Quarantine-a awm ten mipui tichiai thei thil thehdarh khap

Kolasib | June 6, 2020: Kolasib bawrhsap Dr Lalthlangliana chuan nimin khan Quarantine-a awm ten mipui tichiai thei thil thehdarh khapna thupek a chhuah a. Pawn lam atanga a bika ei tur inpek pawh phal a ni lo.

 

He thupek hi Kolasib District chhunga sawrkar Quarantine Facility Centre-a thawktu leh awm zawng zawng te hriat tur leh zawm tur a ni.

Thupek chuan, "Quarantine-a awm ten mipui tichiaia, rilru leh ngaihtuahna hruai kawi thei thil heng- thlalak, video leh thu te hi Social Media lamah theh darh phal a ni lo. Hetiang tilui an awm chuan Quarantine Centre an chhuahsan hnuah dan angin an chungah hremna lek kawh a ni ang." a ti a.

Heng bakah hian Ruihhlo lakluh khapin, pawnlam atangin a bika ei leh in tur inpek pawh phal a ni lo.

 

Thupek chu:
1. Quarantine Facility-a awm mekte zingah complain emaw harsatna nei an awm
chuan mahni Room No. chiang taka tar langin, Security Duty-te hnenah emaw Phone-in (Whatapps hmangin) emaw sawi thin tur a ni.
2. Mi inphalte leh mi tlawmngaite hnen atanga sum leh pai dawn khawm atangin ni tin ei tur (Special Snack) dar 2:00-3:00 P.M inkarah sem thin a ni ang.
3. Quarantine Sanitation Team din a ni ang a, anni hian ni tin bawlhhlawh an la khawm thin ang. Quarantine a awm ten mahni gate emaw kawngkapui bulah mahni bawlhhlawh dah chhuah thin tur a ni.
4. Chaw ei ningnawi tu mahin lak khawm phal a ni lo.
5. Doctor in-charge ten ni tin Quarantine Centre an tlawh thin ang. Dam lohna thilah engtik lai pawhin biak theih an ni ang.
6. Quarantine-a awm ten mipui tichiaia, rilru leh ngaihtuahna hruai kawi thei thil heng- thlalak, video leh thu te hi Social Media lamah theh darh phal a ni lo. Hetiang tilui an awm chuan Quarantine Centre an chhuahsan hnuah dan angin an chungah hremna lek kawh a ni ang.
7. Quarantine Centre chhungah ruihhlo leh a kaihhnawih eng chi mah lak luh phal a ni lo. Hetiang thil man chhuah a nih chuan dan angin an chungah hma lak a ni ang.
8. Pawn lam atangin a bika ei leh in tur inpek phal a ni lo.
9. Quarantine Centre Attendant ruat a ni a, ani hian ni tin darkar 24 chhung a vil thin dawn a ni.
10. Quarantine Management Team din a ni a, anni hian Quarantine-a awm te chungchangah District Administration an puibawm thin ang.

Post a Comment

0 Comments