KHUANG VUAK DÂN

- K Remruatfela
Columnist, EXPLORE MIZORAM

Mi thiam zâwk tena an sawi fo thin angin Zofate hi hnam a zawnga zâi uar hnam leh inkhâwm uar bera sawi theih kan ni a. Mi 2/3 kan pun khâwm lêt lêt tawh hi chuan zâi a chawh nghal tawh mai thin. Chûng kan han zâi nikhuaa hmanraw pawimawh ber, a serh zinga mei ang an tih hial chu *Khuang* hi a ni awm e. Pathian biak inkhâwmaah te hian Khuang vuak dân hian inkhawm boruak thui tak a ken tel avangin tun tumah hian Kristian Hlabu bik thlûrbingin Khuang vuak dân tha nia kan hriatte kan lo chhui chho dâwn a ni.

Pathian biak Inkhâwmna hmun hrang hranga kan zâi hi ngun takin ka lo chîk ve thin a, Khuangpu tha leh tha lo inkâr lo zau zia leh inkhawm boruak thlenga nghawng a neih dan ka hriat chian phah nasa hle! Khuangpu thiam takin Khuang an vuak deuh dap dap hi chuan zâi a nuamin inkhâwm boruak pawh a zahawm bik em em a; chutihlaia a hla mood leh a thlûk mila Khuangpui vuak dân tur tâwk teh thiam lo ten Khuang an han vuak hi chuan kan zâi hi a bâi ru tlat zel a, duh angin a hla mood ah a chên tak tak theih loh phah thin! A chhan chu hla reng reng hi uluk taka remkhâwm vek niin hla phuahtu chi hran hranin mood hran hran neia an phuah a ni hlawm a. A phuahtu mood anga zâi ho thup thup thei tur chuan a bik takin Khuangpu te hi a boruakah an chèn a pawimawh hle a, chu chuan Khuang vuak ran leh muan bâkah a vuak rin leh zawih dân tur tâwkah pawh nasa takin kawngro a su a ni.

Sawi tawh angin tun tumah chuan Kristian Hlabua hla te _(Thalai leh Naupang hla bik tel lovin)_ hi han luhchilh hrih phawt ila, a tul a nih chuan fakna hla dangah te pawh kan la kai lût zêl dawn nia. Kristian Hlabua hla te hi a tlângpuiin a thlûk a zirin hlawm lian deuh deuh pathum – Largo, Allegro leh Moderato-ah then theih a ni a. Chûng chu a mal malin ti hian han umzui ila:-

*(i). Largo:* Largo tih chu *‘Muang leh nghet’* tihna satliah mai a ni a. Kristian Hlabua Largo category-a awm ni-a ka hriat, keima thua ka dahte chu – KHB. No. 1, 203, 255, 370, 270, 181, 206,  184, 59,351, 375, 384, 354, 375, 446, 445, 266, 596, 424, 197, 69, 187, 261, 258, 185, 368, 459, 407, 26, 316, 283, 393, 39, 324, 372, 154, 28, 176, 373, 499, 300, 344, 406, 279, 135, 587, 66, 155, 428, 292, 596, 599 etc te hi an ni.

Heng hla te hi kan sa dâwn a nih reng reng chuan muang, urhsun, leh fân deuh raiha bul tan thin tur a ni a. Khuangpuin a tir châng tlar khatna vêl a lâk tantirhin  muangchâng dul raih, nêm takin Khuang a vaw tan ang a, tichuan tlar hnihna vêl atangin a vuak dân tur pangngai, a hma mi aia tlêma rang leh ring chho hretin urhsun takin zâi boruak a kengkawh thin tur a ni. Heng hlate hi muang fân raiha sak ho dap dap chi, kut ben chiam chiam chi lohna hla vek a nih vangin duhthusamah chuan Drums, Bass Guitar leh musical instrument dang hi tel lo hram se, Keyboard ah pawh a ri fan riai riai chi tihrîk hram hram a tha. A awmzia chu fellowship leh zâikhâwm hup hupna hun ai maha, Worship service khûnkhân huna sak chi ber zâwk a ni tihna a nih chu! Tin, Khuangpuin a bul tan dan ang bawk khân a châng tâwp tlar chu a titâwp leh tur a ni. Chûng bâka Khuangpu ten an hriat leh atana pawimawh em em chu heng hla kan sak lai reng reng chuan Khuang ri hi a ring lutuk tur a ni lova, muang ban chatin an vaw  thâwm deuh thlup thlup tur a ni. Chu chuan zâi boruak thui takin a keng.


*(ii) Allegro:* 'Allegro' tih chu Largo opposite chiahin *“Harh leh nung takin”* tihna a ni thung a. Kristian Hlabua Allegro category-a awm tur ni-a ka hriat hlawmte chu - KHB No.146, 136, 168, 63, 419, 429, 165, 475, 68, 433, 189, 177, 461, 149, 309, 338, 239, 404, 48, 67, 398, 417, 262, 334, 359, 524, 494, 484, 525, 383, 242, 414, 395, 334, 290, 355,  402 etc te hi an ni.  

Heng hla ho te hi chu nung tak leh khawng tak sak hup hup chi hla an nih avangin Worship Service khûnkhân hun ai maha fellowship leh zâikhawm huna sak hup hup atana inhmeh leh em em thung an ni.  Musical insrument ri thei zawng zawng nen, kut bênga, insâwi dual dual paha zâi pui vak vak nana hla inhmeh tak tak vek te an ni hlawm. A lâk dan turah pawh Khuangpuin a tir phat atangin nung vatin bul a han tan nghal tur a ni a, chu chuan a lo zâwm tu tur mipuite pawh nasa takin a hla boruakah a chên tir nghal thei ang. Khuangpu ten an hriat reng tur chu heng 'Allegro' hla kan sak lai reng reng chuan Khuang hi kan vaw sawt deuh titih tur a ni a, Khuang kan zuk vuak khân kan kut kha a rawn pump lêt tur a ni. Tin, fellowship leh zâikhâwmna hun angah phei hi chuan zâi boruak a that phawt chuan Khuang vuak speed leh rin zâwng pawh tih sân chhoh hret hret a pawi reng reng lo. Tha leh zung zawng zawng sênga tha tawpa insanmarna chi a ni ber e.


*(iii) Moderato:* 'Moderato' tih chu *'a laihâwl'* tihna a ni a. Kan hriatthiam theih dân turah chuan Largo leh Allergo inkar hi a ni. Allergo leh Largo in a huam loh zawng chu 'Moderato' tih hian a huam thei vek mai a. Amaherawhchu, heng zinga tarlan tul zual bik ni-a ka hriatte chu - Kristian Hlabua No. 487, 333, 257, 18, 411, 243, 260, 502, 467, 386, 425, 138, 60, 495, 245, 75, 397, 440, 432, 133, 286, 72, 360, 145, 345, 53, 196, 402, 501, 415, 315, 163, 339, 439, 278, 57, 329, 275, 262, 158,487 etc, te hi an ni.

Moderato huam chhûnga ka rawn târlan deuh bikte khi chu a hma mi te anga hetianga sak tur niin, hetianga vuak zâwk tur hi a ni ti-a sawi lâwk vak theih pawh a ni chiah lova. Inkhawm boruak a zira innghat a ni deuh ber. A tlângpuiin heng hla hi chu inkhawm boruak a zirin tlema muang deuh leh zàwi deuh emaw, tlêma nung deuh leh ring deuh emaw pawha sak theih vek tho a ni. Khuangpu thuneihna ah a innghat thui hle. Nimahsela, heng hla sak nikhua takah hian Khuangpu tha leh tha lo a hriat theih thin. Khuangpu tha chuan inkhawm boruak thlirin a in _adjust_ zung zung tur a ni a. Chuti ni lova, inkhâwm boruak thlir lova, muang tak emaw rang tak emawa hla lo lâk khan inkhâwm boruak thui takin a ti chhe thei a ni. Moderato' hla ho hi chu Musical Instrument chikima sak rem vek an ni.

Heng a chunga ka rawn târlante khi Khuangpute hian kan zir chiana, Kristian Hlabu târlan ho te phei khi chu kan chîk a pawimawh hle. Hla reng reng hi kan sak dâwnin a vuakah ngawt en lovin a phuahtu rilru leh boruakah kan chên hmasak a pawimawh em em a, chutianga chéng hmasa thei tur chuan kan lo inbuatsaih nasat pawh a ngai takzet a ni. *Rev PD Sena* khân hman kum khân *'Hla leh a Phuahtute'* tih lehkhabu tha tak a lo ti chhuak tawh a. Khuangpu te mai ni lovin, Kohhran mipui zawng zawngte hian leiin chhiar vek thei ila a duhawm hle. Thinlung leh tihtakzeta Pathian fak leh chawimawi hi ringtu tena kan tih mâkmawh liau liau a ni si a.






(A hnuaia fakna hi lo hmet ve rawh.)

Post a Comment

0 Comments