Mihring tana hlauhawm Mathanol laka fimkhur turin mipui hriattir

Aizawl | May 16, 2020: Directorate of Health Services (Food & Drugs Administration Wing) thuchhuah siamin Methanol chu hand sanitizer leh a kaihhnawih siamna atana hmang lo tur leh mihring tana hlauhawm methanol laka fimkhur turin mipuite a hriattir niin exploremizoram.com chuan thu a dawng.

Exploremizoram.com in thu a dawn danin, Directorate of Health Services (Food & Drugs Administration Wing)  chuan Tunlai hian mi thenkhat Methanol (Methyl alcohol) hmanga Hand sanitizer/Hand rub siam an awm tih an hmuhchhuak a. Methanol hi Wood spirit (zu chhe siamtu) a ni a, in emaw hipluh emaw, vuna hnawih emaw hian mihring tan a hlauhawm em em a ni. 10 ml atanga 30 ml lek hian mihring puitling a tihlum thei hial a ni.

Public health agencies ten an report danin Methanol hian Virus thah theihna a nei chaurau hle a, Covid-19 atan phei chuan a hmantlak loh a ni.

WHO. leh US FDA te, Public health agency hrang hrang ten Covid-19 atana Alcohol-based sanitizer atana tha an tih chu Ethyl alcohol (Ethanol) leh Isopropyl alcohol (2-Propanol)-te chauh hi an ni a. Chuvangin, tumahin Hand sanitizer/ Handrub leh Surface cleaner siamna atan Methanol (Methyl Alcohol) hmanglo turin mipuite Directorate of Health Services (Food & Drugs Administration Wing) chuan a hriattir a ni.

Mipui-te pawhin thil leite nguntaka en a, hetiang atanga siam hand sanitizer emaw Hand rub leilo turin mipuite a ngen bawk a ni.