SEPARATION OF CHURCH AND STATE - 2

PART-II

- Zohmingthanga Pachuau

Columnist, Explore Mizoram

Separation of church and State tih chu Mizo tawng chuan sakhua leh Politics kal hrang tihna a ni ber mai àwm e. He tawngkauchheh rawn sawi lartu hmasa chu US president Thomas Jefferson a ni a. Kum 1802 kum daih tawha Baptist kohhran, Danbury, Connecticut hnena a ziak a ni a ni a, US constitution first amendment Bill of Rights atanga a ngaihtuah chhuah a ni. A hnuah Massachusetts newspaper-ah chhuah (Published) a ni nghe nghe a ni.

POLITICS TO BUL: Khawvel mihringin 'Politics' tih tawngkam a hriatna hmasa chu Ancient Greek City State hun lai daih tawh khan a ni a. Hman lai Greek mite kha an hun lai chuan tuipui kam hrulah te, luipui kam phai ruamah te an awmna tur khawpui (City State) an din thin a, chu chu a hmingah pawh 'City State' an ti mai thin. City State hi Greek tawnga 'Polis' tih nen thuhmun a ni a. Chûng Polis-te hamthatna leh himna tur kawng zawnna chu Greek mite chuan 'Politikos' an ti a, sap-hovin 'Politics' tiin an tawngah an seng lût a, Politics tih hi kan lo hre chho ta a ni. Tichuan he tawngkam hi- "Ram emaw, hnam emaw hmakhua, thlirna leh ngaihtuahna" tih a lo ni ta a ni. Mizoram Presbyterian Church Synod Social Front pawhin 'Political Education' hi an lo buaipuiin an lo zir nasa nangiang mai a. Rev. Lalthanmawia chuan, "Politics hi Pathian atanga chhuak, Pathian din a ni" a ti hial reng a ni. Rev. Lalthanmawia chuan heti hian a sawi a, "Pathian-in Adama chu Eden huan venga enkawl turin a dah a (Gen. 2:15)... Hetah hian 'Vêng' tih leh 'Enkawl' tih hi chhinchhiah bîk tur a ni. Vêng tih chuan tichhetu leh chhiat theihna laka venhim a kawk nghal a ni. Chu vang chuan, ram humhim hnà hi politics hna pawimawh ber te zinga mi a ni." 

Politics hi a hming kan hriat achin, ram inrelbawlna atâna khawvelin kalphung a hman hmasak ber chu 'Theocratic government' a ni. Chûng hun lai chuan an hotu ber lal hming atân pawh an lal chu Pathian ruat nìa ngaiin, 'Patesi' an ti thin. Patesi chuan sakhaw thilah pawh 'Puithiam' nih a fâwm nghal bawk thin. Ram leh hnam inrelbawlna leh sakhaw thil zawng zawngah an lal (Patesi) chu engkima engkim a ni. Kan sakhaw puipate zinga mi, Rev. Zairema chuan, "Politics hi a bawlhhlawh êm a, kohhran hruaitute an tel ve tur a ni lo," tih hi a ri zing hlê a, a ring hlê bawk. Kohhran hruaitu zinga politics lama lutte chu kan hmu sakhi a, a rawngbawlna pawh kan ngainep deuh em aw tih tur a ni. Heti ang hian kan ngainep tak tak a nih chuan, "Kan ram politics hi a bawlhhlawh êm a, Kohhran hruaitute telna tlak a ni lo; serh leh sâng nei vak lote hian enkawl mai se, kan tihna a ni ang a, a atthlak hlê dawn a ni" tiin Politics hi a bawlhhlawhnate tihthianghlim kan tum zawk tur a ni a ti. Chutih mêk lai chuan, Presbyterian kohhranin a zirtirna kan lak leh kan pawm ber mai zinga mi, John Calvin-a chuan- "Sakhua leh Politics hi a hrang (Separate) tur a ni" a ti hlauh thung a. 

Sakhua leh Politics a hrang tur a ni titute zingah US President  John F. Kennedy kha a tang na pawl tak a ni àwm e. US Constitution first amendment-ah chuan, "Congess shall make no law respecting an establishment of religion, or prohibiting the free exercise thereof...,” tih kan hmu a, a awmzia chu sakhaw tih bîk (Zah bîk) neiin eng dàn mah kan siam tur a ni lo va, zalèn taka an sakhua an biak kan khapsak hi a thiang lo a ni tihna a ni ber mai àwm e. John F. Kennedy chuan September 12, 1960 khan Rice Hotel, Houston, Texas-ah, "I believe in an America where the separation of church and state is absolute...," tiin Separation of Church and State hi US ram inrelbawlnaah a awm tur a ni a ti a. US President tho, Thomas Jefferson pawh khan, "Sakhua leh Politics inkarah lung bang lian tak a awm tur a ni" a lo ti bawk a ni. US Secretary of Education lo ni tawh Betsy Devos pawhin, "US constitution hi Christian extreme lakah a dinhmun a derthawng hlê a ni" tiin politics-a sakhaw tih bik a duh lohna thu a lo sawi ve bawk a. Amah hi radical Christian a ni nghe nghe a ni. Vawiinah chuan US president-ah Donald Trump-a hmel kan lo hmu ta a. Ani hi theocractic government rim rawn tinam lehtu a ni tiin ziaktu tam tak chuan an sawi. Christian extreme tak mai a ni a, a sawrkar kalpui dan hi US constitution kalh a ni tiin demtu pawh a ngah hlê a ni. India ram hi han inen ve ta i la, miin theocratic government rim a nam tiin, sakhaw pakhat tih bik (Favour) nei sawrkar kan hrawn mêk a ni titu lo awm pawh ni se, politics-a ram inrelbawlna kan hmelhriat tirh atanga a history han chhui han chhui hian ram dang ang bawkin sakhua chu politics ball-ah an hmang ve a nih hi kan ti thei ang. Ram bung khat mai ni lo, regional/ State government pawh hi han inen i la, a tam zawk sakhaw based politics (Theocracy) hi ram inrelbawlna te, kan dan hman mêkah te, hmasawnna hna kan thawhnaah te a lo langsar leh thin. 

Christian thlirna atang chuan politics chu a Christian tur a ni a, sakhaw dang betu thlirna atang chuan an sakhaw milin a kal tur a ni ve bawk ang. US president John F. Kennedy phei kha chuan Tax payer-te sum sawrkara lut khu, sakhaw pakhat pual (Religious school) zirna ina hman a duh lohna thu pawh uar takin a sawi nghe nghe a ni. Amah hi Christian, Roman Catholic a ni nghe nghe a. A thusawinaah mipuiin, "I sakhaw biak hian president i nihnaah hian thutlukna siam kawngah nghawng a nei em?" tiin an zawt a, ani chuan, US constitution mila a kalpui mai thin thuin a chhang a ni.  21st century hunah hian conservative Christian-te avangin Separation of Church and State hian a nih tur ang a ni lo ta hlêin mi tam tak chuan an ngai ve bawk a ni. Tun contemporary world politics-ah hian conservative politics a lar thar hlê a, hei hian keini India ram te pawh min kang kai a ni. US meuh pawh khu an constitution-ah sakhua leh Politics a kal hran duhin ramri kham han tum viau thin mah se, President Donald Trump-a hunah chuan theocratic government kan hmu chho mêk a, melting-pot nation an lo tih thin hnam hrang hrang infin khawmin ram ropui a siam US meuh pawh sakhua avangin an ram (Politics) inrelbawlna chuan sawiseltu a ngah ve hlê a nih khu! India ramah pawh Prime Minister Narendra Modi sawrkar hnuaiah chuan, US ang thovin theocratic rim nam, conservative politics rim nam kan hrawn ve mêk bawk a ni. Hêng zawng zawng hi contemporary world politics hrin chhuah a ni a. Chû mai ni lovin, ram inrelbawlna (Politics) anga inawpna hmasa ber tih theiha kan hriat Mesopotamia ram inrelbawlna pawh kha theocratic government hi a nih tlat avangin, sakhua hi politics atangin kan la hrang tak tak ngai dawn lo niin a lang. Chu vang chuan, kan sakhaw puithiam Rev. Zairema, muangin chawl se, te'n, "A siam that hna kan thawk zawk tur a ni" an lo tih angin, a famkim lohna zawng zawng hre chungin siam that hna kan thawh mai hi a tul tlang a nih hi maw...!