Saruak Sakruang

“Kan la thi ngei dawn a ni tih hriatna hian engemaw chan tur nei nia inhriatna min pumpelh tir a, saruak kan nihzia a tichiang a ni”

– Steve Jobs (Harvard Commencement Speech, 2005)

Ziaktu: Ruata Royte

Thihna hi a thleng fo a, a chang chuan kan chhungte, a changin kan thian emaw kan hmelhriat te mai bakah kan hmelhriat loh chenin an thi a. Amaherawhchu keimahni ngei pawh hi kan la thi dawn a ni tih hi chu ring mah ila a tak a thleng ve ngei tur a pawm hi a har fo mai.

Kei ngei pawh hi engtikah emaw chuan ka la thi ve ngei ang tih ngaihtuahna hian ‘saruak’ ka nihzia hi min hriatchhuahtir fo. Amah Joba bawk khan a lo hmu chiang a ni – saruak in kan piang a, saruak vekin kan kir dawn a ni tih hi. Hei hi thihna hmachhawn tur a damlai ni chhiar dan min zirtirtu pawimawh tak a ni lawi si.

He khawvel inkhairuallo takah hian thihna hian mitin min khairual a, thihna kotlangah chuan leiropuina hi hlihin a awm a, thihna chuan he leiropuina thuam ata hi ‘saruak’ kan nihzia min la hriattir ve dawn a ni.

Chumi hunah chuan he’ng pawn lam thil, ropuina te, chapona te, pawnlam mawina tinreng te hi hlihin a awm ang. Lal Solomona meuh pawh kha a lei ropuina thuam tinrenga a inthuam pawh khan ‘ tuktinpar pakhat tluk pawhin cheiin a awm lo’ a nih si chuan kei hi ka va han saruak chiang dawn em.

“Van hla mawi chu sain,

Vanropuina hain,

Tlantu tawka lawm avanga bianga mittui tlain,

An zain an lut ta a rangkachak khawpuimawiah”

-Murphy

He saruak sakruang, lei ropuina thuam tinreng a tuam mawi chawp thin hi thihnain a hlih hunah chuan a khawngaih ban a min kuangkuah a, vanropuina thuam a tuammawi a nih hunah chuan saruak nih ka bang tawh thung ang.

“Dam reng tur a boral damlai nun chu ka tan tahna”

– Vincy Chhangte

Ringtute kan innghahna leh danglamna chu hei hi a ni. Thi tur a nung mah ni ila, chatuan a nung tawh turin kan thi dawn si. Thihna hi a tawpna tur a ni lo a ni. Dam reng tawh tura damloh thinna damlai nunah hian hrehawmna leh harsatna te tawk thin mah ila, he’ng pawh hi tihbanin a la awm ang. He’ng te hi a ni lei ropuina te hian saruak ka nihzia min hriattir a vanropuina hak min chaktir thin ni.

Saruak nihzia inhriatna hian vanropuina thuam hak min thahleltir mah se tisa khawvela chen chhung hi zawngin lei ropuina hi inkhuhmawina leh inkhuhlumna atan a thlang awl bik si lo.

Ka la thi ve ngei dawn a ni tih hriatna hian saruak ka nihzia min hriattir fo a, lei ropuina thuam te hi a dawrawm leh themlemzia min hriattir a, vanropuina hak hunah a lem hi hlipin a tak a khuhmawi nih hun tur chu min chaktir a, a kim lo a kan hriat hi a kimin kan hre tawh ang a, a khawngaihna avang chauhin he leiropuina hi hlipin vanropuina sintir ka ni tawh ang.

Kan la thi ve ngei dawn a ni tih inhriatna hian saruak kan nihzia min hriat nawn tir fo se, Amah  Shakespeare bawkin ” Hmangaihna leh hmingthanna te pawh an pil bo vawng vawngna ” a lo tih hial, thihna kotlangah chuan he leiropuina te hi chu an thlawk bo ang a, chumi hunah chuan he lei ropuina hmang a kan lo inthliara kan in diriam thinna te, kan inchungtlak a kan intih mitak ve thinna te hi a dawrawmzia kan la hria ang. Thihna hmaah mai nilo, Pathian lakah hian saruak mai kan lo ni si.