MESSAGE OF SINLUNG HILLS COUNCIL CEM LALTHLAMUANA HMAR ON MARTYRS' DAY 16th MAY, 2020.

Sinlung Hills mipuihai popo inrengin Pasalțha fam tahai hmingin chibai ka buk cheu.

Tukum Martyrs' Day chu hripui(Covid19) inlêng leiin mumal takin ei hmang thei ta naw inla khawm mipuihai hin, ei Pasalțhahai hi lungril taka inzana chibai ei buk thar hi a țul tak zet.

Vawisun ei tlung theina dingin ei Pasalțha hai khan mawphurna insang tak an inbel a nih. Kha hnam kalsiem a khan a fatu/tucha tak ni tumin țhang an lâk a nih. Chuong chun, beiseina meiser de vêt vêt chu khamhrui anga chelin, țhangthar hai indikna ram tiem chu an lo tlir zing lem a nih. " *Ka ram le hnam ta ding chun thi khawm ka thi el ding a nih. Amiruokchu, ka hnam hi keima leiin a thi ding an nawh*" ti'n, an inchûkna dam, an fak zawngna dam, Insung, Kohran le Khawtlang maksanin an hringna le an iengkim kha an lo inhlan a ni lem. Chu lungril sunga thawktu anni a um kha an thukin an sang a nih.

Tlawmngai, Huoisen, Ringumna le inthuruol taka an lo beina zarin țhangthar haiin vawisun hun hi ei tlung a. Pasalțha hai inpekna zarin țhangthar haiin vawisun hin beiseina insang tak ei nei a nih.

Ei Pasalțha hai inpekna zarin hi chen hi ei tlung ta a. An sulhnung zui dingin eini țhangthar hai khawm tuhin an thisen chun a mi ko a nih. An hnung zui ding hin kutchawi le tharum hmang kher a țul ta nawh. Ei hnam a hung parvul deu deu theina dingin hnam dang dan țha hai le ei dan țha hai suk hring pei a țul tak zet. Ieng hnam khawm mani le mani indo chu an tlu sie hlak. Daw theina le țawngbau țha hi mi lungril hnenna a nih.

Hnam ropui le inzaum ei hung ni theina dingin mimal tinin ți lo le zam lova ei bei hram hram a pawimaw hle. Dawizep nun nei lovin huoisen takin hmatieng pan pei ei tiu. Ei huoisen dan ding ruokchu selna hai, ringumna hai titakna hai, teirei peina hai leh a mi siemtu dit zawng ni raw se. Țhangthar la hung um pei dinghai khawm chi țha intu tum ei tiu. Chuong anga țhang ei lak chun ei ram le hnam chu khawvel hrieta inthangmawi ngei a tih.

A tawp taka ka hril nuom chu khang Pasalțhahai popo kha vawisun hin eini lai țhang ta naw sienkhawm, an hming hi țhangthar suon tam tak hnunga khawm hung vul zing raw se.

Sinlung Hills Council hi ei renga ei ta a ni a. A enkawl dan ei thiem a pawimaw hle. Ei renga ei țhangruola, zaikhata luonga, hma ei dawmtlang chun ei area sung hung mawi a ta, ei hnam khawm par angin hung vul pei a tih.

Ka lawm ie.

LALTHLAMUANA HMAR
CEM SHC