HAW RUNPUI: Goa atangin mi 700 chuang lo thleng; Bairabi tan tanpuina cheng singnga chuang hlan

Kolasib | June 1, 2020: Goa atanga Mizoram mi Shramik Train hmanga lo haw, mi 734 te chuan vawiin chawhma dar 11 vel khan Bairabi rel chawlhhmun an lo thleng.



Heng tangkhang lo thlengte hi Kolasib bawrhsap Dr H Lalthlangliana, SP  Vanlalfaka Ralte,  leh Kolasib district thuneitu ten an lo dawngsawng.

Rel in Bairabi an lo thlen rual hian rel chhungah ei leh in pek an ni a, Screening point 10 kaltlang a endik vek an nih hnuah an district theuh panna tur bus ah luh tir nghal an ni. Bus hian Station a chhuahsan hnu hian Liason Officer te kaihhruaina hnuaiah an hawna tur district theuh bus hmangin pan tir an ni.

Vawiina Goa atanga lo haw te hi a tira haw tura in report zat chu 790 an ni a, Bairabi rel chawlhhmun rawn thleng zat inchhiarnaah erawh chuan mi 734 an ni a. Aizawl district mi 426, Lunglei district mi 37, Serchhip district mi 50, Kolasib district mi 61, Champhai district mi 66, Siaha district mi 11, Mamit district mi 21, Lawngtlai district mi 24, Saitual district mi 16, Khawzawl district mi 14 leh Hnahthial district mi 8 an tel a ni.

Goa atanga lo haw te hian Bairabi a tlawmngai pawlten an lo buaipuina avanga lawmthu sawi nan coach tina chuang ten pawisa an thawhkhawm a, an pawisa thawhkhawm Rs. 54142 leh mimalin a hlan cheng 5000 nen avaiin cheng 59,142 chu Bairabi Task force leh Bairabi N branch YMA tan an hlan.

Tangkhangte Bairabi atanga phur chhuak tur bus driver leh handyman te hi kohkhawm a, an kal dan tur chiang tak a hrilh an nih thin bakah, ruihtheihthil laka fihlim tur a hrilh an ni a. Police ten a khat tawkin an vil reng bawk a ni. Vawiin pawh hian Excise & Narcotics department duty te nen uluk takin bus chhuah hma hian endik leh an ni a, fihlimlo mi 6 man an ni.

Mizoram mi leh sa tangkhang, Bairabi rel chawlhhmun lo thleng te ei leh in tur hi Catering service te kaltlanga buatsaih thin a ni a. Rel lo thlen hun a danglam fo avanga ei tur lo buatsaih lawk kawngah harsatna a awm thin avangin Bairabi North YMA te hnenah ei leh in lo buatsaih hna hi hlanchhawn a ni a, sawrkar rate pangngai angin tlawmngai takin anni hian an buaipui chhunzawm ta a ni.

Train a chuang Tv. Lalneihkima khawsik chu Compartment leader ten inven thil thuah an report a. Tunah hian Siliguri hmunah test turin enkawl mek a ni. An ni hi Siliguri Mizo Welfare ten lo tlawhin a awmpuitu Tv. Muankima thlenna turte an lo ngaih tuah sak a ni. An awmna senso buaipui saktu Chief Secretary Lalnunmawia Chuaungo leh a thawhpuite zawng zawng chungah Goa Mizo Welfare chuan lawmthu an sawi bawk.

Goa Mizo Welfare chuan Mizoram sawrkar, Goa sawrkar, Mizoram chief secretary, Kolasib/Bairabi Local Task Force leh Siliguri Mizo Welfare-te chungah lawmthu an sawi.

Post a Comment

2 Comments

  1. Great ! Good sense and progressive attitude nei👍👍👍 Zofate thinlung ah hetiang rilru leh thiltih duhna hi awm nghet tlat sela,kan Society hi a va nuam dâwn êm !

    ReplyDelete
  2. Progressive society a mite attitude dik tak a ni.Civic sense duhawm Tak neitute chêt zia a ni. Zofate mamawh dik tak a ni : ka ti..

    ReplyDelete

He post chungchanga i ngaihdan lo sawi ve rawh: