Sikulpui leh Sikulsen Mizoram Synod kutah hlan let

Aizawl | May 22, 2020: Sikulpui leh Sikulsen chu Mizoram sorkar kuta kum 68 a awm hnuin vawiin khan Mizoram Synod kutah hlan let leh a ni. 

Zosap Missionary Pu Zosaphluia’n kum 1898 a a din, kum 1905-a sikul building sak ‘Sikulsen’ tih leh kum 1914 a sak ‘Sikulpui’ tih building leh a ram te, sikul bungrua zawng zawngte chu Mizoram sokarin kum 1952 ah Kohhran kut atangin a la a, kum 68 zet sorkar kuta a awm hnuah a tira dintu leh neitu Mizoram Synod kutah hlan let leh a ni ta a ni.



Sikulsen leh Sikulpui hlan letna inkhawm hi School Education Director Pi K.Lalrinzuali’n a kaihruai a. Inhlan let lehna lehkhaah chuan School Education Department aiawhin Pi Esther Lalruatkimi Commissioner & Secretary-in hming a ziak a. Mizoram Synod aiawhin Moderator Rev R.Lalchangliana’n hming a ziak a ni.

Commissioner & Secretary Esther Lalruatkimi chuan he inhlanna hunah hian thusawiin sorkar rilru atang chuan sikul hlan let leh hi thil uiawm tak a ni a. Amaherawhchu Kohhran dilna hi sorkarin a zah avang leh a ngaih pawimawh em avangin remtih a lo ni ta a ni a ti a. A tirah chuan sikul bungrua hi chu sorkarin la let ila tih rawt a ni a, sorkarin a zavaia pek turin a rel leh ta zawk a ni a ti bawk. Pi Estheri chuan tunlai hrileng boruakah Task Group on Quarantine Facilities ten state pawn atanga lo haw te khunghran nan Kohhran hmunhma an dilah kohhranhote inphalna leh inhawnna zau tak an dawng chu lawmawm a tih thu a sawi a. Zoram pawn atangin Kohhran inphalna an hriatin Mizoram fakna hriat tur a tam hle a ni a ti bawk.

Rev K.Lalrinmawia Synod Executive Secretary i/c Education pawhin thusawiin Synod inkhawmpui 2010-in a lo rel thluk tawh a taka hmuh tura lo awm ta chu Mizoram Synod-in lawmawm a tih thu a sawi a. Kum 1898-a sikul din a lo nih khan kum khat chhunga hming ziak lut chu mi 60 an ni a, tuna he sikul Kohhranin a lak let leh pawh hian a bul tannaah chuan naupang 60 bawka bul tan leh chu a ngaihtuahtute rilruah a awm thu a sawi bawk. Synod Education Board chuan he sikul lak let leh enkawl tur hian Headmaster-ah he sikul chhuak leh Kohhranah pawh rawngbawltu tangkai taka hman Upa Zonunmawia chu Headmaster atan hman a ni dawn tih a sawi bawk.

Pu James Lalrinchhana Additional Director, School Education chuan report pein sikul inhlan letnaah hian ram leh building bakah Boys Middle School (Sikulpuiah) bungrua laksawn theih 254 leh laksawn theih loh 23 a awm thu te, Boys Primary School (Sikulsen) ah laksawn theih 173 leh laksawn theih loh 17, SDEO Aizawl South leh Headmaster Quarters-ah laksawn theih 18 leh laksawn theih loh 10 a awm thu a sawi bawk.

Sikulpui leh Sikulsen Mizoram Synod kuta hlan let hi Council of Ministers Meeting Dt 22.4.2019 chuan a remtih hnuah Dt 29.5.2019 khan neitu nihna chu School Education Department-in Mizoram Synod kutah a lo hlan tawh a. Amaherawhchu school Session kalpui laklawh lai anih avangin sorkarin a la enkawl zui zel a. Vawiin khan ram leh bungruate a takin hlan a ni ta a ni. Sikul hlan letna hunah hian School Education Department-a officer-te, Synod puipate leh Synod Education Board Member-te an tel a ni.

Post a Comment

0 Comments