Mizoram Science Congress 2020 Online in buatsaih dawn

Aizawl | May 27, 2020: Mizoram Science Congress Organizing Committee chu nimin tlai khan Directorate of Science & Technology Conference room-ah an thukhawm a, tunlai COVID-19 hrileng avangin he Congress hi neih dân pangngaia nei lovin online-a neih an rêl.

Meeting hian Science Congress hi a theih ang anga online-a neih an rêl a, a hmingah Mizoram Science Congress 2020 (Online) tih pawm tlangin, a thupui (theme) atan ‘Science as a soul of prosperity and sustenance’ tih thlan a ni. 

Mizoram Science Congress 2020 (Online) ah hian Online International level conference-te, zirlai leh Mizo pa tualchher thil siamthiam te pual online exhibition-te buatsaih tum a ni a, science lam zirbingna (research) ti mêkte tân pawha lukhawng nei lehzual turin online presentation bakah Congress puala research publication bu siam tum a ni bawk.

Meeting hi Chief scientific officer leh Organising chairman Dr RK.  Lallianthanga'n a kaihruai a, Mizoram Science, Technology & Innovation Council (MISTIC), Mizoram Science Society (MSS), Mizo Academy of Sciences (MAS), Science Teachers’ Association Mizoram (STAM), Geological Society of Mizoram (GSM), Biodiversity & Nature Conservation Network (BIOCONE) leh Mizoram Mathematics Society (MMS) atang tein pawl aiah pakhat theuh an tel a ni.

Post a Comment

0 Comments