Aizawl | June 10, 2020: Kumin January - May thla chhung khan private equity, realty sector atan sum lut chu 93% in a tla hniam hman a a hlutna pawh $ 238 million a ni.
January - March Q4 chhunga Sorkar chhiah khawn pun hun țhat lai ber leh Indian economy hniam siam țhatna hun inher chhuak dawn chiah ngaih anih laiin hri pui lengin duh loh lamah chung zawng zawng chu a lenbo zo a. Mahse India ramin thawh kan zai a rel a ni tih, a lo lang țan leh ta det det e.
India in ram pum huap inkharkhip hun rei tak a kalpui hnua a inphelh thawl hnu hian Indian Stock market a ram dang sumdawng ho, foreign portfolio investors (FPI) te chu equity markets lamah hlawkna hmuh tumin an rawn zuang lut leh țan ta. India chuan June thla ni 10 chhung lek hian FPI equity investment ațangin Rs 21,876 crore a hmu tling ta der tih, National Securities Depository Limited (NSDL) chuan a tar lang. Ni 10 chhunga foreign investment a dawn hi thla 6 kal ta chhunga thla tin investment a hmuh belh khawm aiin a tam zawk hial a ni.
Foreign Investor (FPI) ten June thla chhunga India ram share market an rawn bawh dan hian thla thum chhung zet ram chhung a inkharkhip avanga market zei zia hnufual tak chu ngaihngamna leh phurna thar an rawn phur lut tel a tih loh theih loh a ni. A chhan pawh inkharkhip avang khan market rilru a tho kang thei lo a, FPI investors ten Indian markets ațangin Rs 1.4 lakh crore lai an chhuahpui hman a ni.
Ram chhung inkharkhip tlat chuan a nghawng tel chu sum leh pai dinhmun chiang kuang lo leh hlauhthawnna a thlen a, hei vang hian foreign investors te chuan Indian markets chu ui puar koh ang maiin an tlan chhiat san a, ram dang he lai aia țha tur zawk zawngin an tlan chhuak ta sup sup a ni. FPI investors te hian Indian markets ah hian FY 2019-20 hi kum hnih a zawna an share te an zuar tawh a, tun tangka kum kal mek hi a kum thumna a ni.
Ram chhung inkharkhipna avanga share market tho kang hlei thei lo pawh Foreign Portfolio Investors ( FPIs) ten June thla tir ațanga lockdown hlih anih ațang khan meichher an rawn chhi alh thar țha leh a, ram chhunga investment lam rilru hnual tawh tak pawh an rawn chhem vam thar chho țan leh ta mek a, market awm dan leh mar dek thiam (markets rating agencies) tam takin Indian markets hniam taka an dah thlak tawh pawh tunah chuan Indian markets chu tho kang turin a marphu a dik chho leh țan ta niin an ngai leh ta.
Tun hnai mai khan, international rating agency Moody chuan India ram markets dinhmun chu grade Baa3 ațangin grade Baa2 chawlhkar engemaw zat chhung chu tla thlain a dah a, hei hi markets a ni lo zawng leh a țhanna beisei tur chhe tak, siam țhat hial ngai dinhmun a ni a, a chhan pawh hun rei tak chhung țhan muang lutuk a nih vang a ni.
A chhan hrang tam tak avang leh markets mar dek thiam hoten an dah hniam avangin Indian stock market a sum peipungtu te rilru chuan ngaih ngamna leh lungmuang takin an awm hlei thei lo. RBI Governor Shaktikanta Das chuan foreign investors ho te hi tunah chuan thil nih phung a kip a kawi hrilh vek an ni tawh a, he laia investment ti tura an ngaihtuah dan tur leh thil țul tinreng ram chhung ratings dan te pawh hrilh vek an ni, tih thu a sawi a ni.
Hetih lai mek hian, Prime Minister Narendra Modi chuan tun hnai mai khan coronavirus pandemic avanga ram chhung sum dinhmun derthawng leh tla chhe tur dawm dinna tur leh kaithawh a, chhawm kalna turin, Chaw fun lian leh țam țanpuina tur a hming *Atma Nirbhar Bharat package* a puang a. Hei hian a tum chu, ram chhung mipuite ei leh bar harsa te chhawk zangkhai te, sumdawnna tih hmasawn te, ram chhung thil siam chhuaktu te ber ațanga lian ber thlenga hri puiin ram chhung a nuai hma aia dinhmun duhawm zawka hlankai te, lo leh huan neitu leh ran vulhtute tan hamțhatna hrang hrang he chaw funah hian fun tel a ni bawk .
Foreign Investors te hian hetianga Sorkar hma lakna hi an hmuh hmaih hauh lo ang, hemi vanga ni rei lo te chhunga investment rawn pung ta thut hi a ni ngei ang. Amaherawhchu, hri pui Coronavirus dinhmunin nitin san lam a la pan chhoh zel avang hian ram pum lockdown hlih hnu pawh hian chu chuan ram chhung sum leh pai țhanna kawngah diptu a la nih rih tlat avangin rawn chawrno a, a țhan duahna a la chelh deuh a, heti chung hian țhang theih turin India ram hian theihna a nei hle a ni.
Hri pui leng hi a kiang emaw kiang lo emaw pawh ni se, a vanglai a pelh hnua khawvel ram politics leh sumdawnna inlumlet turah hian India ram hi engti zawng pawhin fatu zingah a tel dawn avangin hri puiin a nghawng thlen theih ram chhung țam tla tur zawng zawngte pawh hi India Sorkar hian a hmu tlang vek a, kawng tinah mithiam, ram tana thluak hmang reng a neih avangin an thlazarna hnuaia phun nawi loa thlamuang taka awm hi kan tih mai tur a ni dawn lo'm ni ?
Source :
Financial Express
June 10, 2020
@ 3:48 PM IST
=====10==06=20=
- Huna Kawlvawm
Post a Comment
He post chungchanga i ngaihdan lo sawi ve rawh: