Liandova te Unau thawnthu leh Bible zirtirna

- J Vanlalrinngheta

Kan naupan lai chuan khum laizawl ah kan nu leh pa ten thawnthu min hrilh thin. Tunlai angin mobile phone leh TV te kan la nei ve lo bawk a, thawnthu ngaihthlak kha kan nghakhlel thin hle. Hun alo kal zel a, khawvel changkang zel ah kan Mizo thawnthu tha tak tak te chu Fairy Tales leh Super Hero ten an rawn thlak chho tan ta a. Chhura leh Nahaia te ai in Cinderella leh Snow White te kan hre mah mah ta zawk emaw tih tur khawvel ah kan chuangkai ta reng mai. Chutiang Khawvel ah chuan kan Mizo thawnthu te lo ril zia leh zirtirna an neih that zia hi thiam ang tawk tawk a tarlan tul ta riau a hriatna avangin tun tum ah hian Liandova te unau thawnthu lam kan hawi dawn a ni. A thawnthu ang ngau ngau a tarlang lovin, Bible nena a in milna lai tlem azawng rawn dah a ni e.

Liandovate unau thawnthu leh Mizo society:

Liandova leh Tuaisiala te unau thawnthu ah hian tunhma Mizo society thenkhat a lang tel nual tih kan hre thei a. Chung zing a langsar tak chu fahrah leh retheite dinhmun a lang chiang hle. A nu in pasal a umsan hnu khan fahrah unaute kha chhuanchham a awm in, mim fang khat inphel ngai hial khawp in ei tur an neilo anih kha. Tin,Tuaisiala hmuhchhuah Sapha isa an insem khan anni unau kha chu sa tha chu sawiloh, a pumpui, a ek awmkhawmna chiah pek an ni. Hei hian kan Mizo society a fahrah te leh rethei zawk te dinhmun lo tleu zia kha a tilang kan tilo theilo ang. Lersia lal meuh pawh kha rethei tak anga a insiam kha chuan thlen in a hnawng anih kha. 

Chutihlai chuan he thawnthu hian zirtir tha tak ava nei si em.

Hringnun philosophy leh Bible zirtirna a inphum ru ve kiau mai si.

• Mite duhloh anih vang ngawt in engmah hi thalo leh hlulo a ni vek biklo:

Saphai pumpui, tuma chan duhloh, lui mawng lama kalpuitu te unau chuan Saphai pumpui an zai ri ta ret ret mai. An han hai hawng chu leh,kha saphai khan a pumpui ah khan thi leh dar pai teuh asin le . An va lawm dawn tehlul em aw. Mi te duhloh, paih lo a hai hawng tuten mite hmuhloh an hmu a, mite chharloh an chhar a, Liandova teunau chuan thi leh dar, mite neih ve phakloh an neih phah ta der mai.

• Mikhual chunga that chhuah:

 Israel faten ram an luah dawn tum a Pathian in a chah pawimawh em em chu mikhual chunga that chhuah a ni. Tin, Thuthlungthar zirtirna ah ngei pawh hmuh tur a awm bawk. Hebrai lehkhathawn ah phei chuan mikhual chunga that chhuah a tulzia a sawina ah thenkhat ten hrelo a vantirhkohte an thlen thu a sawi lang tel nghe nghe.

Hebrai 13:2  Mikhualte chung ah that chhuah theihnghilh suh u; chutiang tiin thenkhatten hrelovin vantirhkohte an lo thleng si a. 

Liandovate unau in mikhual Lersia lal, lal ropui a nihna thup a, mi anglo ang maia khawlai a awm, tuma thlen duhloh an thleng kha an va tisuallo em. An hausak pui lawih mai piah lam ah a hunlai a lal ropui Lersia thian nih leh a duhsak an hlawhchhuah phah hial ania.

• Pawn lam lan dan a nilo:

Lersia lal in Liandova te unau chu sial a pui chhuah dawn a,hmanlai chuan sial lian tha leh thau chu a itawm in a hlu khawp mai. Amaherawhchu Liandova chuan a thau leh lian tha tha thlang talo chuan kawmkar a sepui lian lemlo tak, a chi thaber mai chu  a hling ta nalh mai le, Lersia lal chuan a ui hle mai. A se chi tha ber kha a ni tlat.

A tam lam kawng zawh duh thin Mizo te tan hian zirlai min va hnutchhiah tha tak em. Mite subject lak ang lak tum ve ringawt leh mite tih ang tihve lehngawt, mite dampui damdawi lo in chawh ve ngawt thin te hian mite duhloh leh hnawl hnu hi a thalo veklo tih kan hriat a tul hle mai. Miten an thlanloh Isua thlangtu mi tlemte, Jerusalem a awmte azar ah khan a nilawmni keini hian Chatuan rohlu kan lo chan ve tak ni. Tin, pawn lam lan dan, hmel leh incheina hmang a midang teh zung zung thin  leh thliar hrang thin te hian zirtur kan va ngah tak em.

I Samuela 16:7

Nimahsela LALPA chuan Samuela hnênah, "A hmêl lam emaw, a san lam emaw en suh; ani hi chu ka duh lo a ni; LALPA chuan mihring endan ang in a en ve si lo va; mihringh chuan pawn lam lan dan an en thin a, LALPA erawh chuan thinlung lam a enzawk thin a ni," a ti a.

• Tumah hi in hmusit tur kan nilo. Dinhmun a inthlak thei:

 Bible in mi liante pawl lo a, mi te zawkte pawl turin min zirtirte hi alo va ril em aw. Liandova kha lal makpa ala ni dawn tih tuman an ring hauhlo ang. Nimahsela an khaw lal fanu chuan mite hmuh veloh Liandova hausakna chu alo hmu ru reng a, a rohlu a hmuhsak kiau avang chuan pasal atan a duh  tlat mai. A  fanu man tur lal in a chhiar chuan a lo nei daih em em mai si a. An unau lo hmusit thintu te kha an hnar a lian chhunzawm ve thin hle ang chu. 

Heilo pawh hi sawi tur tamtak a awm thei ang. Kan Mizo thawnthu ah hian zirtir nei tha taktak leh Kristianna nena kalkawp thei a awm ngei ang,. Tin, kan nun hona atana zirtur pawimawh taktak leh Bible zirtirna nena in vaw rem thlap si lak chhuah tur tamtak a in zep teuh in a rinawm. Mahse Bible aia rin tur erawh a ni hauh silo. Chutihlai chuan kan culture vawn that nan leh Kristianna huang chhung a kan seng luh thiam erawh a tha hle ang.

Thu belh :

• Lersia lal hi Isua Krista nen in anna deuh an nei a. An ropuina leh lal silhfen hlip in khual khua ah an mikhual a, pian hmang thatna leh hmel mawina neilo in, mite hmuhsit in an awm. Amaherawhchu a thleng duh tute tan malsawmna an ni hlauh thung. Chutihlaiin Isua tlukpui a ni e tihna lama erawh ni lo.

• Liandova ten an rohlu an phawrh maimai lo. A hun tak ah an hmang zawk. Lal fanu man atan a hmang. Lal makpa rangkachak nih a hlawh chiang awm teh e. Midang neih veloh thi leh dar kha a neih avang in a phawrh seklo. A ruk in an tum thin chauh a ni. Vawk hma ah tuikeplung paihloh tur tih nen te pawh a in ang viau maithei. Sum leh pai, kan theihna, thiamna leh finna, incheina pawh han rin lut ta ila, a tul hun leh mamawh hun ni lemlo a mite hmuh a va in tihtheihpui viau, hman hun a hman tur nei leh silo leh hmang duh leh silo hi a awm theih mai awm mang e. Sum leh pai hman dan ah phei chuan zirtirna he thawnthu hian min hnutchhiah tha hle.

• Mite duhloh leh hmuhsit kawng zawh hi a sual vek lemlo. A tam lam kawngzawh tum tlat hi hlawhtlinna leh finna a ni vek bawk heklo. Lui mawng lam a mite duhloh saphai pumpui zawn thla te unau kha an va inchhir dawnlo rua em.

• Unau inhmangaihna,Bible in min zirtir ngei kha he thawnthu pawh hian a rawn zirtir  a ni. Tunlai kan Mizo society ah leh hnamdang ah pawh kan hmuh fo  chu in leh lo, nu leh pa ro inchuh vanga unau in ngeih lo leh in hmelmak ta te an ni ta fo mai. A pawi takzet a ni.

Sam 133:1-   Ngai teh, unaute inngeih dial dial a awmkhâwm hi a va tha in, a va nuam êm!

I Johana 4:20-Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh reng amah a hmangaihloh chuan Pathian a hmuh ngailoh va chu engtinnge a hmangaih theih ang? 

- Kharagpur | May 12, 2020