuah tel zozai hi pawm theih a nih loh thu sawi a ni.
UN-a Chinese palaite chu nasa takin țan an khawh a, Germany in hemi hnial leh do zawnga a rawn sawi hnu hian an hun tiam dar 4:00 a lo ri zui ta bawk nen thu chhuah tur chu pawm a ni ta lo a ni. Hun tiam chhung hi 10 am July 1 ah sawn hlat a ni.
An hun tiam 10:00 am July 01 a her liam hma, a tawp țep tihah US chu a rawn inrawlh ve thungin tih khaw tlai dang a rawn rawt belh leh ta a ni.
Diplomat te sawi dan chuan he thu chhuah tur hi engtikah emaw chuan chhuah chu a ni ngei ang, amaherawhchu, China leh Pakistan ram țang dun rawtna awlsam lo tak leh khawlhkham siam sak hi tun hnaia an khawsak phung leh chet dan hi khawvel hian a lawm lo a, tu ram mah anmahni țan zawng hian an tha a za lo tih lantirna anih avangin an thu putluh chelh khaw tlai hian chu chu a entir a ni, a ti.
June 29, 2020 tunkar Thawhțanni a Karachi Stock Exchange beihnaah khan mi 19 an thi a, Balochistan Liberation Army ten an tih a nih thu, thu chhuah an siam. Thi zingah hian BLA mi leh sa 4 an tel. Hetiang a ni chung pawh hian Pakistan leh China chuan India inhnamhnawihah an puh tho a ni.
Source
Times of India
SWARAJYA
July 01, 2020
====02==07==20==
Huna Kawlvawm
Post a Comment
He post chungchanga i ngaihdan lo sawi ve rawh: