Thorang Bialtu MLA Zodintluanga'n hripui do nan Ambulance hlan; Kan do kan hneh theihna tur chuan Zoram mipuite sawrkar thu leh thuchhuak kan awih a ngai - Zodintluanga

Aizawl | June 12, 2020: Thorang Assembly Constituency bialtu MLA Zodintluanga chuan vawiin khan Lunglei DC leh DLTF on Covid-19 Chairman V Lalsangliana, IAS hnenah Lunglei District mipui hman turin a MLA Fund atanga ruahman Ambulance (Maruti Eeco Van) thar a hlan.



He hunah hian Congress MLA Zodintluanga chuan Lunglei khaw chhunga Village Level Task Force pakua (9) hnenah Community Quarantine Centre a duty-te hman tur PPE, Sanitizer 13 Litres, Disinfectant 65 Litres, Mask 900 leh Glove 450 a hlan bawk.

Lunglei DC Conference Hall-ah thilpek inhlanna inkhawm tawi neihah Zodintluanga chuan, "Kan do kan hneh theihna tur chuan Zoram mipuite sawrkar thu leh thuchhuak kan awih a ngai a, khawtlang hruaitute, VLTF te thu kan awih a ngai bawk a ni. Thu kan awih hi kan ram kan hnam damna tur a ni a. He hri do tur hian Sawrkarin theihtawp a chhuah mek zel a, Sawrkar hotuten Dan an duan hi kan zawma dikna leh rinawmna vawng chungin kan do hi hneh i tum ang u," a ti.

Phai lam atanga lo haw mekte tha taka lo dawngsawng turin Pu Zodintluanga chuan mipuite chahin "Phai lam atangin hnathawk leh zirlaite an lo haw meka, anni hi kanlo dawnsawn thiam a pawimawh. Phaiah rilru hah takin lockdown an lo tuar ve tawha, sawrkar leh phaia kan officer-te leh midang tam tak thahnem ngaihna zarah Mizoram ngeiah an lo thlenga hetah rei tak kan lo khung leh a. Hri an kai dawn nge dawn lo tih reng rengin hun an hmanga nervous breakdown te an neih a hlauhawma hei vang hian kan lo dawnsawn thiam a ngai a ni," a ti.

Covid-19 do kawnga mawhphurhna chelhtu hrang hrang District Level Task Force, Local/Village Level Task Force, NGO, VC leh ramri-a duty mekte leh phal taka tanpuina thawhtu mimal, pawl, Kohhrante chungah lawmthu a sawi a ni.

Lungei DC Pu V. Lalsangliana'n thilpek inhlanna inkhawm hi a kaihruaia "Vawiinah Lunglei District mipui mamawh em em MLA-in min lo pe a, kan lawm hle a ni," a ti. Tin, Southern Gas Agency, Lunglei chuan Lungleia Community Quarantine Centre 21-te hman tur gas an pek theuh tur thu DC hian a puang bawk.

Pu Zodintluanga hian naktukah a bial Lungsen lama Community Quarantine Centre-a mi 45 awm mek enkawltu VLTF te hnenah thilpek a hlan leh bawk ang.

Post a Comment

0 Comments