Aizawl | June 21, 2020: Prime Minister Narendra Modi chuan International Day of Yoga denchhenin video conference hmangin ram tana thuchah a sawi a. Prime Minister chuan International Yoga Day hi remna ni a nih bakah inunauna chawi nunna ni a ni a ti a. COVID-19 vanga khawvel pumin harsatna kan hmachhawn mek avangin kumin International Yoga Day hi electronic leh digital platform hmangin he ni hi kan hmang a ni a ti.
PM Narendra Modi @ International Yoga Day 2019 |
Prime Minister chuan mi tam tak chuan an inchhungah an chhungkua in Yoga an ti ho thih thusawiin Yoga hian inlaichinna tha min thlen sakin min tipumkhat a ni a ti.
Khawvel hmun hrang hrang atang a ‘My Life-My Yoga’ video blogging competition a tel an tam zia atang hian yoga hi a lar chak zia a lang chiang a ni a ti.
Youtube Video:
Youtube Video:
Mipui punkhawmna lamah tellova inchhung lumah mahni chhungkuate nen a yoga tiho tura mipuite chu rawnin kumin thupui hi 'Yoga at Home and Yoga with Family' anih thu a sawi a. PM chuan naupang, thlalai leh chhungkua a kum upa zawkte chuan Yoga an ti hova, hei hian chhungkaw inlaichinna a siamthat mai bakah rilru a ti hrisel a ni a ti.
“Yoga hian taksa a natna dotu a tichak a. Nitinin Pranayama hi ti thin ila. Pranatama Yoga /breathing exercise hian kan respiratory system a ti chak a. Covid 19 virus hian thawkna lam nataka a khawih theih avangin kan hun tawn mekah hian a pawimawh leh zual a ni”, Prime Minister chuan a ti.
Prime Minister chuan Yoga hi inpumkhatna hmanrua anih thusawiin inthliar hranna awm lova mi zawng zawng tih theih anih avangin inlaichinna tha a siam thei a. Hnam, vun rawng, hmeichhia leh mipa, sakhaw zui leh ram ang zawngin tumah a thliar lova. Hriselna leh beiseina thar kan neih kawp theih chuan khawvel a cheng mihringte hian hlimna leh hriselna nen hun kan hmang thei ang a. Yoga hian hemi nei thei tur hian min pui thei a ni a ti.
“Khua leh tui kan nih ho ang a inlungrual taka chhungkua leh khawtlang kan chet chhuah a, ‘Yoga at home and Yoga with family’ hi kan nitin nun a kan seng lut anih chuan kan hlawhtling ngei ang, hnehna kan chang ang” Prime Minister chuan a ti.
- PIB Aizawl
Post a Comment
He post chungchanga i ngaihdan lo sawi ve rawh: