Aizawl | May 17, 2020: Mizoram Gospel Band lar One In Christ member Lalruadiki Chhangte chu thluaka khawsikpui lut vangin damdawiin-ah enkawl mek niin exploremizoram.com huan thu a dawng.
Exploremizoram.com in thu a dawn danin, Mission Veng nula Lalruatdiki chu Durtlang Synod Hospital ICU ah thluaka khawsikpui lut vangin enkawl mek a ni a. A nu Pi Hmatei Rokhum chuan beidawn tawh hnuah beiseina kan nei sang leh hret hret a, dam taka damdawiin kan chhuahsan theih ngei ka ring, tiin a sawi.
Pi Hmatei Rokhum chuan, "May 8 zan khan Doctor te chuan zan khua a daih an rin tawh loh thu an sawi a, keini pawh inring turin min hrilh vek a ni. A marphu leh a lungphu tun thlenga ala awm hi Pathian hnena min tawngtaipuina vang a ni, tawngtaipuitu tam tak vang leh Pathian vangin dam takin damdawiin kan chhuah san thei ngei ka ring, a ti.
Ruadiki hi April ni 23 khan Durtlang Synod Hospital damdawiinah a lut a. CT Scan atanga alan danin thluaka khawsik lut tih hriat a ni. Damdawiin a luh hma ni 13 April, 2020 atang khan a taksaah in sawiselna a neih avangin a in entir a, a natna hian zual lam a pan tak deuh zel avangin damdawiinah hian admit a ni ta a ni.
Kum bul lam daih tawh khan City Hospital, Aizawl Mission Vengah damlohna avangin thla khat chhung vel a lo in enkawl tawh a. Dam taka chhuakin KTP General Conference, Serchhip-a neihah khan damkawr takin a zai nghe nghe a ni.
Pi Hmatei Rokhum chuan, tunah chuan a thawkna puitu, ventilator hmanga sang taka thawk tir pawh hniam thei ang bera thawk tir a ni tawh a. A thluaka khawsik awm pawh tunah chuan a zia-awm tawh a. A blood Sugar sang lutuk leh Sodium sang taka awm pawh a pangngai leh tawh a, tuna kan nghah ber chu a rawn harh chhuah chiah hi a ni, tiin a sawi a. Tawngtaipui reng turin mithahnemngaite a sawm nghal bawk. Hospitala thawktute enkawl dan sawiin, Doctor leh nurse ten min buaipui danah ka lawm, ka thlamuang a, an mahni kal tlangin Pathianin a tihdam ngei ka beisei a ti.
Lalruatdiki hi unau piang panga zinga milai a ni a, pianpui mipa pathum bakah laizawn pakhat a nei. One In Christ Band ah hian kum 2013 vel atang khan a tel tana, a telna hmasa ber Music Video chu "Ka zinna ram, thlalerah," tih kha a ni. Zai lam tui tak niin a mimal pawhin zaia rawngbawlin Mizoram hmun hrang hrang a lo kal kual deuh vek tawh a. One In Christ Band khai dingtu ber leh Mission Veng Pastor Bial Zaipawl member nilai mek a ni bawk.
With input from- Marova Colney Bungsut
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: