Aizawl | June 2, 2020: Hauva & Sons, Zawlbuk Tuizem neitu ni bawk Thantluanga, Kanan Veng chuan vawiin khan Health minister Dr R Lalthangliana hnenah COVID-19 swab test nana Real Time Polymerase Chain Reaction (RT- PCR) khawl leina tur Cheng Nuai Sawmhnih Pakhat (Rs. 21 lakh) a pe.
Pu Thantluanga aiawhin a fapa Pu Zodinpuia'n Minister chamber-ah a hlan a ni.
Minister chuan hun khirh tak karah midangte tana malsawmna ni tura mimal an rawn pen chhuak chu lawmawm a ti a, a let tam takin Pathianin malsawm se, a tih thu sawiin, ni rei lutuk lo chhungin khawl thar hi neih a ni ang, tiin a sawi.
Health Secretary pawhin thu sawiin Health Minister hmalakna in ICMR atangin RT-PCR khawl neih belh a nih dawn bakah National Health Mission-a sum dawn atangin ni 10 vel chhungin RT-PCR neih belh a ni bawk ang, tiin a sawi.
He hunah hian Green Pharma, Lunglei Civil Hospital Canteen te'n COVID-19 do nana hman tur Hand Sanitizer (100ml) bur 1210 Minister hnenah hian an hlan nghal bawk a ni.
Minister hi COVID-19 Medical Operational Team Chairman Dr. ZR Thiamsanga leh midangten an tawiawm a ni.
Post a Comment
He post chungchanga i ngaihdan lo sawi ve rawh: