Agriculture minister-in Loneitu Mobile App tlangzarh; khawvel changkang chho zelah IT, thiamna thar leh mechanization te loneih lamah leh loneitute hman tangkai theih thil ngaituah chhuah leh hman a pawimawh - C Lalrinsanga

Aizawl | July 09,  2020: Agriculture Minister C Lalrinsanga chuan vawiin khan loneituten awlsam taka Mobile Phone atanga lo neih leh a kaihhnawih hrang hrang, an tangkaipui tur hriat theihna Mobile App 'Loneitu' chu loneitute hman theih turin a tlangzarh.

Agri minister C Lalrinsanga chuan he ruahmanna a taka hman theiha awm ta chu lawmawm tiin Zoram loneitu zawng zawngin hmang tangkai se, hun harsa kan tawh mek laiin Pathian malsawmna kan dawn theihna tur atana hmanraw tangkai nise a duh thu a sawi a, COVID-19 hripui leng leh inkharkhipna in loneitute tan harsatna nasa takin a thlen a, loneitute harsatna chu Department harsatna ani tih hriain Department chuan a thei ang angin harsatna sutkian nan hma a lak thu a sawi a. Heng zinga Farmers’ Helpline chu loneitute an hmang tangkai hle niin a hriat thu a sawi bawk a ni.

Agriculture Minister chuan, khawvel changkang chho zelah IT, thiamna thar leh mechanization te loneih lamah leh loneitute hman tangkai theih thil ngaituah chhuah leh hman a pawimawh tih sawiin hengte hian hlawkna piah bakah awlsam zawka kawng hrangah loneitute tan hmasawnna a siamsak thei a ni, a ti. Sawrkar flagship programme SEDP hnuaiah Mizorama a vawikhatna atan vaimim chin tam tum a ni tiin beiseina sang tak Department in a nei a ni, a ti a. Thal ah be chi hrang hrang chin a hmalak tum anih thu a sawilang bawk.

He Apps hi Agriculture Department leh i-Bridge firm tangkawpin an siam a ni a, Play Store ah dah niin, install tawh chuan internet hmang lo pawhin lo neih kaihhnawia hriat duhte en zung zung theihna a ni a, thlai chin dan hrang hrang, thlai chi mamawh zat, thlai thar chhuah theih zat, thlai hmun enkawl chhunzawm dan, thlai ven dan leh thil dang dang hriat theihna a ni. Heng bakah hian Agriculture leh a kaihhnawih chanchin thar chhiar tur a awm ang a, loneitu hlawhtling chanchin te, Agriculture Department enkawltu Official te phone number hriat theihna a nih bakah khawl hmanga loneihna hmanraw zuartute, thlai chi leh leitha zuar (Dealer-te) inkawhhmuhna a ni bawk. Kum engmaw zat kaltaa thlai thar tawh zat te, Zoram hmun hrang hranga ruahtui tla zat record te pawh a en theih a ni.

He Mobile App-ah hian loneituten an lo neih chungchanga official-te hnena rang taka report an pek theihna 'Thil tul Report-na' dah tel a ni a, thlai eichhetu, Sazu emaw, Pangang emaw, Khau emaw puang thut pawh rang takin an report thei dawn a ni. He Mobile App hi hun lo kal zel turah a tul anga tihchangtlun zel tum a ni.

Mobile App tlangzarhnaah hian Pu H Biakzaua, MLA leh Agriculture Development Board Vice Chairman chuan Minister hi a tawiawm a. Hemi hnu hian Department hmalakna hrang hrang kalpui mek leh hmachhawp leh kum 2020-21 atana inbuatsaihnate Minister hovin thlirho a ni.

He hunah hian Centrally Sponsored Scheme hrang hranga hmalakna kal mek leh hmachhawp leh kum 2020-2021 atana inbuatsaihnate thlir hona neih nghal a ni a, Minister chuan Agriculture Department hnuaia CSS enkawltute nen harsatna awm thei leh chak zawka hmalak dan turte sawi ho nghal a ni.

Post a Comment

0 Comments