Aizawl | May 15, 2020: Mizoram sawrkarin kohhran hrang hrang hnena Quarantine centre atana Kohhran hall hman a dilna chu Baptist Church of Mizoram (BCM) pawmin hman a phal niin exploremizoram.com chuan thu a dawng.
Kan hriat ang in India ram hmun hrang hranga Mizoram mi awm te Sawrkar laipui leh State sawrkar in Mizoram lamah a hruai haw mek a. Hetih lai hian ram pawn atanga lo haw te khung hranna (quarantine centre) tur hi Sawrkar hmun neih sa ten a daih sen loh avangin Mizoram sawrkar chuan Quarantine Centre atan Kohhran hrang hrang te hnenah an Kohhran/Biak In Hall te Quarantine Centre-ah hman a dil a.
Hemi chungchang hi BCM Administrative Committee chuan May 14 khan a ngaihtuah a. Sawrkar in kohhran a dilna hi rem a tih thu leh a inhawn thu Mizoram sawrkar leh Tualchhung kohhran hrang hrang ah a hriattir nghal a, Tualchhung kohhran engemawzat-in Mizoram Sawrkar-ah an Biak In Hall hman an phal thu leh a tul anga Sawrkar tawiawm tura an inhawnna leh an inphalna te an hriattir tawh niin BCM website ah tarlan a ni.
Hemi chungchangah hian BCM General Secretary chuan Kohhran hote hnenah ngenna siam nawn lehin, Sorkar lamin ruahmanna an siam angin Quarantine turte hi Kohhran Pawl bik leh veng chhung a mi te chauh ni lovin, Sorkar-in remchang a rawn dah ang a lo in hawng tur leh sorkarin a mamawh ang zela lo in hawng zau turin ngenna a siam bawk.
Post a Comment
He post chungchanga i ngaihdan lo sawi ve rawh: