State Level NSS Advisory Committee thukhawm; College 2 leh HSS 3 ah NSS din remti

Aizawl | June 17, 2020: State Level National Service Scheme (NSS) Advisory Committee Meeting vawi 16-na vawina Sports & Youth Service minister Robert Romawia Royte hova neih chuan College pahnih' St. Xavier College Lengpui leh Helen Lowry College, Aizawl leh HSS 3 ah NSS din an remti.



Minister Pu Robert Romawia Royte chuan sports hmasawnna bakah thalaite hmakhua leh hmasawnna ngaihtuah chu Sports & Youth Services Department mawhphurhna a ni a ti a. Hun rei tak Department chhungah pawh Youth Services lamin ngaihthah a hlawh tih sawiin, tun atang chuan theihtawp chhuaha tanlak a tul thu a sawi a. Minister chuan Mizoram NSS a thawktute leh Zirna in hrang hranga NSS Programme Officers te leh Volunteers te hmalak dan leh hnathawh chu India ram huap pawha chhuan tlak a nih thusawiin Mizoram tlawmngai pawl thisen pe thinte zinga thisen pe tam ber nihna a kum zawna a la chu Department tan pawh inchhuanna tur tha a ni a ti. NSS volunteer ten mi dangte tana thisen pek an intihhmuh a, an uar zel theih nan 'Sports Minister Trophy for Blood Donation' siam tura rel niin, Higher Secondary School level tan Trophy leh Tangkafai cheng nuai khat leh College & University level tan Trophy leh tangkafai cheng nuai khat lawmman siam ni se an ti.

He meeting-ah hian NSS-in kum 2019-2020 chhunga a hna thawhte an thlirlet a, chumi hnuah kum 2020-2021 chhunga NSS hmalakna turte sawiho a ni bawk.

ICT Minister ni bawk Pu Romawia Royte chuan Thalaiten thil tha leh nun atana hlawkpui tur an zira an tihna hmun tur changkang tak 'Zoram Youth Centre' chu Externally Aided Project(EAP) sum hmanga din tura hmalak a nih tur thu a sawi.

Dr. Zirlianngura State NSS Officer cum Deputy Secretary NSS Cell Mizoram chuan kum 2019 chhunga NSS hmalakna report pein Voluntary Blood donation camp vawi 65 neiin thisen unit 5676 pek a nih thu te, NSS chu a zawna kum hnih 2018 leh 2019 thisen pe hnem ber lawmman pakhatna an dawng thu te, thing tiak 2910 lai an phun thar thu te, Mizoram chhungah mipui vantlang hman turin Zunin – 12 nos, Public water point – 8 nos, Waiting shed – 7 nos, Public bathroom – 2 nos leh Public benches – 7 nos an siam thu te leh faina hnatlang beihpui vawi tam tak an neih thu te, India ram chhung leh ram pawnah programme pawimawh National Integration Camp, National Youth Festival, Tribal Youth Exchange Programme neih a nih thu te tar lan a ni.

Kum 2020-2021 atana NSS hmalakna tur hrang hrang remtihte:

1) NSS unit hrang hrangte tan Action plan- thisen an pek zat tur, thing a phun tur zat, awareness programme chi hrang hrang an siam zat leh India sorkarin ni pawimawh (Important days) a tih ho observe tur chi hrang hrang te pawh sawiho niin remtih a ni.

2) NSS Advisory meeting hian kum 2020-2021 atanga college pahnih St. Xavier College Lengpui leh Helen Lowry College, Aizawlah te NSS hawn a remti.

3) Higher Secondary School pathum - Suangpuilawn, Khawhai leh Sairang HSS-ah te pawh NSS hawn an remti bawk. Hengte nen hian Mizoram pumah NSS neihna Institution hi 90 lai a awm dawn ta a ni.

4) State Level NSS Award chu NSS Programme Officer leh Volunteer pakhat ve ve tan pek tura ruahman remtih a ni.

5). Kum 2020-2021 atana NSS theme atan 'Water and Conservation' tih chu pawm a ni bawk.

He hunah hian Minister Pu Robert Romawia Royte hian NSS Directory 2020 chu a tlangzarh nghal bawk a ni.

Vawiin vek hian National Insfrastructure Pipeline scheme hnuaia Sports Infrastructure Projects siam dan tur te sawi hovin Sport Minister Pu Robert Romawia Royte office-ah Sports Department officers meeting neih zui a ni a.

He thutkhawmah hian Sports Minister Pu Robert Romawia Royte chuan India rama Khelo India Centre of Exellence pariat(8) dinna tur thlan chhuah zingah Aizawl chu a tel ve thu a sawi a, Union Minister Pu Kiren Rijiju leh Central sorkarin Mizoram a ngai pawimawh chu lawmthu sawiin Zoram infiammi te tan hmasawnna nasa tak a thlen ngei a rin thu a sawi.

He meeting-ah hian National Infrastructure Pipeline scheme hnuaia Sports Infrastructure Projects hrang hrangte leh Externally Aided Project atanga hna kalpui dan turte an sawi a ni.

Post a Comment

0 Comments