LAWMNA A KHAT RILRU THIANGHLIM!

- Kenny

Columnist, Explore Mizoram

Covid-19 outbreak in India ram mi a nghawng hma aṭanga ka vei ber pakhat chu tangkhang tur te dinhmun leh economy a nghawng lutuk tur kha a ni a. Chutih mek laiin hri leng hlaua inven kan tum dan mak tak pakhat chu an dinhmun khirhkhanzia chhutpui map lova ram pawna tangkhang te lo haw huphurh tlatna rilru hi a nih miau avangin ka timeline ah hian ram pawna tangkhang te fuihna thu takngial pawh ka hnutchhiah khât khawp mai a. Mahse, Quarantine Facility a awm mek te leh ram pawna tangkhang mek te beng a thlen takin tun ṭum chu ka ziak ve duh..

Lengpui Airport khar hma nia lo haw te Quarantine dawn ṭum khan kan ri hluai mai a, nizan news lamah pawh kan ri leh hluai. Chhut chet chet chuan lo la haw tur te tan a huphurhawm dawn mang e..

Kan hre vek a, Sorkar hi he hri hmachhawn tur hian a inpeih lo a, a inrin hman lohzia chu a thuchhuah a zûk zùk zùk danah khan a chiang reng a. Ngaihtuah tur a tam a, kil tinah pawp hnawh tur a awm a, ke pen tin kha bul ṭanna a ni zel bawk a. Chutih lai karin state a zawnga state rethei ber pawl kan la ni ta dah a. Sorkar hian engtiang pawhin hma la se kil leh lam aṭangin demna leh vuivaina a lo chhuak ngei ngei emaw tih tur a ni a. Ram hruaitu te tana he hun luhaithlak turzia leh zo fel vat vat tura duhthu an sam nasat turzia hi a chiang reng.

Mahse Mizo kan ni hlauh a, Kristian kan lo ni miau mai a, a thei thei inphungbawm tawn zelin vawiin hi kan thleng a. Sorkar zawk pui turin a nei zawk te pawhin CM Relief Fund ah sum an chhung ruih ruih a, hei chen hi kan la ṭan theih phah. Heng zawng zawng hi chhut chet chet ila, sorkar hmalakna hi kan duhkhawp e tihna ni lovin lawm veng vengna tur leh inchhuan phahna tur tling hial thik tam tak ka hmu..

Chutih laiin ram pawn lama tangkhang rawn haw ten vuivaina leh phunnawina an rawn hmu nghal terh tuarh zel mai hi an khawngaihthlak teh a sin! An quarantine chhung zawng lungawi lohna nen an hmangral dawn chu a ni si a le, an ning ve ngat ngat khawp ang chu.

Mahse, kan ti leh teh ang. Ram leh hnam himna tura khung hran an nih laia hrehawma siamtu hi sorkar em ni? Sorkar chuan thawktu indaih lo tak leh sum leh paia phang em em chung pawhin a theih tawka ṭha chuan a inruahman ve a, zan pawh mu hman mang lovin an buai a, a buaipuitu lam phei chu an stress nasa em em a, engkim ning hlui khawp hialin a ni an buai hlawm tawh ni!

Chuti ni se ram pawn aṭanga rawn haw te hi tuin nge ning ngawih ngawih tura lo siam ta chu ni ang? Tu dang ni lovin an rilru sukthlek zawkin a ni hetianga hrehawm taka siam zawk chu ni..

State changkang zawk leh khawvel ram hausa zawk te in buaipui dan an thlir a, kan economy, hmanrua leh a thawktu lam theihna ten a phâk loh nasatzia chhut miah lovin chumi level ah chuan awm an tum a. Chu chuan an rilruah vuivaina leh lungawi lohna hi a siam ta zel mai niin a lang.

"Kan phak tawk a ni rih si a" ti thei mai chu ni se, ram leh hnam him zawkna tura khung hran an nih hi lungawi lohna nen ni lovin ram leh hnam pasalṭha anga inngai chungin an hmang ral zawk tur a nia le. Mahse, kan level aia sang an beisei tak miau siah chuan lung a awi thei ta ngang lo a ni.

He post an Screen Shot hi vawiin Mizoram Internet khawvelah a darh nasa em em a, a hmutu ten comment an pek dan pawh a inkarkik hlawm nak nak teh e. Ram pawna tangkhang te kawnghmang kawhhmuh leh dappuia phak ang tawk tawka hman chang changa buaipui tura kan lo inpek ve avangin tangkhang whatsapp group kan siam 'Stranded Mizo' tih group 4/5 mai bakah Welfare ṭhenkhat pawh mimala an group a min add an awm nual a. Chung zinga group pakhatah chuan he thlalak hi an rawn share lut ta a lawm maw le. Chu group a la tangkhang mek te zawkin an dem zawk chu sorkar ni lovin 'ram pawn aṭanga rawn haw hlim, hetianga vuivaina rawn hmu zut zut te hi' an ni..

Mahni ramchhung ngei maia quarantine an ni thei bik te kha an awt em em a, sorkar in a thlawna a chawm te kha an lawmpui em em a. Dinhmun inthleng theih mai an nâp hlawm a ni ber. A ni reng lah tak a, tuna la tangkhang zingah hian:

- Sum khawl ve ang ang hmang zo tawh te

- April thla inluah man pek tur nei tawh lo te

- Ei tur mumal pawh nei tawh lo te

- An awmna khuaa Mizo dang awm ve miah lo te..

harsatna in ang lo tak tak, luhaipui tham leh nun beidawn rum rumna tham tawng mek te an ni hlawm fur a. A beidawng tak tak zual tawh ho te phei hi chu Zoram lam aṭanga support thei chhungkua nei lo zawk an la ni deuh zel leh ta nghal a! Anni tan chuan tuna vuivai te chaw dawn ngawt pawh hi chil tiput tham a la ni hial thei nia! Zoram an thleng thei ngawt bik pawh kha a awhin an awt ngawih ngawih mai a ni..

Chu chuan Tom Sawyer thawnthu kha mi hriat chhuah tir zawk mai a.

"A niin an huan pal rawng hnawih tura a tih khan a peih lo em em a, a ṭhiante kianga infiam ve a châk em em mai a nih kha. Mahse a ṭhian ten an rawn hmuh chuan nuam ti awm em em mai hian faifuk chungin lungawi hmel hliah hliah khan a lo hnawih a. A ṭhiante biakna pawh hre lo derin a rawng hnawih lai chauha rilru dah leh lungawi hliah hliah ni awm khan a rawng hnawih sa te kha faifuk rat ratin a'n thlir kual vel a. A nuam ti hmel lutuk leh lungawi lutuk hmel kha a ṭhian ten awtin, midang hnathawk lai nuihzat leh fiamthu thawhna atana hmang zui ṭhin te ngei ngei pawhin hnawih ve an dil ta hial hlawm a. Ani lah pek lo â lo nasa, "Naupang chungchuang bik tan lo chuan hnawih chi a ni lo.." a ti deuh hmak mai si. An hnawih chak ve lutuk khan a hnawih tir ve chuan an thil neih an pek tur te kha an tiam ta hial a. Nileng maiin a ṭhian te rawn hnawih lai thlir deuh deuh chungin tlai lamah chuan an thil neih a neih sak ta vek mai a nih kha.."

Heng thu hi ngaihtuah chiang ila, hringnun hlimthla a lang chiang a sin.

He hun harsa takah hian atu mai pawh kan buai belebut but but vek a, kil tinah buaipui tur kan neih ṭheuh avangin mahnia a ṭha ber pawh atu amah hian kan chhuah hlei thei lo. Chuvangin tun hun hi vuivaina leh lungawi lohna zawn hun a ni lova, midang tiphur tur leh nawr kal zel thei tura kan thil intihsak beitham te te ah pawh lawmna tur lai zawn zel hun zawk a ni. Chu chuan kan inlungrualna siam ṭha zelin mi a tichak zual zel ang a, covid-19 ngei pawh hi kan theih leh thiam tawka ṭhain kan hmachhawn thei mai dawn a lo ni..

Chuvangin, quarantine facility a awm mek te leh rawn la haw zel tur te pawhin, "Lawmnaa khat rilru thianghlim" hi i nei phawt mai teh ang u. Quarantine facility te chu kan choka leh pindan chhungril anga changkang a nih theih lohzia chiangtu vek kan nih kha maw..

"Lawmnaa khat rilru thianghlim,

A mawi tuk tin par aiin,

Fakzai vawr rilru thianghlim chuan,

A ning lo tlai nilenin.."