Aizawl | June 22, 2020: Miss Colombia 2011 leh Miss Universe 2012 a Colombia aiawhtu Daniella Alvarez (32) chu Ischemia natna avangin a ke vei laman tan thu June 20 khan instagram kaltlangin a puang ta rup mai!
He thu hian a fans mai bakah khawvel mipui te a thawng hle a, a thutlukna avang hian huaisen an tiin an fak hle bawk.
Miss Colombia 2011, UNICEF Ambassador, TV Host, Businesswomen, Colombian model leh ama puala Boutique nei bawk Daniella Alvarez hi 1988, May 24 khan Barranquilla, Colombia ah alo piang a. Hmeichhe fing leh thluak tha tak a ni a kum 2011 khan Miss Colombia atan thlan a ni a, 2012 khan Miss Universe thlanna-ah Colombia ram aiawhin a tel nghe nghe a ni.
Miss Colombia hlui hian Ischemia (taksa peng thenkhata thisen mamawh tawk an dawn loh) natna a vei avangin, Doctor te'n a ke in hna a thawh tawh loh thu leh tan a ngaih thu an hrilh a ni.
Alvarez chuan, "ka thisen zamah diklo an hmuchhuak a, chu chuan ka ke ah thisen a ti kal thei tawh lo a, pangngai takin ka ke ka hmang thei tawh dawn lo a ni. Inzai tawpna ber tur ka hmachhawn leh anga, ka ke pawh ke lem nen a inmil thei turin an zai bawk ang " tiin a sawi a ni.
"A tirah chuan ka pum-ah bawk a awm avangin inzaina hote hmachhawn tur ka ni a, mahse doctor ten ka natna hi hmu chhuak in ka artery in hna a thawh that loh thu leh ka nunna atan pawha a hlauhawm thu min lo hrilh ta zawk a" a ti a.
Thutlukna siam harsa tak ni mahse huaisen takin a hmachhawn a, "ke hnathawk tawh lo neih ai chuan ke lem vuah chu ka thlang ta zawk a ni" a ti.
Inzai na chu hlawhtling takin kalpui a ni a, Alvarez chuan, "A hma ang bawkin ka taksa hi ka la hmangaih a, khawvel a ka la awm ve ringawt te leh harsatna hmachhawn theia ka la dam hi ka lawm a. Pathian puihna in engkim ka tithei a ni. Thla (wings ) ka neih laiin eng vangin nge ka ke chu ka la mamawh reng ang?" tiin a ke an tan hnuah a sawi nghe nghe.
Miss Colombia 2011 hian instagram lamah ICU a a awm lai te leh ke lem a vuah lai te a post nual a, hetah pawh hian hlim hmel a pu sang thei reng a ni.
Columnist, EXPLORE MIZORAM
Post a Comment
He post chungchanga i ngaihdan lo sawi ve rawh: