ZORAM EXODUS!

- Kenny Muankima

Columnist, Explore Mizoram

Tukin facebook ka hawn tirha ka hmuh hmasak ber chu Chennai aṭanga rawn haw ten thlamuang taka rel (rail) aṭanga an zinkawng an rawn live hi a ni a. Thinlung takin ka lawmpui a, an lawm turzia ka hrethiam lutuk hi engtin emaw ni ka awm!

Kolasib Aw ka bih leh a, Kolasib DC Dr H Lalthlangliana kamchhuak:

"Rilru thlaphang takin state hranah hun rei tak an awm a, an lo haw jnah pawh mipuite'n kan lo lawm a ni tih lantirna'n banner te lo tar ila, kan ban te lo vai ila a ṭha ang. Kan ramah thlamuang takin lo haw se ka duh..."

tih hi ka hmu fuh leh chat a, a va han Mizo pa kamchhuak ṭek ṭek kher ve le e! Ral aṭangin, Social Media hmangin, a theih ang ang leh kan thiam ang anga tangkhang te hi kan lo buaipui ve avangin an harsatna hmachhawn in ang lo tak tak te, thlaphanna leh manganna in ang lo tak tak te, keinin kan la tawn ve ngai loh harsatna hrang hrang an tawh dan kan hriatpui ve ta nual bawk nen, hnuk a tiulh lek lek thei!

Kolasib DC kamchhuak hian Mizo thinlung cho chhuak se, kan unaute rawn haw hi chhungrilah an rawn inthlahrun haw ṭhum dawn avangin thlamuang taka an rawn thlen theihna atan an thlen chin apiangah, mahni bathlar ṭheuh aṭanga ban lo vai suau suau theih hi a va tih chi dawn tak. Engmah a hek dawn si lo.. Chutih rualin pawl hruaitu fing leh nachang hria pawh a hriat hle dawn niin a lang. Mizo inunauna vawnhim duhtu leh inthlamuan tawnna ngaihlutu tan banner lo tar hi thil har ni dawn hek lo.. Kolasib ah chuan YMA, Youth for Kolasib - Y4K/Khuangpuilam Youth Club, MZP, MSU, MHIP, MUP etc - pawl hran hran a mitthla nghal theih a. A Branch ang zawn pawhin a chet theih bawk ang a. Banner hi chu kan phâng lo turah ngai ta phawt ila..

Hun rei tak mangang, hlauthawng leh beidawng em ema lo indawm kun tawh te hnualna hnem tura mipuiin ban vaia an lo lawm tur hi ka mitthla chhin mai pawhin mi a khawih a, khawvelin hmuhnawm a tidawn hian ka hre khawp a! Mizo te min va han ngaisang leh dawn tak!

"Lo haw mekte pawh tluang takin lo kal se, lo la haw zel tur te pawn harsatna nei lovin an ruahman angin rawn chhuak thei ngei se, him takin, dam takin kan ramah thlamuangin rawn kir ngei rawh u..."

tiin thinlung hi chuan duhthu sâmin duhsakna a hlan mawlh mawlh hlawm a nih hi.

Chutih rual chuan indemtawnna a thlen lohna turin heng thu hi ka sawi tel hram duh. Zoram pawn lama tangkhang ten tun hripui len laia Zoram an pan theihna man hi keini ram rethei ang tan kher lo pawh a tlawm lo teh a nia! Sorkar kan dem lohna atan hei hi ka ziak hmasa duh..

Mizoram sorkarin phak ang tawka a ṭanpuina sem ngawt pawh kha kan economy en chuan a tam tham viau tawh a. Tin, haw man nei lo tak tak te hi a la tumsak a nih phei chuan eng emaw zah a kal leh ang. Heng zawng zawng hi chhiar tel lo pawh ni ila lo haw te himna tur leh mipui himna duha inbuatsaihnaah ngawt pawh hian sum hi a luanin a luang hiau hiau lo thei lo..

A thui lohna atan Quarantine Facility a ei leh in ngawr ngawr hi bihchiang chhin ila, heta ṭang hian kan chhut thiam maiin ka ring. Tuna in report tawh chin hian sang riat (8,000) an pel tawh a, an in report kim vek phei chuan sang kua (9,000) an kai theih rin a ni a. Awm tlang thlang ta zawk an awm nawk thova a rinawm avangin 8000 ang zawk pawh hian lo la ta ila, tuna Mizoram sorkar in quarantine facility a an ei leh in tur - Tukṭhuan, chhun thingpui leh zanriah - atan hian mi pakhat zelah ₹ 300/ a dah a. Chuti a nih chuan ni khatah ei leh inah ngawt pawh ₹ 24,00,000/- a kal dawn tihna a ni a. Ni 14 chhung phei chuan ₹ 3,36,00,000/- zet a kal ral dawn!

Mutbu, preventive equipment hran hran, a duty te refreshment & incentive neuh neuh, etc engkim detail costing hi chhut chhuah ni mai phei se chuan a turu buru dawn lutuk ringawt.

Chuvangin a lo haw mek te, lo haw tur zawng zawng te pawhin nangmahni mimal angin engmah dawng sawng lo ula ka duh. Chuti lo chu in vui hlauh dah ang e. He Zoram Exodus vanga he ram rethei bakberh tak maiin a neih chhun leh fawmkhawm chawp a senral nasatzia zawk hi ngaihtuah ula, chutah chuan ngaihthah in nih lohzia hmufiahin ngaihsak in nihzia in chiang thei ang.

Zoramin 'dam leh tlang khatah, thih leh ruam khatah' tiin a lo pawm che u a, chu chuan mawh (tih tur) a pe let nghal che u. Chu chu kan ram leh hnam himna hi a ni. Chuvangin theih tawpin rawn fimkhur ula, sorkar in ruahmanna a siam ang ang kha in hausa emaw, rethei emaw pawh ni se zawm hram rawh u. A rawn haw zinga pakhat lo fimkhur loh vangin kan ramah hri darh palh ta hlauh se la, a rawn haw zawng zawng te bakah in rawn haw theihna tura hma latu zawng zawng te thlengin dem an hlawh ang a, hri ai pawha boruak ṭha lo zawk a chhuak thei tih hi hrethiam tlat rawh u khai. Mahse, fimkhur tura inchah hi 'inthlahrung rawh u' tihna a ni lo tih chu in hriatthiam ngei ka beisei.

Chutih rualin Zoram mipui te pawhin hei hi kan hriat a ngai:

- Tunah hian Green Zone leh Orange Zone aṭang chauhin an rawn haw dawn lova, Red Zone aṭang pawhin tam tak an rawn haw dawn.

- Chuvangin a hma zawng aia kan fimkhur zual a ngai a, kan himna vawngtu Force lam leh Task Force te thuzawm bakah sorkar thuchhuah apiang zawm kha a pawimawh lehzual dawn.

- Chutih rual chuan 'fimkhur a ngaih zual lai ber' kan tih hian a rawn haw a te thinhrik lam a kawk lo tih pawh kan hriatthiam a ngai.

Eng pawh ni se, he ZORAM EXODUS hian a chhe zawng ni lova a ṭha zawng zawka rah a chhuah theihna turin midang chetsualna lam ni lovin an thil tih ṭhat zawk zel inthlir sak ila, chet a fuh lohnaah erawh Social Media kaltlang lovin proper channel hmangin in finchhuah zel ila, ṭawngṭaina nen, thuawih taka kan inlungrual phawt chuan he hun hi Mizoram history a reh thei tawh ngai lo turah kan chhuah thei a ni tih hi i vawng reng ang u..

Nang i awmna hmunah, kei ka hmunah..