Lady Diana lem chang turin Kristen Stewart

Aizawl | June 21, 2020: Lady Diana tia hriatlar, Princess Diana leh Prince Charles te inthen dan chungchang tarlanna film 'Spencer' siam turah Princess Diana lema chang turin Twilight star Kristen Stewart chu thlan a ni.
 
'Spencer ' hi Kum 2021 atanga shoot tan tura ruahman a ni a, Steven Knight a ziah niin director lar leh hlawhtling tak Pablo Larraìn a direct tur a ni nghe nghe.

Kumpinu mo duhawm Diana, Princess of Wales hi Diana Frances Spencer tih hming puin 1 July 1961 khan a lo piang a,  31 August 1997 khan car accident ah a boral. Diana hi Prince of Wales Charles nupui niin,St Paul's Cathedral-ah 29 July 1981 khan an innei.


 

Diana leh Charles hi November 1977  khan Diana kum 16 chauh a nih laiin an intawng a. 1981 February 24 khan an inhual a, July ah an innei ta a ni. Diana hian fapa pahnih,  Prince William (1982), Prince Harry (1984) te a hring a. Mahse, Kum 5 chuang an inneih hnu chuan kum 13 dawna inthlau an nihna chu a rawn lang tan ta a. An inkarah buaina hrang hrang vangin a pasal Prince of Wales Charles nen an inthen ta a ni. Diana hi vantlang tan a inhmang nasa hle a, HIV, Cancer leh natna hrang hrang veite tan a thawk nasa a, mipui lawm leh ngainat a hlawh hle a ni.


 

A thih nia khang hun laia British Prime Minister Tony Blair 'the People's Princess' tia a koh hial lema chang tur hian mipuiin an duhtui hle a,  Princess Diana lemah Kristen Stewart a chan tur thu puan chhuah a nih rual rual khan sawiselna leh huatna a dawng nasa nghal hle a. British mite chuan British nula thlang lova American nula an thlang daih chu hrethiam lovin British actress Emma Watson in he role hi chang se a inhmeh zawk tur thu an sawi nghe nghe.


 

"Diana kha mi changkang leh nalh tak a ni a Kristen ve thung chu a letling thawk chuvang chuan he role hi a inhmeh hlawl lo" tih te in an sawisel a, pakhat phei chuan, "Stewart in he film hi a chan loh nan petition thehlut ang u" tih te in na tak takin an sawisel a ni.


 

Leslie Carroll "Diana and Charles: Royal Affairs and Notorious Royal Marriages"
tih Lehkhabu ziaktu chuan Twilight leh Charlie's Angels star thlavang hi rawn hauh nghal in, "Diana chezia leh nundan te, a aw thlengin hnehsawh taka a chan chhuah theih chuan khawia piang nge a nih tih a pawimawh lo" tiin sawisel tute chu a chhanglet a ni.


 

Kristen Stewart hi bisexual (mipa leh hmeichhia kawp ve ve thei) a nih mai bakah nung ho viau mahse Princess Diana lema chang tur hian a tling tawk a ni chek aniang chu 'Spencer' director Pablo Larraîn chuan, "Stewart hi actress tha tak a ni a, he film hi a hlawhtlin dawn chuan he film ina a mamawh em em thil mak a thlen angai a ni" a ti ve tlat.

Kristen Stewart hian Princess Diana lem hi hnehsawh takin a chhan theih i ring ve em?

- Remruati Bawitlung
Columnist, EXPLORE MIZORAM

Post a Comment

0 Comments