TOTAL LOCKDOWN 2.0


A chi-ai thang pangngai bawkin chak takin 'total lockdown' (pawn chhuah khap hmak) an rawt leh mek a. Tuna kan dinhmun en hi chuan an thusawi hi tam takin an pawm awm e. Mahse, hei hi kan rama hrileng vanga kan buai mekna chinfelna pawimawh ber a ni hranpa lo. Mizote hi kan fate'n zu an ruih a, inchhunga buaina an siam avanga kan fate hrem ngam mang si lova, kan khaw veng mawng lama hmeithai zu zuar hrem duh leh zu khap duh tlat hnam kan ni a. A harsatna lai tak chinfel aia a behbawm leh a kaihhnawih umzui chiam ching kan ni bawk. Chuvang tak chuan mahni chhungkua leh veng/khua khuahkhirh theih loh ni a hriate'n kan vaia inkharkhip hmak an rawt ta a ni mai thei a sin.

Thlalak: Total Lockdown lai, Aizawl

Tuna kan mamawh ber chu inkhunghranna hmuna awm zawng zawngte reverse transcription polymerase chain reaction (RT-PCR) khawl hmanga endik vek a ni a. Lo haw thleng hmasa Chennai atanga lo hawte pawh an inkhunghranna hun hmang zovin inlamah inkhunghrang tawh mahse dap chhuah a, endik leh vek tur an ni. Chubakah chuan tuna Covid-19 vei an hmuhchhuahte inkhunghranna hmunte leh veng/khuate hi tlawhpawh phal loh tawp hmun (containment area) a puan a, khauh taka vil zui a ngai. 

Hemi chungchangah hian kan Health department hotute leh helama kan mithiam (doctor)-te demna ka nei. Inkharkhip chhunzawm an rawt reng a, a pawimawh reng a. Mizoram chhungah he hripui hi a darh lova, mipuia inkaidarh (community transmission) a awm lo tih pawh hre chiang chung a an fimkhur hi a lawmawm. Mahse, khawvel leh India ram state hrang hrangin Rapid Antibody Test (RAT) rintlak tawk lohzia an sawi fe tawh hnu a, RAT a 'reactive' chauh RT-PCR hmanga an endik kha chu a fel lo hle. Mithiama kan ngaihte hian kan beisei an pha lo tlat mai. Kolasib lam hotute'n RAT kaltlanga 'non-reactive' an endik (RT-PCR hmangin) hnu-ah hri an vei tih hmuhchhuah a nih leh tak si avangin kan heti ta a nih hi.


Chennai atanga lo hawte hi Mizorama RAT hmanga an lo endik chuan vei lo angin an hmu vek a, mahse, thenawm state lamah chutiang a ni si lo. Chuvangin sorkar hi a chet vat a tul a. A lo haw hmasate a umzui leh a contact tracing pawh kimchang thei ang bera tihzui a tul ang. Hei bakah hian RT-PCR bun (install) harsatzia sawi chiamtute khan tunah hian an thusawi kha an la hre reng ang em aw? He khawl hi sorkarin a neih belh tawh a, neih belh zel dawn pawhin a lang a, a lawmawm hle. 

Tam takin tul an ti tih ka hria, mahse total lockdown hi kan harsatna chinfelna atana pawimawh ber chu a ni lo chiang mai a. Keini aia hri kai ngah zawkte pawhin a bial/district anga an kharkhip a 'containment zone'/red zone an siam ang zawnga kan kal hi a fuh zawk mai thei. Nitin eichawp dap, a bikin khawpuia cheng mirethei (urban poor) dinhmun chhe tawh lutuk hi kan rilru-ah riak reng se a pawimawh khawp mai.

Thlalak: Total Lockdown lai, Aizawl
Thlalatu: Armand Malsawmdawngzuala






(A hnuaia fakna hi lo hmet ve rawh.)

1 Comments

He post chungchanga i ngaihdan lo sawi ve rawh:

  1. A dik a ni. Chubak ah puan thut zelai hi chu a huatthlalaawm lutuk. Ni thum vel talin puang advance se kan buai nep deuh tur a nia.

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post