Aizawl | June 2, 2020: Maharastra atanga Mizoram lama tangkhang haw tur zinga mi Nl Marlia Vanlalhmangaihzuali (k-26), Keifang khua chu nizan dar 11 vel khan rel atanga chesualin, a nunna a chan.
Marlia Vanlalhmangaihzuali hi Shivneri, Pune-a awm mek niin Samsi Railway station, Siliguri thlen hma deuhah Train atanga chesualin a tla chhuak palh niin exploremizoram.com chuan thu a dawng.
Thudawnna tarlan danin, Train lama Pune Mizo hruaitu awm ten an hriat velah Emergency brake pawt nghalin Train an ti dinga an zawng nghal a. Hei hi zan dar 11 bawr vela (1 June 2020) thil thleng a ni a. Railway lam thuneitute an be nghal a. An va hmuh meuh chuan vanduaithlak tak maiin a lo in sawh na deuh a nikhawhreloin a awm a. Train ah hian Mizo Doctor pathum chuang ve an awm a, anni leh hruaitu awm ang ang te hian uluk takin Train Compartment pakhat ti ruakin an han buaipui nghal vat vat a. Vanduaithlak tak maiin a hliam te a nat em avangin Zan lai dar 12:35 AM,( 2 June 2020 ) vel khan mihring an in chan zo ta lo a ni.
A ruang phur haw tur hian Police atang lehkha tih fel leh Post Mortem te a ngai dawn si a. Hemi lo buaipui tur hian mi thenkhat buaipui turin awm hnufual a ngai a. Pune Mizo Member te zingah tlawmngai tam tak zinga mi 5; Ahneia, Jospeh V Renthlei, John Laldingliana, Dr Lawrance leh Lalsangpuia te chuan ruang hi an buaipui chhunzawm dawn ta a ni.
An rawn kal zel dan tur hi Railway lamin an ngaihtuahsak dawn niin an in sawi a, Ambulance ngaihtuah leh kal man te nen, vawiin (2June 2020) lamah thildang hi chu a chiang thei tura ngaih a ni.
Post a Comment
He post chungchanga i ngaihdan lo sawi ve rawh: