Chu lehkhabu tlângzarh runthlâk tak mai chu!

- K Remruatfela

Columnist, EXPLORE MIZORAM

Chumi ni chu tahrik ni 2 thla 6 kum 2016 a ni a, Inrinni a ni nghe nghe! Chumi hunah chuan a ni chu lehkhabu *‘Indian union chhunga Zofate rinluh kan nih dan’* tih chu runthlâk taka tlangzarh a nih! A thawnthu bul intanna chu hetiang hi a ni e.

He tahrik ni a thlen hma kum 7 atang daih tawh khan ka pa nen hian lehkhabu kan siam dùn a. Nimahsela, kei vairama lehkha zira ka awm bo daih avangin hmalâk chak erawh a har em em a. Ka pa chuan, _“Mizorama i lo chuan chhuah hunah kan ti dun tak tak thei tawh ang,”_ tiin ka lehkha zir chhuah hun leh lehkhabu kan peih fel theih hun hi a nghakhlel em em thin a. Keipawhin ka lo haw hunah chuan, ka pa nen chak zawkin kan lehkhabu siam dun lai chu kan chhunzawm thei tawh ang, ka lo ti rilru thin a. Nimahsela, chutia beiseina nen hringnun ka thlir chhoh mek lai chuan natna runthlâk tak mai chuan ka pa chu a rawn buan ta phut a. Doctor te kâ atanga hriat dan phei chuan zai tlâk a ni lo tawh lo hial a ni awm e! Amah lah chu zai lohva chhin leh a ni tih kan hrilh loh avangin inringhlel ru, ring ngam chiah si lo hian a thlaphang ru ve hle ang tih chu a hriat theih a. Chutiang chu kan dinhmun a nih tâk si-ah chuan beidawnga thu kun mai lovin ka pa dam lai ngeiin lehkhabu chu ka peih fel hman ngei tur a ni tiin thutlukna ka siam fel ta a. 

Chutih lai erawh chuan chemo vil, drip khai, case khawih leh lehkhabu ziah hna thawh kawp chu thil namen a lo ni lo. Nimahsela, ka pa dinhmun ngaihtuahin muangchang thei ka ni tawh si lo; chuvangin, court ka bân veleh in lamah ka nu damlo ka tlawh zawk a, chumi zawhah ka pa chemo khaina hmun, Zemabawka Cancer Hospital ka pan chho leh vang vang a. Ward-ah dawhkan mumal a awm si lo va, damdawi in bathlarah ka pa chemo khai vil pahin lehkha chu ka ziak thin a. Zan dar 11:00-ah light tih thim a nih thin a. Mahse, zân mi mut reh hun chu ka tan lehkha ziahna leh lehkha chhiarna hun tha ber a ni si. Chuvangin, emergency light hi a dim thei ang bera chhi êngin ka pa dam lohna khum bulah chuan thuthluangin hna ka thawk tan thin a. ‘Heti em ema vanduainain min han tlakbuak ta hi eng nge ka tihsual bik le,’ tih hi mahni inzawh nawn fo a awl rum rum thin.

Ka pa dam lai ngei chuan lehkhabu chu ka peih fel hman thei dawn e ti-a lungngaihna kara ka rilru a hlim rûk em em lai chuan tlai khat chu a natnain a hneh ta ngang a niang, ka pa chu a titipui theih ta hauh lo va, biak pawh hian awmze neiin min chhâng ta lo. A hun tàwp a hmang ral tan tial tial ni-a ka hriat avangin ka lehkhabu ziah lai chu a damlai ngeiin ka release hman lo ang tih mawlh chu ka hlau lehzual ta tak zet a. Ka pa lah nikhaw hre lovin a awm zui ta mai si a, ka lehkhabu ziah lai pawh chu duhthusama proof reading nei hman ta lo chuan ka pa damlai ngeia release hman tumin ni July ni 2, 2016 chuan kan Minister zahawm tak Pu R.Romawia chuan min tlângzarhsak ta a. 

Hetih lai hian ka pa chu mumalin a awm tawh lo va, a mar chauh en a ni tawh. Doctor leh Nurse duty zawng zawng pawhin lehkhabu kan release zawh hmain a chatthla hman ang tih mawh chu min hlauhthawnpui a. Chuta thil mak em em mai chu, ka lehkhabu kan release chhung zawng chuan ka pa chu buaipui ngai em em hran hian a lo awm miah lo va, a lo muhil siai siai a, ka lehkhabu kan release zo, tihfel ngai ang angte kan tihfel hnu darkar rei lo te-ah ka pa chuan min kalsan ta nge nge a. Ka pa chuan ka lehkhabu release min lo nghak hram hram a ni tih hi ka thinlungah a chiang em em a ni. He khawvelah hmuh tur awm dâwn tawh lo mah se, a damlaia kan ziah dun, release hun a nghahhleh em em thin *‘Indian Union Chhunga Zofate Rin Luh Kan Nih Dan*’ tih lehkhabu, a damlai ngeia kan han release hman hrâm erawh ka lawm tak zet a ni. Pathian min kaihhruaina leh awmpuina zawng zawngah lawmthu ka sawi tak meuh meuh e.