YMA Day a lo thleng leh ta

- K Remruatfela
Columnist, EXPLORE MIZORAM

Zofate insuihkhawmna pawl lian ber, YMA dinchampha chu kan lo thleng leh ta reng mai a. YMA hi Mizoramah chuan NGO pawl lian ber niin Zonun zemawi vawnghimtute an nih avangin pawl zahawm leh ropui ti-a sawi thin pawh a ni.


Chutihlai chuan hnah hlui a lo til a, hnah thar a lo chhuak thin ang hian YMA pawh hian hun inher zelah hian a zia hi a hloh tan tial tial em aw tih theih châng hi a tam thin tawh khawp mai a. Rule of Law nena inkawmserh, mob rule nena inbâttawn ang lek leka lan châng hi a awm leh zeuh thin a, a pawi em em a ni. Tin, kan naupanlai, YMA member kan nih ve hma kha chuan YMA hminga kalkhâwm nikhua emaw YMA Day function nikhuaah te hian kan khuarel hla tha tak tak:-

1. Aw khawvel puan ang a chul tur hi
2. Kan tlang ram par vulna
3. Chite Luipui – Lengi nena luia lengngha kan chhaina
4. Kan sawmfang hmun cham del, thinlai riang min hnem tu (Turnipui kan dodai)
5. E khai! Hlim rawh u, nui rawh u aha!ha!ha!ha!
6. Parmawi tin bawm
7. Mizo kan nih kan lawm e
8. Kan Zotlang ram nuam
9. Lentupui kai vel leh romei chhumin
10.Kum sul vei khua thalin khua a sâng hle tun kum chu,'  tih ang hla leh a kaihhnawih khuarel hla dang tha tak takte hi nula/tlangval, nu leh pa leh upa zawkte chenin tui em emin sir sâwn pahin an sa hup hup thin kha a ni a. YMA member la ni pha ve lo te pawhin an sak atangin leilung mawina kan lo mitthla a, an zinga tel ve kan châk takzet thin a nih kha!

Nimahsela, khawvel lo changkang chho zelah hian heng khuarel hla tha tak takte kha thûl mawngah up bo a ni ta mai nge, YMA hminga mipui punkhâwmnaah meuh pawh hian sak a ni ngai tawh meuh lo va. Thangthar tam zâwk phei chuan a thiam pawh kan thiam hlawm tawh awm lo mang e tih mai tur a ni ta. Heng khuarel hla te ai chuan Kohhran Thalai Conference hlabua hla thar ho te hi kan tuipui zâwk zamah tawh emaw tih theih a ni a, a pawi khawp mai. Chuvangin, he YMA Day vawi 85-na a lo thlen hian Zoram mipui ka chah duh che u chu, heng kan khuarel hla tha tak -  Rokunga, Liandala, PS Chawngthu, Vankhama etc te phuah ho hi up bo hlen mai lovin chawinungtu nih zel tum ila. Kan Zotlâng ram nuam tak mai hi zaiin i han awi hup hup thar leh teh ang u hmiang.
YMA Day chibai vek a che u…

Post a Comment

0 Comments