CHINA-IN HONG KONG TAN 'SECURITY LAW' A HMAN CHUAN UK IN IMMIGRATION RULES A THLAK ANG

Aizawl |June 03, 2020: British Prime Minister Boris Johnson chuan  Hong Kong chungchanga China hma lakna chu Joint Declaration an siam dun kalh leh an tih loh tur zinga mi a nih thu a sawi. China Sorkar-in Hong Kong tan "Security law" a barhlui anih phawt chuan United Kingdom chu pem leh zin luh theihna dan  (immigration rules) siam danglam turin a inbuatsaih tih chu vawiin Nilaini hian South China Morning Post Chanchinbu a hrilh.

 "Kum 1997 a Hong Kong British in kum 99 chhung a awp tlin hnua China kuta hlan a nih khan ‘one country, two systems’ chu an thuthlung laimu niin  Hong Kong inrelbawlna dan bulpui   (Basic Law) pawh heta innghat Joint Declaration a chuang,  Britain leh China ten hming an ziah hnan a ni”, tih thu Boris Johnson chuan ziakin a hrilh. 

 British Prime Minister hian a sawi zel  dan chuan China in Hong Kong "national security law"  hmang tura a thu tlukna leh remruatna hian  “zalenna bawh chhiatna anih bakah mahni inawp theihna dan nuaibona a ni” a ti.

China hma lakna hi  Joint Declaration  kalh anih bakah he a thil tih hi, ti lo tura a intiam zinga mi a ni a ti.

“China hian  national security law hi a hmang anih phawt chuan, British Sorkar pawhin kan immigration rules hi kan thlak danglam ve nghal ang ,” Johnson chuan a ti. 

Immigration law thlak thar ang chuan British National Overseas passports, Hong Kong mi tuna nei mekte chu UK ah thla 12 chhunga tihnun thar ngai tura an luh phalsak theih an ni ang a, awm zel phalna pawh pek theih an ni ang,  “hei hian hna thawh phalna pawh a huam ang a, khua leh tui nihna kawnga thil țul chhiarna atan pawh hmansak a ni ang". Hei hi, dan hman mek nena khaikhin chuan chhe tak a ni. 

Hong Kong mi 350,000 velin chutiang passport chu an nei a, midang 2.5 million zet chutiang passport dil thei chu an awm bawk tih Johnson chuan a sawi. 

China Parliament hian kar hmasa khan Hong Kong awp behna tur dan thar hi a pass a, hei hian a ken tel chu in lak hran (secession) khapna, terrorism puan theihna leh ram dang inrawlh khapna te a ni. China  Mainland ațangin venhimna leh enthlatute (security and intelligence agents) dah thar a ni ang a, hei hi tun hma lam zawnga awm ngai lo a ni. 

Nimin Thawhlehni khan Britain chuan  Beijing chu  Hong Kong tana hman tur national security law chu hnukkir ngei tura tiin, na takin a khak tawh a, hetianga a tih hian Asia ram economy lunghlu pakhat tih chhiatna leh China ram zahawmna tih bawrhbanna a ni ang.

U.S. President Donald Trump chuan kar hmasa khan China ram hremna chi khat atan Hong Kong, a bik taka US duhsakna an dawn a tih tawp tawp bakah Chinese zirlaiten America rama lehkha an zir khapna a siam thar bawk. 

UK ah hian 2011 chhiarpui ang khan China mi 4,33,150 an awm. VisitBritain in a sawi dan chuan kum 2019 chhung khan China ațanga UK tlawhtu, khual pang zin mi 3,21,000 zet an awm a, an sum hman pawh £ 533 million vel a ni tih Xinhua news chuan a tar lang. (Xinhua 31/1/20).

UK hi khawvela zirna țha awmna anih avangin zirlai thiam thei leh kei ka ni ti thei chin chuan Oxford, Cambridge, London School of Economics etc ah te zir an tum țhin, ram hrang hrang ațanga pan rawn a hlawh ber a ni a. China hi non-EU ram  zinga zirlai nei tam ber niin kum 2018-19 chhung khan UK ah Chinese zirlai 1,20,385 an awm a, non-EU ram ațanga zirlai 35% an tling phak a ni. Chinese zirlai dawta tam chu India 26,685, US 20,120, Hong Kong 16,135, Malaysia 13,835 te an ni.

Source :
Hindustan Times
June 03, 2020
@  05:05 PM IST

===03==06==20===
- Huna Kawlvawm

Post a Comment

0 Comments