Aizawl | June 16, 2020: Khawzawl District-a Quarantine Centre 16 zinga awm tamna ber JNV-a mi 50 awm zing atangin mi 26 te chuan hripui vanga khunghran an nih hun chhung hmang zovin nimin khan Quarantine Centre an chhuahsan a, he centre-ah hian mi dang 24 an la chambang thung.
Nimin-a chhuakte hi mipa 8 leh hmeichhia 18 an ni a, heti hian Khawzawl District chhung-a Quarantine Centre 16 leh Isolation centre 1 ah mi 168 an la awm mek a ni.
Kal chhuak turte thlahna hun tawi hmanah Khawzawl Bawrhsap H Lianzela chuan khunghran an nih chhunga thuawih taka hun an hman avangin lawmthu a hrilh a, an khua-a an haw hunah pawh mi dangte zirtirtu ni theuh tur leh he hripui dona kawnga mahni phak tawka lo tang ve theuh tur te, khunghran an nih chhunga anmahni enkawlna kawngah duhthusam lo thil awm te hre reng lo tur te leh sawrkar leh khawtlang hruaitute tha tichak tu nih tum theuh turin a chah bawk.
Post a Comment
He post chungchanga i ngaihdan lo sawi ve rawh: