GYPSY

#THUHMA

Detective story nen ka rawn let leh ang, ka ti kha a ni a. Mahse, tuna ka rawn dah thar tur hi nikum lam aṭang tawha ziah tum ka ni a. Story dang dangah ka pakai san ta zel si a, tun ṭum chu Detective lam hawi rih lo phawt mai ang u aw. Mahse, Detective story erawh remchang ah rawn tih chhuah leh ka tum tho ang. Khawngaihin min lo chhiar chhuah sak leh hram dawn nia.

CHAPTER--1

By:- Rs Thangluah✍🏼

Kum 12 mi ka nih hian min hringtu leh min hmangaih em em tu, ka nu chuan min boralsan a. Unau pianpui ka neih loh vangin ka nu kha ka ṭhian ṭha ber a ni ṭhin. Ka nu in min boralsan aṭanga kum 1 pawh a liam hma in ka pa chuan nupui dang a nei leh nghal a. Ka pa nupui thar chuan hnawk min tih vangin an bulah ka awm a rem ve ta lo. Ka nu chhang chiah ka putea te bulah chuan ka awm ta a. Mahse, In lamah ka chet a ngaih ṭhin vangin ka zirns chawlhsan a ngai ta a. Class-10 thleng chu min kal tir ve a; mahse, ka chhunzawm thei ta lo. Lehkha zir tawh lo mah ila, ka hmuh phaka lehkhabu awm tawh phawt chu ka chhiar ve nasa thei em em ṭhin.

Ni leh thla a liam a, kum lai a lo vei ve ta. Ka pitei(ka putea nupui) chuan thawmhnaw daqr a nei a. Kei erawh In lamah hna ka thawk ṭhin thung a. Ka putea te hian fanu 2 an nei a, kei aiin an upa ve ve bawk a. Anni chuan lehkha an la zir a, ka hunawl neih ang chhun chhunah an lehkhabu te chu ka lo chhiar ve ṭhin. Ka putea te bulah chuan kum 20 ka nih thlengin ka la awm a, min enkawlnaah vuina ka nei ngai lo. Mahse, pitei te nufa in min tih ṭhin dan erawh rilru na taka ṭah chang ka ngah ṭhin khawp mai. Ka putea hi chuan min duat a, a fanu ang tak takin min en a, min hmangaih tih pawh ka hai lo. Mahse, a nupui fanau te erawh chuan hnawk min ti tih erawh ka hai mawlh si lo. Ka putea awm lai chuan ṭha tak takin min bia a, ka putea awm loh lai erawh chuan ui tlukah pawh min ngai ngai lo. Mahse, chung zawng zawng chu ka dam khaw chhuah nan ka tawrh a ngai si. Ka putea hnenah pawh ka sawi ngai lo, ka putea hnenah ka sawi a nihchuan ka thlavang a hauh ngei dawn a. Keimah vangin an chhungkua an buai mai dawn si. Chu erawh chu thleng turin ka duh ngai lo, chuvang chuan ka tuar hram hram ṭhin.

Hun a liam ve zel a, ka theih tawpin kohhran leh khawtlangah te ka in hmang ve ṭhin. Kohhran huang chhungah pawh ka tlangnêlin nuam ka ti ṭan ve khawp mai. Kohhran Ṭhalai hruaitu te pawn min duhsak der ve a, a hmingin nihna te min pe ve hial reng a. Mahse, chu erawh ka dinhmun ka ngaihtuah a, ka tlin dawn lo tih ka hre chiang si. Inthlahrung tak chungin ka pha ta nge nge a.

Ka putea chu an hna thil vangin a zin kual reng a ngai ṭhin a. A zin tur hi kei aia huphurh hi an awm ka ring lo. A zin tur thu a sawi hi chuan ka ngui nghal vek ṭhin. Mahse, ka tilang ngai lem lo, a chang chuan kar 1 lek te a zin a. A chang chuan thla 2/3 te a zin ṭhin. Tun ṭum pawh hi thla 4 chhung teh meuh a zin dawn a, ka huphurh khawp mai. A zin hma zanah ka room-ah a rawn kal a,"Bawihi, tun ṭum chu nidang aiin ka zin rei dawn a. Hei ka ATM Card hi lo kawl la, i mamawh hunah i lo hmang mai dawn nia aw,"a ATM Card chu min pe a. Mahse, ka lo hnial vat a,"Pute, nangman i mamawh zawk ang. A nih loh pawn Pitei bulah dah la, ka mamawh chu ka lo dil ve mai dawn a lawm,"ka lo ti ve mai a. Mahse, ka putea chuan,"ATM Card dang ka la kawl tho a lawm. I pitei te chuan an nei ve vek a lawm. Hei hi i lo kawl dawn nia,"a tih tlat takah chuan ka hnial duh ta bik lova.

Ka putea a zin aṭanga ni 1 a liam ta tih ah chuan an nufa in an zia an chhuah leh ṭan ta. An thuamhnaw engkim ka su a, an room ka tihfai sak vek bawk a. In chhung chet nise, engkim ka ti vek bawk a. Zanah nise ka putea fanu te pahnih chu dar 11:00pm hma in an lo haw ngai lova. Mutsan chi an ni si lova, mutsan hlauh chuan an unau in min chilh rawn hrep zel bawk si. Mut chhuak chung chungin sitting room-ah chuan ka lo nghak ṭhin a. An lo haw hunah pawh an mut fel vek hnuah chiah ka mu ṭhin. Ka patea chuan a khat tawkin min rawn be reng a, pitei te nufa awmdan erawh sawi chhuah kher ṭha a ka hriat loh vangin ka sawi ngai lo thung.

Pathianni zan a ni a, inkhawm tura ka insiam malh malh lai chuan pitei a rawn kal a,"I inkhawm leh dawn em ni? Zanin chu inleng ka nei dawn a, inkhawm lo mai ta che,"a rawn ti mauh mai si. Ka hnial chuan min ṭim leh nek dawn si a, Kohhran Zaipawlin hla kan rem dawn bawk si,"Pite, Kohhran Zaipawlin hla kan rem dawn a....,"ka sawi zawh hma in ka hmaiah chuan min beng sawk mai a. Ka lu a hai mawih mai,"Kohhran Kohhran tih reng mai, in thlak leh vek la ka inleng te ei tur i lo siam sak dawn nia,"a thu chu hnial loh chi a ni lo. Phûr lo zet in ka in thlak leh a, ka ṭhiannu ka text a, ka damṭhat loh vanga ka inkhawm theih loh tur thu leh min ngaihtuah lo turin ka hrilh nghal a. Ka Phone ka Switch off a, Choka lamah chuan ka chhuak phei nghal a.

"Zanin hian ka sumdawnna lama ka ṭhiante an lo leng dawn a. Ei tur kha tuihnai takin lo siam ang che, an duh anga i siam lo a nihchuam a pawi khawp ang,"a ti hmarh hmarh a. Engmah sawi lovin ei tur chu an duh ang thlapin ka siam sak a. A ṭhiante ho pawh dar 7:00pm velah chuan an rawn thleng kim ve thei hram a. Nutling hlir an ni a, an incheina en chuan nu hausa tak tak vek an niin ka hria. An ti ti vel pawh a sâng hlawm khawp mai,"Bawihi, ei tur kha rawn chhawp tawh la,"a Pharisai zia a chhuah leh ta. Ngawi rengin ei tur chu ka chhawp phei sak a,"Ani hi ka pasal farnu fa a ni a, a vanduai a, kum 12 mi a nih in a nu in a boral san a. A pa in nupui dang a nei leh si a, a pa nupui thar lahin hnawk a ti bawk si. Keini lahin hrehawm deuha nuhrawn a hrawn aichuan tiin kan bulah kan awm tir a. Hei, a fel khawp a nia, ei tur siam te hi a thiam in a tui hnai thei lutuk a nia,"Pitei hian dawt sawi pum nat nei ta se, pum nat vangin a vial ngawl ngawl tawhin ka ring a ni. A ṭhiante ho lah chuan fel an tiin an fak tliar tliar hlawm a, ka van ten tak.

Ka eitur siam chu tui an ti hlawm ngang a ni ngei ang. Min fak sak ve tliar tliar hlawm a, inkhawm ban hnu rei vak lovah an ṭîn darh ta hlawm a. A ṭhiante an ṭîn darh hnu chuan,"I û te 2 hi an chhuak a, an lo haw hma chu mu suh ang che. Kei chu ka mu dawn a nia,"tih leh room-a luh a rual nghal a. An thil eina chu ka tifel zung zung a, ka tihfel vek hnuah ka Phone pawh chu ka on leh chiah a. Ka ṭhiannu message leh video missed call a lo awm ṭeuh a;

"Mate, i ṭha meuh maw? Rawn kal ka tum deuh ut ut a; mahse, in leng ka nei leh sia, ka rawn kal hman ta lova."

"Biak tlang i va har ve, i Phone i off bawk si, i ṭha takzet em?"

"Naktukah ka lo kal dawn nia aw."

"Ka message hi i hmuh hun hunah min lo chhang nghal ang che aw."

Ka ṭhiannu message chu ka chhang nghal vat a;

"Ka ṭha a nia aw, min ngaihtuah suh. Ka Phone ka off chhan chu ka battery a low vang a nia."

"Huizzzz, min ti hlauthawng hman a lawm. I ṭha meuh maw?"

"Imm ka ṭha lutuk, ka khua a sik ve deuh a. Mahse, damdawi te ka ei a ka ṭha tawh e."

"Biak Inah i hmel kan hmu si lova, kan hruaitu te ho an ngaih a ṭha lova."

"Nia, engmah ka hrilh hman lo che a, tihpalh lutuk."

"Naktuk zanah kan lo kan dawn che nia, nang meuh i dam loh chuan tuman nuam kan ti lo a nia."

"Awiii kan ka ngai lo a nia, in ti zahthlak em mai. Ka ṭha tawh lutuk ka tih chu."

"Ṭha lutuk mah la, rawn leng châk deuh rawn lêng ngam lo te pawh an awm ve a😁."

"Tu chu?"

"Naktuk zanah i hre mai ang, hei a tlai tawh si. Mu tawh rawh, kei pawh ka mu dawn muttui aw phawts😊😊."

"Imm nang pawh muttui le."

Ka out a, data ka off nghal a. Ka û te 2 chu lehkhabu chhiar pahin ka lo nghak leh ṭang ṭang a. Zing lam dar 1:30am-ah pawh an lo la haw si lo. Ka mut a chhuak lah a chhuak tawh si, Sana chu a khât tawkin ka bih ka bih tawh mai. Dar 2:00am-ah chuan pitei zung tur chu a rawn chhuak a,"I û te hi an la rawn haw lo em ni?,"a ngaih a ṭha tawh lo niin ka hria.

"Aw haw lo,"tih chiahin ka lo chhang a. Sana a en a,"A va mak chen chen ve maw le, hei dar 2:00am a ri tawh a nia,"phun bul bul chungin bath room lamah chuan a phei a. A rawn let leh lam chuan a room-ah a lut tlang nghal a, a mu leh mai dawn emaw ka ti a. Mahse, a rawn chhuak leh a, Phone a rawn lek chhuak a, ka û te chu a call nghal a. Mahse, tumah mah in an chhang thei lo, rilru chu a nuam lo ve reng mai,"Engtinnge maw kan tih dawn le? I putea ka hrilh ngam bawk si lo,"han hnem vak dan tur ka hre bik si lo. Ngawi rengin ka ṭhu tlawk tlawk ringawt a, zing lam dar 3:30am-ah chuan an rawn thleng ve thei hram a. An la rui em em zui leh nghal a, Pitei chuan,"Dar engzatnge in hria em? Nangmahni vanga ka mangan zia te hi in hria em? I pa in hria se engtinnge min tih ang? Zah pawh in zak lo em ni?,"a ti nghal bawrh bawrh a. Ka û te 2 chu an rui bawk a, ka pitei thusawi chu hre âwm pawhin an lang lo.

"Va mu nghal rawh u, in harhfîm hunah ka hau leh ang che u. Nuni, nang pawh mu rawh,"a ti a, a room lamah chuan min luhsan leh nghal a. Kawngka ka kalh ṭha a, ka mu ve nghal a. Mahse, ka mu rei hman lo khawp mai, zing dar 6:00am-ah ka tho a. Ei rawng ka bawl leh nghal char char a, a hahdam thlak loh ṭhin khawp mai.

Zanriah chaw eikham hnu rei vak lovah chuan, ka ṭhiannu leh kan Kohhran Ṭhalai hruaitu te ho chu an rawn tei lut ta nge nge a. Ka pitei chuan a lo be ṭha hlawm hlarh hlarh khawp mai,"Tunlai chu pa ber a zin bawk si a. Nu leh pa chan ka chang a ni ber mai, Nuni hi awm lo se chuan kan buai ve viau ta ve ang. A û te pahnih hi an lak tlak loh nasa si a,"midang bulah hi chuan min fak hluak hluak zel. U Hriatpuia(Kan Branch leader) chuan,"Ni e, Nuni hi chu a la naupang na vang vangin a fel hi ka ti ve khawp a. A û te 2 pawh  hi rawn inkhawm ve ṭhin se la, an unau 3 te hian rawn inzui se a ṭha phian ang chu,"a lo ti ve bawk a. Pitei chuan,"Nuni hi chu kan fanu rangkachak a ni ka ti ve tlat. A û te 2 ve hi zawng, inkhawm tura tur ngat ngat pawn awmzia a awm lo,"henu dawt han sawi thiam zia hi chu aw. Rei tawk fang kan ti ti hnuah chuan anni pawh chu an ṭîn ve ta hlawm a.

In lêng ho an ṭîn hnu chuan ka û pakhat zawk, U Marini chuan,"Awiii Hriatpuia chhiat loh zia kha. KṬP inkhawm leh hun chu mark score nan inkhawm ve teh ang,"a rawn ti ham ham a. Pitei lah chuan,"Makpa atan ka awhna a rei tawh. In nun hian a zir si lova, hetiang renga in khawsak dawn chuan i neih theih loh hmel khawp mai,"a lo ti ve bawk a. U Marini chuan nui awr awr chungin,"Nu, i lungngai a nihkha. Tun Sunday aṭang hian hma ka la ṭan ang,"a ti ham ham a, ngawi rengin an thusawi chu ka ngaithla liam vel mai mai a.

Zing lam dar 1:30am ni ta in ka hria, ka room kawngkhar chu tu emaw hian a rawn chum ri dawt dawt a. Phak deuh chialin ka tho a, ka room kawngkhar chu ka va hawng a. Chu veleh U Marini chuan ka hmaiah min lo beng sawk mai,"Tenawm nu,"a ti nghal tuarh a. A ngaihna ka hre lo hle mai,"Ka û, eng nge thil awmzia?,"ka ti hû mai a. Min beng leh a,"Ka hmuh phakah in lan tawh suh,"a ti leh nghal tawn tawn a. Kan thawm a ring ṭha bawk a ni ang, ka pitei leh U Muani te pawh an rawn tho chhuak a. Pitei chuan,"Eng nge ni ta vak vak a?,"a rawn ti nghal vat a. U Marini chuan,"Nu, zanin la la hian Nuni hi chhuak rawh se,"a ti nghal bawrh bawrh a, thil awmzia chu ka man lo hle mai. Pitei chuan,"A awmzia sawi teh. Nuni, eng nge thil awmzia?,"a rawn ti vin ṭhak a.

"Pite, thil thlen dan hi engmah ka hrethiam bik lo,"ka lo ti vat a. U Marini chuan,"Tenawmnu, zakthei lo nu, Hriatpuia hi ka ta a nih hi,"a ti ta chiam chiam mai. A awmzia ka hre lo tulh tulh mai,"I û bialpa i chuhpui em ni? I va zak lo ve a,"pitei chuan ka hmai zawnah tak min en a. U Hriatpuia chu ka û anga ka en a ni si a, ka hrethiam lo ngei mai,"Aih Pite, chutiang engmah a awm lo. U Hriatpuia te chu ka û angin lawm ka en,"ka tih pawh chuan tuman ka thusawi chu an awih duh si lo. Pitei bawk chuan,"Kha leh chen kha ka lo enkawl seilian che a. I chunga kan ṭhatna hi hetiang mai mai hian emni min rulh lêt dawn a? Hetiang reng chuan kan in hrawn reng thei tawh lovang. Zanin hian min chhuahsan ang che,"a âwki chu a sang ṭha kher mai. Pitei chu engtinmah ka chhang lo, ka chunga an thil dan chuan min tina takzet a ni.

"Lalramnunthar, ka thusawi chu i hria em? I thuamhnaw pack la, chhuak nghal ang che,"an nufa 3 chuan ka hmaah an ding ṭhap mai a. Sawi tur a vang duh kher mai, ngawi rengin ka thuamhnaw chu ka pack mawlh mawlh a. Pitei chuan,"Kan mu dawn a, zing khawvar hma in kan In hi lo chhuahsan ang che,"a ti bul hmuk a, ka room aṭang chuan an chhuak nghal a. Sana ka en a, dar 1:40am a ni tawh a. Tun ang hunah hian khawiahge ka kal ang le? Ka thuamhnaw ka pack zawh chuan, ka putea ATM Card chu ka lukham hnuaiah chuan ka dah a. Rilru na tak chungin ka putea te In chu ka chhuahsan ta.

Pawn boruak chu a reh ruih mai a. Mihring phe zeuh hmuh tur pawh an awm lo, pan lam tur lah ka hre si lo. Ka luggage chu ka khai a, ka nu thlan lamah ka kal thla ta ringawt a. Tun ang huna mahni chauha thlanmuala kal chu a nuam bik hauh lo. Mahse, kalna tur dang ka nei si lo, ka nu thlan lung ngheng chuan ka ṭhu a. A damlai a Bible min chhiar sak ṭhin lai te, inkhawm tura kan kal dun ṭhin lai te chu ka mitthlaah a rawn lang nghal mawlh mawlh a. Ka biangah chuan mittui a rawn luang nghal a,"Nu, i fanu hi min hmu em? Hmangaih tak leh duat taka i enkawl ṭhin kha. Tunah chuan kalna tur pawh nei lovin ka awm a sin. Nu, i bulah khan min hruai ve rawh,"ka nu thlanah chuan ka ṭap tlaivar a ni ber mai. Zing lam dar 4:30am velah chuan ka chhing ve sek a; mahse, ka chhing rei lo khawp mai. Dar 4:45am velah ka harh leh a, lei lung pawh a lang ve ṭan ruai ruai a. Boruak erawh a thiang nuam khawp mai, zing dar 5:30am velah chuan Nî pawh a rawn lang ve ṭan ta. Ka tan erawh lungngaihna ni a van ni chiang tak êm!

Ka piah deuh aṭang chuan mipa âw hian,"Ṭhiannu,"a rawn tih ri hi ka hria a, ka hawi phei nghal vat a. Ka piah deuhah chuan thlan lung 1 nghengin mipa 1 hian zial a lo pet vang vang a,"Hetah hian i riak ve tho em ni?,"a lo ti vat a. Ngawi rengin ka lu ka bu ringawt a, chupa chu ka hlau rilru ang reng hle mai. A ṭhutna hmun aṭang chuan muang changin a tho a, ka awmna lam panin a rawn phei chhat chhat a. A mit te chu a vung duk chur leh nghal a, ka hmel aṭang chuan ka hlau a ni tih a hrethiam a ni ngei ang,"Min hlau suh, ka khawih na dawn lo che. Ka ril a ṭam lutuk a, khawngaihin ei tur min pek tur i nei em?,"in thlahrun hmel deuh chuan a rawn ti a. Ei tur engmah ka nei bik si lo,"Aih nei bik miah lo,"ka lo ti ringawt a, ka hlauhna erawh lak kian a la ni rih lo.

"Ka hming chu Zomuanpuia a ni a, Amuan tiin min ko ṭhin a. Nang i hming min hrilh ve la,"a kut a rawn phar chhuak nghal a. Ka la hlauh deuh vangin a kut pawh chu ka vuan ngam lova, a nui suk a,"A pawi lo ka hrethiam che nia, ka kut hi i vawn kher a ngai lo nia. Mahse, i hming chu min hrilh ve la,"ka hlau a ni tih chu a hai bik lo.

"Lalramnunthari ka ni a, ka ṭhiante chuan Mate tiin min âu ṭhin a,"ka lo ti zawi sap a.

"Ka lawm e, i hmel leh i nungchang en chuan hmeichhe fel tak i ni tih a chiang reng mai. Mahse, helai hmunah hian i luggage nen ka hmu che hi mak ka ti a ni,"a ti ve thlawt a. Engtinmah ka chhang lo, ngawi rengin ka ṭhutna bula hnim chu ka pawt malh malh a. Amah bawk chu a rawn ṭawng leh a,"Nizanah In aṭangin pet chhuah ka ni a. Rv-ah mi 5 velin min khawih rawn leh a, ka mit te hi a na lutuk ringawt. Iiiih eng lo, damdawi addict ka ni a; mahse, ka hlauhawm loh a nia aw,"a ti leh a. A ipte chu a dap kual a,"Hei zawng hi pawisa ka la nei. Khilai hnaiah khian thingpui dawr a awm a, ei tur ka han lei ang e. Tikhan lo awm la, lo kalsawn suh aw,"a pawisa ₹50 zawr zet keng chuan a kal nghal a. Kalsan mai chi nge aw? ti a ka ngaihtuah lai chuan a rawn thleng thla leh si a,"Kha ei rawh, nang pawn engmah i la ei loh kha,"tiin Rice pack chu min pe a.

"Nang pawn engmah i la ei bik loh kha,"a hma aiin ka hlauhna chu a zia deuhin ka hria. A nui a,"Kei chuan a hmunah ka ei nghal a lawm,"a lo ti mai a, a pum tuai pah chuan,"Keichu ka puar tawh lutuk, puar deuhin i ei dawn nia. A piah deuhah sawn Sikret ka lo va zu ang e,"a ti a, ka piah hla vak lovah chuan a phei daih a. Ngawi rengin Rice chu ka ei mial mial a, ka ril a ṭam ve ngang a ni ang ka ei zo vek mai. Ka ei zawh hnu chuan Rice a rawn khaina Polythene chu ka en a, lehkha them te hi a lo awm a. Chu lehkha themah chuan Rs.50/- tih hi a lo in ziak a, hepa hian dawt min hrilh a ni maw? Engmah a la ei tawp si lova, a awmna lam chu ka va hawi a, a kut a rawn vai a,"I puar em?,"tih pahin min lo nuih var var a. Ngawi rengin ka lu ka bu ringawt a, nui var var chungin a rawn phei a,"Hetia thlanmuala hun hman tawp aichuan ka ṭhianpa Inah kal ila. Ani chuan riahna tur te pawh a nei maithei a sin,"a rawn ti a. A thusawi pawh ngaithla lem lo chuan, ka Polythene ken chu ka pe a,"Engmah i la ei loh tawp hi,"ka lo ti nghal vat a. Polythene chu a rawn ban vat a,"Naaah, van ho tak e aw. An dah sual a niang, kal ila ka ṭhianpa Inah chuan,"ka luggage chu a pu nghal nawlh a. A kut lian tak chuan ka kut tereuhte chu a rawn kai a,"Ka ṭhianpa Inah kan kal ang a, a Inah chuan riahna tur a awm maithei a. A awm loh pawn tihdan dang a awm mai ang,"a ti leh a.