HRIPUI LEH TANGKHANGTE

- Omomi

Kan bus zinkawng:
State khata district hrang hrang, Red, Orange leh Green zone-awm te kha bus hrana thiar khawm kan ni a, him takin Station lam kan pan a, kawngah midang nen close contact kan neih loh nan uluk leh fimkhur takin kan zinkawng kan zawh.

Intawh khawmna:
Bus aṭangin  kan chhuk a, NE state dang, Sikkim, Assam, Nagaland mite nen huang khatah khungkhawm kan ni a, keimahni Mizo pawh Red, Orange leh Green aṭanga haw tum te kan inpawlh ta vek. Hetah hian eng social distancing mah a awm thei lo, helai hmunah hriatchhuah loh positive-te  nen close contact nei lo tura min lo beisei a nih chuan in hriat loh vang a ni e, hung chhunga hnam tin chin tin inpawlh, wash room inṭawm khan eng distance mah a awm thei lo, keini chuan inpawlhsawp miah lova him taka Mizoram lo luh kan duh a, a theih ngang loh a ni.

 

Station-ah:
A manganthlak kan ti asin, let leh theih inring tawh lo, kum eng emaw zat lo awm tawh kan nih avangin kan bungrua leh thawmhnaw ken theih ang ang kan keng a, Bus aṭanga state wise-a hruai kan nih angin Train-a lut turin kan bungrua kan hlang thla a, khatah khan kan ṭap asin. Kan bungraw rit tak tak te chu Over bridge-ah kan han thiar a, police duty te lah chuan "Kal thuai thuai rawh u, in Train a chhuak dawn, hmanhmawh rawh u" tiin min tur hmanhmawh a, haw tura kan room kan chhuahsan hmaa Covid 19 kai hlaua inkhung ngat ngat te kha kan chhehvel hmarchhak hnam dangte nen kan han insu nawk nawk a, kan bungrua a rit si, vawikhatah kan inkeng zo thei si lo, Police duty-te lah khan "An state-ah an haw dawn tho a, duh leh inkai darh vek mah se, a pawi lo" an ti em maw ni kan  insu nawk  nawk chung leh kan innek ṭawk ṭawk  chung  khan  state dang haw ve turte bus aṭanga lo chhuahtir zelin Israel fate Aigupta aṭanga an haw ang mai khan leilawna leng lo khawp keini ritphur khan Train lam kan pan a,  Social distancing kan maintain thei ngang lo a ni.


Assam-ah:
Keiniho bik kha tu nen mah Mizoram chhungah inthlahdah takin kan awm lo va, amaherawh chu Guwahati aṭanga kan Vai driver erawh a fimkhur lo viau a, anni, driver-te nen khan luh leh chhuahna kan inṭawm a, an ṭhutna kha daidan a ni ve lo. Guwahati chhungah vawi tam an dingin dawrah thil an lei a, anni vang khan kan thlaphang a, a solve-na tur kan nei mai si lo.

 

Mizoram chhungah: 
Hetah hian mak kan tih tak em em chu Escort-tu kan nei miah lo kha a ni. Covid baka rilṭama thih hlaua rawn haw keini ṭhalai rual kha mawl viau leh midang himna ngai pawimawh miah lo ni ila, kan tan khan khawchhunga bus aṭanga chhukna hun leh fimkhur lo taka khaw dai vela tal bawrh bawrhna hun kha a tam,  mahse, Escort-tu police pakhat pawh kan nei lo chung khan midang himna kha kan ngaipawimawh a, fimkhur takin zinkawng kan rawn zawh  a, kan zinkawng tluanin daipawnah  duhsaktu kan tawng a, kan lawm hle. 

 
Eng vanga lo haw nge kan nih le?
Mizoram chhungah him taka in lo awm laiin keini state pawn aṭanga lo hawte'n dinhmun derthawngah kan dah che u hi pawi kan va ti em! Haw tura thutlukna kan siam hma khan ngaihtuahnain kiltin kiltang a dap a, 'Ta se' tih leh leh 'Ang a' tih ringawt pawh kha darkar tin kan ngaihtuah ve a, kan tel lova in hlim leh in himzia  hre chunga in nat leh in thih pawh pawi ti lova lo haw kan ni lo tih hi min hriatsak lul teh u. Ih maw, duhthlan tur dang a awm lo, kan in, kan ram, kan khua leh nangni pana haw mai loh chu.  Hna nei lo, riṭama thi tur leh vairam kawngsira mu turin keini hi min hnuchhiah in duh bik dawn em ni? In luah man a sang a,  kan hna a tawp a, chhungte chawmtu kan nih avangin kan chhungte kan pur thei lo, kan dinhmun kha a khirh em asin. A tirah chuan  kan Mizo mipuite dinhmun hlauhawma dahtu nih ai chuan haw lova a theih chin chin awm kha kan thutlukna hmasa a ni ve tho a, mahse, chu chu kan tan a rem ṭeuh si lo a ni. Pawisa tel lova nun rem se, in luah man te sang lo  se, keini leh nangni him nan kan lo haw miah lo tur.

 

Min hau tawh suh u:
In ṭawngkam kha tak tak hi kan dawng dawn tih kan hre lawk vek a, vuivai hmang leh  lungawina reng hmu lo tlemte avangin   min chukin min dem ang a, min dengin min kawk sawk sawk dawn tih hi kan hre lawk a, mahse, state pawn aṭanga lo hawte zingah hian a vui leh sawiseltu hi tlemte chauh an ni, 'Khual thuthang leh ar pan chuk a na' an tih angin in sawi punlun ta vak ṭhin a, a zia lo kan ti. Min hau min hau tawh suh u, kan vaiin kan vui lo va, lawm nachang hre lo kan ni vek bik  lo asin.  Kan tam tham em mai a, kan zingah ngaihtuahna dik lo pu tlemte an lo inzep ve a nih kha, kha pawh an pangchang aw-ah min ngaihsak u la, hriatthiamna nen mênah lo thlak daih rawh u aw. Vui thawm tlemte avanga min hnungchhawn chuan  nun man tona vairam aṭanga lo hawte hi  tuin nge min kuangkuah ang tunge min thlamuan ta ang le?

 

Quarantine centre chhungah:
Hetah hian social distancing kan maintain loh avangin min hau suh u aw,  mi tam tak khung khawm kan nih avangin Social distancing kan maintain thei lo, in hmuh laiin inkar hlat deuhin ṭhu mah ila, zanah room khatah kan mu dul a, bathroom leh toilet kan inṭawm dial dial a,  kan rawn chhuah hmaa zone inang lo, state khat aṭanga lo haw ṭheuh pawh district hrang aṭanga haw khawm kha Bus chhungah kan lo inekbeng chho tawh a,  khungkhawm kan nihna hmunah hian kan tan inhlauh a sawt tawh lo. Chuvangin, keini quarantine chhunga awmho hi Mizoram lo luh hma aṭanga innek noh noh tawh kan nih avangin hemi chhunga Social distancing hian awmzia a nei ta lo a nih hi. Mahse, thil pakhat pawimawh kan tih em em chu  duty-te leh Mizoram chhunga awm sa, him taka lo awm te nen close contact nei loh hi a ni a, a him sate hi keini avanga dinhmun hlauhawma in awm hi kan phal lo.
 

Haw mek, lo haw tur te leh haw tawh te u:
'Palh' a awm emaw pawha sawrkar tana mi ṭangkai kan nih theih nan leh sum tam tak senga min buaipuitu, mizo mipui, Local task force, kan Medical team leh  Police-te kan puih let  ve nan leh kan mite himna kawnga tha kan thawh ve theih nan  in lo haw a nih chuan i chuanna Train compartment-a chuang zawng zawngte contact number, address leh hming collect la, state dang i chuanpui chuan i contact number collect chu kawltirin an state an thlen hnuah an test result hriattir tur chein ngen rawh, chutianga i ti a nih chuan nang emaw, i chuangpuite zingah emaw Covid vei in lo awm palh pawhin i ṭhutpui leh i close contact dang chhuichhuah kawngah  sawrkar i puih thei ang a,  inhriatchhuah a awlsamin nasa taka thehdarh a nih hmain kan inhrechhuak awlsam dawn a ni.

 

Quarantine centre chhunga awm mek i niha i duhsam chawhmeh i dawng lo a nih pawn phun hauh suh,  a tui tinreng pek  leh kan duhthusama min enkawl  hi  an bat a ni lo. Kan tawn ngai loh hripui kan tuar a, enkawlna, dawnsawn dan leh min buaipui danah sawrkar leh Local Task Force te pawn hei aia ṭha an duh ngei ang, mahse, sum indaih lohna leh kan economy dinhmun hniam avang te,  hun leh tha a heh avangte hian duhthusam hi pek theih kan ni lo. Mi 100 lek  haw ila chuan nuamsa takin  min enkawl em em ang tih hria la, mi sang tel  nitina dawngsawng tur erawh chuan tuna min enkawlna aia ṭha hi khawiah mah kan hmu zo lo vang tih hriain  i lawm em em  zawk ang u.

 

Sawi tur tam tak a la awm a, sawi sen pawh a ni lo, vui thu leh sawisel thu tlemte karah kan lawmna authawm hi ring zawk se tih hi State pawna Mizo tangkhangte duh dan  a ni a, min dawnsawn danah leh min enkawl danah  duhkhawp loh tam tak awm mah se,  kan lawm em em a, hripui leng rapthlak leh ṭihbaiawm karah min hruai hawin min enkawl a,  Vairama  kawngsira mut hmabaka awm, rilṭama tlu mai tur te in zinga kan tel ve leh kan lo haw min phalsak hi ropui kan ti asin. Vuivaite leh sawiseltute hi tlemte chauh an ni, in beng lo chhut ngawnsan daih u la, kan lawmna authawm hi in bengah ring zawk se kan va ti em!

 

Post a Comment

0 Comments