LOCKDOWN 3.0 HI!?

- Kenny

Columnist, Explore Mizoram

Lockdown 2.0 a zo a, Lockdown 3.0 ah kan lut ta. Zing khat kan hmang chhin dek dek a, rilru chuan Mizorama ICU leh ventilator kan neih ve dan te a hisap nghal a. Isolation Ward him leh lian ṭha si kan nei thei ang em tih te leh Quarantine facility hian mi a daih meuh ang em tih te nen lam rilruah a luah nghal ngawt pek!

India ram hi ram rethei tak mai kan ni a, a retheih ngaihtuahin mipui lah a maka maka tam kan awm bawk a. Chutih rualin 50% aia tam mah tur chu Pandemic awmzia hre lo leh Public Health concern pawh lungkham vak lo tur chi kan la ni ta dah a. A nih, engvangin nge India hian chuti chunga LOCKDOWN a thlah dul si!?

Sorkar laipui hian he pandemic outbreak hi hneh a duh lo a ni lo a, a hma zawng aia khirhkhiap zawka lockdown hi kalpui a duh ngei pawh a rinawm. Mahse kan retheihna vanga mipui rilṭam mangang an in hot buk a nih vaih chuan, inthlahdul aia pawi zawk - intualvuakna hial pawh a thleng thei tih a hriat chian em avanga inthlahdul ta ti ila kan tisual tampui kher lovang.

Economy tlachhe tur ven a duh a, mahse pandemic outbreak do chat tur khawp pawhin thawktu a ngah tawk lo a. Chumi hre ran chuan lockdown a thlah dul a, office/institution leh firm hran hran ten fimkhur taka hna an chhunzawm a nih chuan labour force te laka mawh chu sorkar ni lovin heng firm te kovah hian a tla tawh dawn tih a hrethiam a. Fing takin ruahmanna a siam a, kawng leh lamah chuan kut a sil ti pawhin a sawi theih tho awm e.

Chutih rualin he ruahmanna fing tak anga lang hi India ram ang, hriselna ngai pawimawh lo tam zawkna leh mahni inven a pawimawhna pawh varpawh lo tam zawkna ramah hian a nihna ang hian kan hmangchhuak pha meuh ang em tih hi rilrua a zawhna a ni a. Beisei a sang lem lo..

Kar hnih khat han liam se, ni khata case detect zat hi a let dawn dawna a sang chho a nih pawhin a mak vak lo mai thei.. Chu erawh thleng lo hram se..

Mizoram lam pawh thlir ta ila, hetia sorkar laipui inthlahdul ta hret hret hi a hma aiin kan him zawk ta telh telh emaw ti tlat kan awm nual niin a lang a. Social Media leh kan ṭawngkam chiah hian kan hlau a, inven kan tum a, nitin nunah kan hre zui lem lo ni te pawhin a lang..

Chutih mek laiin hetia lockdown 3.0 in mipui min thlah zalen tak hret siah chuan state tin ten remchanga lain rampawna an state mi tangkhang te lakchhuahna hun ṭhaah an hmang vek hlawm a. Kawng lehlama awlsamna hi mipui lam kan zalen luatah kan him lohna tizualtu a ni daih thei..

Mi che vel an awm loh lai maha inveng hneh mang lo kan nih laiin, mipui hetia kan phut mur mur phei chuan kan inveng hneh dawn lo tih a tichiang reng a. LTF lam an inthlahdul ve miau avangin, ramri pawh a him meuh ang em a chiang ta lo, ramri depa awm te an lo inthlahdul ve a nih ngat phei chuan..

Kumin chhung chu a khat tawkin rampawn lama unau te thiar chhuah hna hi kalpui chhoh zel te pawh a ni thei a, chutih lai kara keini kan lo zi huai huai a nih si chuan paragraph hmasa berah bawk khian kan kir leh ang.

A tawi zawngin:

"A HMA ZAWNG AI KHAN KAN HIM LO"

tih hi mimal tin hian kan rilruah kan hriat reng a, inthlahdah lova fimkhur chungin, a theih hram chuan chhuah loh zel kha kan himna leh Physical Distancing vawn dik theihna ber a nihzia hriain a theih chin chin chu i in self-lockdown chhunzawm zawk teh ang u..

Chuti lo zawng, vawiina kut kan benpui 'Lockdown thlahdul' hi nakin lawkah kan la ṭahpui hluam hluam thei si a..

Fimkhurah fimkhur luat a awm lo e..