Serchhip | June 4, 2020: Hmuntha khaw Village council president C Malsawmdawngkima chuan Village Council te huaihawta an khaw mipuite thawhkhawm thlai thar chi hrang tam tak, tuah Thing engemawzat leh pawisa fai Rs. 500 chu Serchhip District chhunga khunghran mekte tan vawiin khan Serchhip Bawrhsap Dr. Lalzirmawia Chhangte, IAS kutah a hlan.
He thilpek hlanna hun tawi hi DC Office tualah buatsaih a ni a, he hunah hian Bawrhsap Dr. Lalzirmawia Chhangte chuan, kan unau phai atanga rawn haw te hi zo chawhmeh rei tak hmu tawh lote an ni hlawm a. Chuvang chuan Mizo chawhmeh hi an tan a hlu bik hle ang tih a rin theih a, a tharlam bawk si a, a lawmawm hle a ni, a ti a. Hetianga sawrkar tanpuia, kan unaute duhsakna thinlung neia Hmuntha khuate an rawn luang chhuak hi ka lawm tak zet a ni, tiin Hmuntha khaw mipuite chungah lawmthu a sawi a ni.
Bawrhsap Dr. Lalzirmawia Chhangte hi Addl. DC Pu HD Lalpekmawia leh DC Office a thawk official pawimawh ten an tawiawm a, vawiin hian Quarantine Centre ah te semdarh nghal a ni ang.
Pu C. Malsawmdawngkima chuan an thil rawn hlan te report a pe a, Antam tel, Phuihnam, Maian, Zikhlum chang chawr, Sawhthing, Hmarcha ro leh hring, Buhfai kg 50, Zopurun, Chingit, Bawkbawn, Sawhthing mothar, Hmarchapui, Japan Zawngtah, Thingfak 207 trip khat leh pawisa fai Rs. 500 te a ni a. A hlan tur hian VCP leh VC member Pi K. Lalrinpuii leh midang pasarih an rawn kal a. Truck in an rawn thlen a ni.
Post a Comment
He post chungchanga i ngaihdan lo sawi ve rawh: