THE SILENT SOLDIER 'MEDICAL LAB.TECHNICIAN'!

Ni e, Doctor an ni a, damlo enkawltu tur leh an dam theih nan a theih tawp chhuah tura ke pen te an ni a chawimawi leh fak an phu reng a ni. Mahse, kha thil khan ser min siam tlat! 

H Lalramthara

I hrisel nan doctor i rawn a, i natna tidam turin damdawi i ei thin. Nimahsela, i hriat loh thil pakhat a awm, I dam theihna turin i doctor phenah khan i tan rim taka thawktu, Medical Laboratory Technician-te kan awm ve a ni tih hi. Lalpa'n khawpui a vawn that loh chuan, a vengtu chu a meng thlawn mai a ni tih ang deuh khan, Medical Lab-Tech. te hi a kil a lung pawimawh tak an ni.

 

Kan tunlai khawvel thlir chuan COVID 19 avangin ram a buai a, nunphung a danglam a, hlauhna leh thlabarna in hringnun a tuam a, natna tihbaiawm takin hmuhtheih loh lamah min rûn in hliam min hnutchhiah a, thihna hial min thlen ta.

I han thlir kir lawk teh ang. Kan zoram khawvel pawhin COVID 19 rim kan hriat ve tan nî, kha natna tihbaiawm tak hmachhawn tur a kan Pasaltha te an fehchhuah ni kha, a ropui teh e!. Kan mithiam rual, ral hmachhawn tur kan chawimawina thû mawi tak takin social media story, post, comment zawng zawng luahkhatin kan chhuanzia kan pholang chuai chuai anih kha. Khatiang taka zoram mipuite'n a kan mihringpui kan chawimawi leh kan ngaihtuah zia tih lanna kha dam chhung pawh hian a thleng leh tawh lo hial mai thei a ni.

(COVID 19 leng mekah pawh hian hri inkaichhawn hlauhawm tak hmachhawn a, an tan a hlauhawm theih zia hre reng chunga nileng zankhua-a swap test buapuitu chu Lab technician te hi an ni.)

Ram pumin kan dil a, kan ngen a kan tawngtaisak bawk a nih kha. Ni e, Doctor an ni a, damlo enkawltu tur leh an dam theih nan a theih tawp chhuah tura ke pen te an ni a chawimawi leh fak an phu reng a ni. Mahse, kha thil khan ser min siam tlat! 

Fak leh chawimawi kan phut hauh lo. Mahse, kan dinhmun chawikan erawh kan mamawh em em a ni. Chhungkua hlim tur chuan hmangaihna leh inngaihsaktawnna a ngai thin. Nu leh pa in a fate zingah hmangaih bik leh ngaihsak bik a neihin chhungkua an hlim thei ngai lo a, fate zinga tu pawhin a thil tih ve theih tawkah fak a hlawh a hmangaihna a dawn chuan chhungkua an hlim mai thin.




I hrethiam lo em? Ka'n sawi ang e. Ngun takin lo ngaihtuah la, midang tan malsawmna nih ngei lo tum teh.
A ruh lang in ka'n sawi law law teh ang. Doctor te leh damdawiin in enkawlna thleng hian Lab.Technician te hian pawimawhna thuk tak kan nei a nia. Damlo kan enkawl thei lova, damdawi kan chawh thei hek lo. Nimahsela, Eng natna hrikin nge tibuai, eng tianga enkawl tur nge tih leh eng damdawi hmanga enkawl tur nge i nih tih te, i thih leh i dam thleng hian Lab.Technician te kutah thui tak a in nghat a nia aw! Natna an hmuchhuah tam tak kha Doctor-te ni lovin Lab.Technician te'n ngun taka an zi chian hnu a an hmuh zuk ni tlat a. 

Eng nge i thlakchham, i taksa in eng nge a mawmawh, i englai nge dik lo a engvanga na nge i nih tih doctor ten an hriat theih nan Medical Laboratory-ah Technician te hian in damna duh in theihtawp kan lo chhuah ve thin a sin. Nunna hlu tak ti dam turin Medical Technician te hi an pawimawh ang bawkin nunna hlu tak chan nan Medical Technician te hian mawh thui tak kan phur ve bawk tihna a nih chu. Chuvang chuan, kan inthlahdah a thiang ve lova, tihpalh thilthu-a chhiarkawp pakhat lek tih dik loh avang leh Chemical tereuhte pawlh tam emaw tlem emaw avang lek pawh a diklo awm thei a nih avang hian a hahthlakin fimkhur ngai em em thin a ni. Khaw lum vang ni hauh lovin thlan fim a dir ve thin!


 

Hetiang taka fimkhur a tul avang hian thiamna neih a ngai a, chu thiamna nei tur chuan cheng nuaih fe seng a zir ve a ngai bawk. Ram danga an zir dan erawh ka hrelo na in a tlangpuiin Mizoram-ah chuan DIPLOMA IN MEDICAL LABORATORY thiamna chauh nei tur pawhin kum 3 lai zir a ngai nghe nghe a ni. Chutiang anih laiin science background nei lo tan phei chuan thiam tak a zirchhuak tur chuan a tum a tum ve fe a la ngai cheu.

Hetiang taka pawimawh leh zir hautak ni si hi kan thawh hlawh erawh eng tham a ni si lo hi kan lai a na ve thin tih hi min lo hriatpui mawlh teh u. Sawrkar-ah luh vek theih ni hek lo le, Private ah thla khatah cheng sangli nga bawr vel lekin in tan thahnemngai takin kan lo thawk ve lawp lawp thin a nia aw.! Cheng singkhat lai thawk chhuak ve tur chuan kum tam fe (thawh rei a ngai teh mai a nia) thawh a ngaih loh vek pawh in vanneih viau a ngai tih hi ka sawi sual loh pawh in a teuh ther ther viau ang.

In tan Vai pathian thawh hma in kan tho a, ni tla pawn thui fe min liamsan hman tawh ang tih velah mahni in lum kan rap ve thei chauh thin. Thlan chhuak bawrh bawrh a thawk ni lo mahila, zan erawh mut a tui viau thin ti ila min hriatthiampui em ang chu!


 

Mi neinung tak tan chuan thil harsa engmah a awm lo tih chu tupawhin hrilh ngailo a hriat sa a ni a, nimahsela he hna thawk tur a zir tam tak hi neihthinglung khawnga zir ve tak meuh meuh kan ni si a, thing delh loh lung delhlo ni ta fam chu hun a liam a, kum a liam a engtin nge chhungkua ka chawm ve tak ang tiin rilru hahtak leh beidawng taka innngaihtuah lungpuam chang a tam thin. A hna hahthlakzia leh a pawimawhna ngaihtuahin kan lawmman hian kan mamawh min phuhru zo lo a ni ber mai tih hi a tawp nan ka'n thai lang hram a nge.

Kum te lo veiin hun te pawh a ral ve zel anga, hei aia dinhmun tha zawka din hun kan la nei ve em ang chu tih hi in damna tur leh in lo hrisel theihnan a a langlo lama lo buai ve em em thin tu te duhthusam a ni reng ang. I damna leh i hriselna atan a kawng lo su tu pawimawh tak tak te zinga mi kan nih ve na hi min theinghilh sak lo ula, THE SILENT SOLDIER, LABORATORY TECHNICIAN tiin kei ni hi min lo hre ve reng thin rawh u aw!


 

(COVID 19 leng mekah pawh hian hri inkaichhawn hlauhawm tak hmachhawn a, an tan a hlauhawm theih zia hre reng chunga nileng zankhua-a swap test buapuitu chu Lab technician te hi an ni.)









(A hnuaia fakna hi lo hmet ve rawh.)

Post a Comment

2 Comments

  1. A dik khawp mai,lab.technician te pawimawhna hi an hrelo fo thin

    ReplyDelete
  2. Your article is very informative and useful for those who are interested to keep updating . Medical Technician jobs

    ReplyDelete

He post chungchanga i ngaihdan lo sawi ve rawh: