Zanin zanlai atangin karhnih chhung Total Lockdown; Inkhunghran hun ni 21 ah pawtsei

Quarantine facilities-a awm mek naktuka chhuak mai turte chu ni sarih  dang awm chhunzawm tura hriattir an ni – Dr R Lalthangliana

Thlalak: Total Lockdown lai, Aizawl

Aizawl | June 8, 2020: Chief Minister Zoramthanga hova vawiin-a inrawnkhawm chuan zanin zanlai atangin karhnih chhung atan total lockdown puan a ni. Vawiin atanga hman nghal turin inkhunghran hun chhung ni 14 chu ni 21 thlenga pawhsei a ni a, khunghran mek, naktuka chhuak tura tih te pawh ni 7 dang an awm chhunzawm a ngai dawn.

Health & Family Welfare Minister Dr R Lalthangliana chuan vawiin tlai khan a pisa-ah quarantine facility a khunghran mek naktuka chhuak turte chu ni 7 dang an awm chhunzawm a tul thu a sawi.

Health minister Dr R Lalthangliana

Health Minister chuan vawiina Chief Minister hova inrawnkhawmna neihah zanin zanlai atangin total lockdown karhnih chhung atan puan a ni a, Quarantine (inkhunghran) hun chhung ni 14 chu ni 21 thlenga pawhsei a nih bakah, hei hi hman nghal tura tih a nih avangin quarantine facility hrang hranga khunghran mek, naktuka chhuak tura tih te pawh ni 7 dang an awm chhunzawm a ngai dawn tih a sawi a, quarantine facility atanga chhuak hlim te pawh in lamah uluk taka ni 7 chhung self-monitoring (uluk taka mahni invil) turin a chah a, chhungte nen pawh a intlawhpawh rih lo tur leh fimkhur taka awm turin a chah a, hemi chungchanga inkaihhruaina pawh a rang thei ang berin kimchang zawka tihchhuah a nih tur thu a sawi.

Health Minister chuan mipuite, a bikin damlote chi-ai lo turin a chah a, total lockdown kalpui chhung hian Mizoram sawrkar hnuaia daktawr thawk zawng zawng ten anmahni thawhna hmun theuha an office phone number leh an mimal (private) phone number ah mipuite leh a mamawhte tan engtiklai pawha rawn theihin an awm reng dawn tih a sawi a, Mizoram sawrkar hnuaia daktawr zawng zawngte chu damlohna leh harsatna nei annih loh chuan anmahni post-ah theuh awm a, mipuite zawhna an dawn te hawihhawm taka lo dawngsawng turin a hriattir bawk a ni.

Total Lockdown inkaihhruaina chu State Executive Committee, Mizoram State Disaster Management Authority in a chhuah dawn a ni.

Total Lockdown hi khawpuiah chuan khauh taka kalpui a ngaih chhan awm mahse thingtlang khaw thenkhatah chuan nunphung pangngai deuh thaw a kal a pawiloh theih avangin, state pum a angkhat a khuahkhirhna kalpui vek a tulloh thu leh, hemi atan hian veng/khua leh area a zirin kaihhruaina siam rel a ni a. Hemi hun chhung hian mipui tan phurrit lutuk a awm loh nan mamawh leina hun tur leh dawr hawn dan tur pawh fel taka ruahman a ni ang.

Tuna quarantine hun chhung ni 14 kalpui mek chu ni 21 ah pawhsei a ni dawn a. Lockdown kalpui chhung hian state pawn atanga tangkhang lo haw te a tam thei ang ber leh chak thei ang berin PCR test tih a ni ang a. Home quarantine chu damlo leh a tul bik thenkhat tan lo chuan tih loh hram ni se tiin rel a ni bawk.

Chief Minister Pu Zoramthanga chuan vawiin meeting-ah hian Covid hripui chuan Mizoram rawn run in, tunah pawh vei mek mi 41 kan hmu tawh a; Theih ang tawpin kan state a him theih nan sorkar chuan hma la in, rampum lockdown kalpui hma in kan state ah kan lo tih hmasak tawh thu sawiin Pu Zoramthanga chuan COVID-19 dona atan chuan pawisa tam lo chung chung pawhin mamawh leina tur dilna lut reng reng a hnawl ngailoh thu leh a tih tlem (cut down) ngaih loh thu a sawi a, mamawh dang a awm pawhin inthlahrung lo tur a chah in, neih chhun ang ang hman a nih tur thu a sawi. Natna kan hriat lawk loh leh hmelhriat ngai miahlo laka fihlim turin thiam ang tawka sorkarin hma a lak thin thu Chief Minister chuan sawiin, tuna kan Mizoram dinhmun thlir hian kan him tlan theih nan total lockdown neih rawtna chu tha a tih thu a sawi a. Thla thum chhung hah takin task force leh duty dangte lo thawh tawhnaah lawmthu sawiin Chief Minister chuan an inpekna chu chhuanawm a ti a. Tun total lockdown kan kalpui leh mek turah hian tlawmngaia theihtawp lo chhuah leh hram turin a ngen bawk. Him tura hmalakna hi a thlawn mai loh nan mipui kan fimkhur tlan a tul a ni a ti.

Health Minister Dr. R. Lalthangliana chuan ZMC-ah tun hnai atang khan ni khat a 300 dawn sample endik theih a nih tak thu leh khawl tam zak hman thuai tum a nih thu a sawi a. Reilo teah RT-PCR khawl thar chah thlen thuai a nih tur thu sawiin, PCR khawl tlukpui Trunat chu Lunglei ah tunah hian pahnih hman theihin a awm tawh thu a sawi bawk. Health Minister chuan community spread a awm loh nan theihtawp chhuah a tul thu a sawi.

Social Welfare Minister Dr. K. Beichhua leh H&FW Board Vice Chairman Dr Z.R. Thiamsanga te chuan mipui kan fimkhur tlanna atan chuan dan zawm that a pawimawh thu te, Mizoram chu a chhung a cheng kan tamloh avanga state danga an kalpui anga tih tum ve ngawt chi a nih loh thu leh community spread a awmloh nan theih tawp chhuah a tul thu an sawi.

Vawiin inrawnkhawmnaah hian Mizoram a COVID-19 positive te chu thalai lam zel ni mah se ram dang nen a inkhaikhin chuan ‘vulnerable group’ an tih, natna hrang hrang cancer, bp sang, HIV +ve, leh adangte kan tam avangin ram danga an dampui mai thin kha keini state ah chuan a hlauhthawnawm theih avangin vantlanga kan inkaidarh loh nan a vei mek awm thei turte zawnchhuah thuai theih nan leh chumi chhunga inkaidarh a awm loh nan total lockdown kalpui a tul thu an sawi a. Chennai atanga lo haw quarantine period zo tawh te pawh PCR test tiin tunah hian hmalak mek a nih thu sawi a ni.

Chief Secretary Pu Lanunmawia Chuaungo chuan sorkarin theihtawp kan him tlan nan a chhuah thu a sawi a. Temporaray ILP pek chungchangah zau taka Mizoram lo lut duh apiang hnenah pek a nih loh tur thu a sawi a. Sorkarin a bik taka a mamawh, lo kal ngei ngei ngai, entirnan khawl rawn siam tur te emaw, Home Department in phalna a pek tawh te tan a ILP issue thei tur a ruat mai a ni, a ti a. Heng ILP issuing authority a ruat te hian an duh thuin ILP an pechhuak theilo a ni.


Vawiin inrawnkhawmnaah hian Assembly House Speaker Pu Lalrinliana Sailo, Health Minister Dr. R. Lalthangliana, Home Minister Pu Lalchamliana, Social Welfare Minister Dr. K. Beichhua, I&PR Minister Pu Lalruatkima, H&FW Board Vice Chairman Dr Z.R. Thiamsanga te telin, Indian Medical Association (IMA), Mizoram Govt. Doctors Association (MGDA) Non- Govt. Hospital Association of Mizoram pawl aiawhte leh MKHC, NGO Coordination Committee, All Mizoram Village Council Association leh Aizawl City Local Council Association aiawhte leh sorkar department a hotu pawimawh te an tel a ni.









(A hnuaia fakna hi lo hmet ve rawh.)

Post a Comment

0 Comments