Rev Dr H. Sangkhuma Cardiff, Wales, UK a Chaplain awm mek chu COVID-19 vei zinga rawngbawltu, he hri puiin harsatna tam tak a ken tel a hma chhawn a. Chung harsatna hrang hrang hri pui leng kara rawngbawlna a neih dan te rawn ziak tura sawm anih angin a rawn ti hlawhtling thei a, a lawmawm hle mai. Hei lo pawh hi, Europe chhung dinhmun thil hrang hrang pawh rawn ziak turin kan beisei zel a ni.
He hri pui COVID-19 avang hian Sapram (UK) ah pawh mi an thih belh zel a. Report thar berah chuan mi 36, 675 an thi tawh a, vei thar mi 2, 959 an awm, mi 282 an thih belh. Wales bik ah mi 1, 260 an thi tawh a, vawiinah mi 6 in an thih belh bawk.
Sapramin he hri pui a lo hmachhawn dan hi a mak a, an zuam sual a ni ber. A tir atang khan trade, commerce leh tourism lama an hloh tur kha an hmu chiang sa a. London ah hian nitinin khualzin (tourists) mi 110, 000 an lut ziah. Khang mite kha airport hrang hrangah screening test lovin an chhuah zel a. Tutenge an nih chhui zui a awm bawk si lo. Mimal zalenna an ngai pawimawh avang hian in khuahkhirh hi an ngam lo a ni ber. 23 March atang khan lockdown pawh an kalpui ve chauh a, tun thlengin partial lockdown a la ni reng. Vawiin (May 23) chhunah pawh park leh beach ah mi tam tak an la inti hlim a. He hripui hlauhawmzia hi an ngaihtuah hman rih lo a ni ber mai. Tun thlengin quarantine pawh an la kalpui ve lo bawk. Ni 8 June atangin thlawhnaa rawn lut te chu anmahni sumin an in khuahkhirh ang an ti ve chauh. He dan zawm lo chu £ 1,000 (Rs 96,000 vel) chawi tir an ni ang. Chu chu thla thum danah ennawn tur an ti. Nitin a khualzin lo lut zawng zawngte hi khuahkhirh lovin an chhuah zalen mai mai rih anih chu. Hengte avang hian mi 6 zela pakhatin he hri hi vei a rin a ni, a bikin thalai zingah an tam rin a ni bawk.
Chaplain hna avanga he hripui vei ngei hmachhawn a, thlamuanna thuchah sawi hi thil harsa tak a ni. An thi mek lai hmuh leh chumi hnu a an chhungte phone hmanga biak zui chu thil tih hrehawm tak, mahse, rawngbawlna pawimawh tak, tih mak mawh kan chung a lo thleng a ni bawk si a.
Chhungkaw intih buai avanga insual, nasa tak a in hliam, thi mai tur Accident & Emergency ward a hmuh leh tawngtai sak hi thil harsa tak a ni bawk. A rawn hruaitu chhungte an lainatawmin an thlaphang hmel hmuh a hrehawm em em bawk.
Doctor leh Nurse te an hah a, an beidawng a, an thil hmachhawn mek hi thi leh dam kar thil a ni, thlamuan an ngai. An chawlhna room emaw, chaplain room ah emaw a lo kawm leh tawngtai pui hian huaisenna leh chakna thar a pe thin
Zu leh drugs an tih nasat avanga nupa, an fate hmuh lai a kut in thlak fo thin te avanga naupang thlabar Police ten an chhanchhuah hi 150% velin a pung.
Chenna in nei lo, mi bo, tlanbo lui, raltlan, Europe ram dang leh ram hla zawk atanga kut hnathawk leh nupa in then (fate in enkawl chhawk) te hian harsatna lian tak tak an tawh hi 128% velin a pung bawk.
A tha lama thil thleng chu chenna nei lo te hi Charity pawl hrang hrang hmalakna avangin an chenna ngaihtuah sak an ni. Nunphung pangngai an zawh lehna tura buatsaih nan an hmang tangkai hle bawk.
Hetiang harsatna hrang hrang tawkte tanpui tur hian kristian leh charity pawl hrang hrang an tangkai hle. Heng pawlte hian telephone hmang leh Police te nena in be rawnin an tlawh a, tam tak an chhanchhuak a ni.
Sorkar, sumdawnna hrang hrang leh mipui hian damdawiin leh tarin a thawkte hi an duatin an thlawp tha em em a. Dawr lian tam zawkin an thil zawrh 50% thleng a tih tlawm sakte an awm. Heng dawr lian ah te hian mi tam tak pawnah lo in tlar put mahse an badge/ card/lanyard an hmuh chuan direct in an luh tir zar zar thin. An thawhna hmuna chaw lo pe tawk pawl an awm reng bawk. Harsa lova an tlan zung zung theih nan an motor a thlawn a lo en dik sak pawl an awm bawk. Thawktuten harsatna tawk lova an hna tha taka an thawh theih nan an theihna zawn theuhvah that an chhuah vek anih chu.
Mizoram chhunga Social media a thu ziak țhenkhat ațanga thlir hian kan unau te ngei ngei India ram state hrang hranga awm te Mizorama lo haw tur ngei pawh țhenkhat chuan kan lo huphurh lutuk deuh em aw tih te, kan chhehvela hnam dang awm zawng zawng te he hri pui kai ang maia kan ngai te, an laka kan rilru putdan te hi inenfiah kan ngai em, India rama awm leh India khua leh tui ni reng chung sia a mihring leh an sakhua leh an culture hriatthiampui tumna lam aia dona lam rilru hi kan pu zawk em tih te hi ngaihtuah chian a ngai hle niin a lang.
- Sangkhuma, Cardiff
(Rev H. Sangkhuma hi tunah hian Heath, Llandough Neath Port Talbot and Morriston hospital, South Wales ah te chaplain in a thawk mek a, țawngțaipui a ngai hle a ni. - Huna Kawlvawm).
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: