GYPSY - 2

CHAPTER--2

By:- Rs Thangluah✍🏼

Amuana nen chuan Upper Republic lam panin ke in kan inzui phei hnak hnak a. A ṭhianpa In luah lian lutuk lo chu kan thleng phei ta ngei e. A ṭhianpa lah chuan min lo nuih tet tet a,"Nangni 2 chu(h), a chi loh a nia aw,"hepa hian kan inru emaw a ti a ni ngei ngei ang. Amuana chuan,"Engmaw chi loh chu?,"a lo ti vat a. A ṭhianpa chuan nui tet tet chungin,"Hre lo der vel lo mai teh,"a ti leh ringawt a. Amuana chuan,"Tak takin ka ṭhiannu a nia, i Inah hian riah i phal em? Kan 2 a kan riah len loh pawn amah tal hi chu riak thei se,"a ti ta nge nge a. A ṭhianpa chuan min entawn zak zak a,"I nupui ruk a ni lo tak tak maw? Nia, tak takin i nupui tur atan chuan a ṭha mah mah,"a la ti ham ham zui a.

"Mate, insilfai i duh chuan khilamah khian bath room a awm aw,"tiin bath room awmna lam chu min kawh hmuh a. Ni e, in phih fai ve chu ka mamawh a ni, bath room lamah chuan ka chho nghal a. Bath room ka luh hma hret chuan,"A chhelo kher mai a,"ti a Amuana ṭhianpa in min sawi zui na chu ka hre hman a.

Bath room aṭanga ka chhuah chuan Amuana ṭhianpa chu a lo awm lova. Amuana chuan,"I zo fel thei maw? Room-ah khan i inthlak duh chuan, ka ṭhianpa rawn let leh hma in va inthlak la,"a lo ti nghal vat a. A ṭhianpa room-ah chuan ngawi rengin ka lut a, ka inthlak nghal mawlh mawlh a.

"I ṭhianpa kha a hming ka hre miah lova,"ka thuamhnaw vel chu ka khung ṭha pah bawk a. Amuana chuan,"Rampuia a nihkha, In chungah in neitu nu a han hmu dawn a nihkha,"a lo ti vat a. Rei vak lo hnuah Rampuia leh In neitu nu chu an rawn in zui lut nghal bawk a. In neitu nu chuan Amuana nen chuan min en uluk kher mai,"Chhungte in nei lo em ni?,"a ti nghal tawl a. Ka chhan ve hma in Amuana chuan a lo chhang vat a,"Aaaa iih nei tho e. Mahse,....,"a sawi zo hman lo,"Chhungte in neih chuan in chhungte bulah haw rawh u. A hrim hrimin in leng duk dak lo deuh neih te hi rem ka ti lo a nia. Hmanniah pawh Rampuia inlengte hian min ti mualpho lutuk tawh,"a ti nghal hmawk hmawk mai si. Sawi tur a vâng duh ngei mai, Amuana chuan inthlahrun hmel deuhin min rawn melh ringawt a, ka khawngaih rilru ang reng phian mai. Rampuia chuan,"Ka pi, an 2 in riah i phal loh pawn kan ṭhiannu tal hi chu phalsak hram la. Khawngaih takin,"ngen ngawl deuh tak chuan a dil a. In neitu chuan min en leh ren rawn hnu chuan,"Awle hmeichhia kha chu a riak thei ang. Mahse, i ṭhianpa erawh kha chu a rem lo ang,"a ti hmak mai si. Tih ngaihna a vang hle mai, sawi tur pawh kan hre tawh lo. In neitu nu chuan a chhuah pahin,"Bengchheng in siam leh vaih chuan, Y.M.A ho ka hnawhchhuah tir ang che u,"a ti ram hmak a, min chhuahsan nghal a. Rampuia chuan,"He pitar khirh lutuk hi chu aw, In luah tur dang lah hi a vâng si,"a ti ve bui bui a. Amuana chuan engmah a sawi lo, eng emaw ngaihtuah a nei niin ka hria,"Amuan,"ka tih chuan a phu deuh zawk nghe nghe a.

"Aw eng nge ni ta?,"a lo ti vat a.

"Keimah chauhin hetah ka riak duh lo a nia,"ka tih chuan, Rampuia chuan,"Nangmah chauhin i riak dawn hleinem. Keimah ka awm hi, hawna tur dang i chuang em ni?,"a lo ti vat a. Amuana chuan engmah a sawi lo, hlauhthawnna in min rawn man zui a. Hemi te 2 hian min bum an tum emaw ni le? Thil mak deuh deuh chu ngaihtuahnaah a lo lut nghal zut zut a. Amuana chuan,"Ka'n inthiar lawk ang e,"tih leh Bath room lama luh a rual nghal a.

Amuana Bath room-a a luh hnu rei vak lovah chuan, Rampuia chu ka bul hnaih deuhah chuan a rawn ṭhu a,"Amuana nen hian in inngaizawng lo tak tak maw?,"a rawn ti ta mai. Ngawi rengin ka lu ka lo thing ringawt a, a nui vur vur a,"Nihchuan hetah awm ve nghal la ni mai lawm. Amuana te chu a lak tlak loh em mai, a ruihbo san reng mai ang che. Hei kei chu min en la, chenna In ṭha takah ka awm hi,"a ti nghal suam suam a. Min en dan chu ka duh hauh lo mai, Amuana lah chu Bath room lamah a la awm daih si,"Khati khan min en suh, ka duh lo a nia,"ka hlauhna vang chuan ka âw leh ka tha te chu an khur zo a. Rampuia chuan a hma aia hnaihin min rawn ṭhut hnaih a, ka banrekah a man bet a,"Ka duh loh dan a i awm vaih chuan In neitu nu hnenah khan ka hek mai ang che,"a ti chhur chhur a. Ka hmuiah chuan min rawn fawh a tum a, ka hawisawn hman a,"Amuan,"ka âw tawpin ka âu a. Chutah Amuana chu a rawn dawk chhuak nghal a, Rampuia chu a rawn pawt sawn nghal dawrh a,"Zawnga, hetiang mi hi maw i lo nih a?,"tih pahin a hnek nghal chawrh chawrh mai a. Ka hlau lutuk chu chet pawh ka che ngam tawh lo, ka ṭap deuh ṭuau tawh mai a. Amuana chuan a duhtawka a hnek hnu chuan a pet leh hram a,"I chan tawk a nihkha, vawikhatmah ka hmaah rawn in lan tawh suh ang che,"a ti zui nghal bawk a. Ka bulah a rawn phei a,"A khawih na hman che em? I bulah ka awm reng lova ka tihpalh aw,"min rawn kuah nghal a. Rampui pawh chu a rawn che ṭual ṭual a,"Ṭhianpa, engtinmah ka ti lo a nia,"a la rawn ti hram a. Amuana chuan,"Ka hmelhriat i ni tawh lo,"a lo ti hmak a. Ka luggage chu a pu nawlh a,"Kal ang,"tih pahin min kai nghal a. Pan tur lam bik pawh hre lo chuan kan in zui chhuak leh ringawt a. Ka Phone ka la on miah lo, ka putea'n min lo call a tum tawh hrim hrim ang. Inah ka awm lo tih a hriat hunah chuan engtin tak ngai ang maw? Amuana chuan,"Khatiang thil kha a thlen ka rin lawk sa vang a nia, Bath room-ah khan ka luh,"a lo la ti zui a.

"I hriat lawk sa reng chuan engvanginnge min kalpui kher a?,"ka thin a rim lek lek mai.

"Aww kan pahnihin kan riah theih ka rin vang a nia. Mahse, a lo theih leh si lova, ka tihpalh lutuk,"a lo ti nghal vat a. Mahse, engmah ka sawi zui tawh lo, ka ipte chu ka dap a, ₹200 note zawr tawh zet hi ka lo la ak a,"Amuan, zing aṭangih engmah i la ei si lova i ril a ṭam tawh ngawt ang. Thingpui dawr kan hmuh hmasak berah thil ei ang che aw,"ka tih chuan a nui suk a. Engmah a sawi lo, ka bulah chuan ngawi rengin a kal a, a khat tawkin ka luggage a putna a ko chu a thlak leh ṭhin a. A hah tawh hmel si a, ka khawngaih reuh ngei mai. Nî lah chu duhthusamin a sa bawk si, Ice Cream ei a chakawm hle mai. Amuana chuan Bazar lamah min kal phei pui a,"Khawiahnge kan kal dawn?,"ka lo ti hâ mai a. Ka zawhna chu hre âwm pawhin a awm lo. Ngawi rengin ka zui ve zel ringawt a, a mit duk dur leh a thuamhnaw bal deuh chu mi kan tawh te chuan an en duh ṭhin hle mai. Mahse, chung te chu a hre lo nge a hre reng a a hre lo der zawk ka hre lo.

New Market-ah chuan min kal pui a, min kalpuina tur a sawi duh si lova. Ngawi rengin ka zui ve ngar ngar ringawt mai a ni, a tawpah chuan nu 1 hnen kan thleng ta. Chunu chu tunge a nih ka hre lo, Amuana chuan,"Te, hetah hian lo awm la, tlai dar 4:00pm rik hma in ka lo let leh ang,"a ti a, ka luggage chu hmun rem laiah chuan a hung a. A ngaihna ka hre lo hle mai,"Khawiahnge i kal dawn?,"ka lo ti vat a. Min chhang tawh lo, ngawi rengin min kalsan nghal daih a. Ka bula thuamhnaw zuar nu chuan,"Mami, lo ṭhu rawh. Amuana chu dar 4:00pm rik hma in a rawn let leh mai ang, min lo pui la i pocket money tur te ka pe ve dawn che a nia,"a lo ti ve bawk a. Mahse, ka awm a nuam lo ru tlat, ṭhutna âwlah chuan ka ṭhu ve nghal mai a,"Eng nge ka lo tih ve ang?,"ka ti ve vat a.

"Heng ho hi kha laiah khan i lo rem dawn nia aw, vawiin chu ka buai lutuk a,"tih pahin ka tih tur chu min hrilh nghal zung zung a. Kei pawh chuan ti tura min tih ang chu ngawi rengin ka ti ve mial mial bawk a. Ka Phone chu on ka tumin ka la chhuak zuai a; mahse, ka on ngam rih lo. Ka putea hnen aṭangin Phone call ka dawng ngei dawn si a, tunah rih chuan ka la be duh rih lo a ni. Thuamhnaw zuartu nu chuan,"I hming pawh min la hrilh miah lova. Kei chu Nu Kim tiin min ko mai dawn nia aw,"a rawn ti a.

"Lalramnunthari ka ni a, ka ṭhiante chuan Mate tiin min ko ber ṭhin. Ka chhungte erawh chuan Nuni ti ten min ko ṭhin,"ka sawi hnem teh duah ngei mai. A nui a,"Mate tiin ka ko ve mai ang che aw,"a ṭhutna bul sir aṭang chuan lehkhapuan hi a rawn phawrh chhuak a. Eng emaw hi a ziak mawlh mawlh a,"Ei tur ka order dawn a, eng nge i ei duh ang le?,"a rawn ti ta mai. Ka inthlahrung viau na chu, zinga ka thil ei bak kha engmah ka ei chhunzawm tawh si lo. In thlahrung tak chungin Rice half ka chah ve hram a. Rei vak lo hnuah ei tur chu an rawn dah a, ka ei pah chuan Amuana chu ka ngaihtuah chhuak zawk a. Ani hi zing aṭangin engmah a la ei si lova, a lo chau chhe der ang tih chu ka hlau a ni. Ka thil ei lai pawh chu tui ti takin ka ei thei lo, a half ka chah pawh chu ka ei zo thei lo.

Tlai dar 4:00pm rik hma hret in Amuana pawh chu a rawn let ve leh mai a. Mahse, a hmel a dik tlat lo, a meng sen rûm a. A chauh hmel em em bawk a, Nu Kimi chuan,"Hei in 2 a in hlawh tur aw,"tiin Amuana hnenah chuan ₹700 hi a pe a. Amuana chu ka bulah a rawn ṭhu a,"Chhunah thil i lo ei em?,"a rawn ti nghal zat a. Ka lu ka bu ringawt a, pawisa chu min pe a,"Nangman kawl zawk rawh, keiman ka kawl chuan ni lo lo ah ka hmang palh ang,"a ti a, ka kutah chuan min rawn hmeh bel nghal chawt chawt a. Nu Kimi chuan,"Bawiha, hetiang reng renga khawsak chu a ṭha ka tihpui lo khawp mai che. In lam let la, i pa hnenah ngaihdam dil teh,"a rawn tih takah chuan, Nu Kimi chu Amuana laina hnai a nih ka ring nghal a. Amuan chu a nui suk a,"Nute, pa in fapa a tuithlar tawh chuan a tuithlar a ni mai. Saw Inah sawn ka dam chhungin ka let tawh lo ang,"a ti hmak hmak mai bawk si. Nu Kimi chuan,"Bawiha, pafa inzawmna tihchah hi a ṭha ngai lo a sin,"a ṭawng dan aṭang chuan a rilru a nâ tih ka hrethiam nghal mai. Mahse, Amuana chuan an In lama let chu a tum lo bur mai bawk si,"Nute, he thilah hi chuan ka thiam lohna a awmin ka hre lo. Ni e, khami zan khan ka rui ngei mai. Mahse, rui chhia chu ka ni lo a sin, khami zan khan ngaihdam pawh ka dil tawh. Mahse, a fapa ngaihdam dilna chu ngaihthlak a hnehin kan inzawmna chhut chah chu a duhthlanna a ni zawk si a nih hi,"a ṭawng zawng chuan a hnuk a ulh deuhin ka hria. Nu Kimi chuan,"A buaithlak a ni, hetia kawtthlera i vak rawlai mai mai tur ka ngaihtuah hian ka rilru hi a na a sin, Bawiha,"a mittui chu a hru zauh a. Amuana chuan,"Nute, mipa ka nih hi. Ka pa khan a fapa atan min pawm tawh lova. Tunah chuan kei pawn ka pa atan ka pawm tawh bik lo, a chhe ber pawh thleng se ka hnung chhawn tawh ang,"a ti mauh mai si. A ding uaih a, ka luggage chu a pu nawlh a, ka banah chuan min kai leh lawp a,"Kal ang, keini 2 hian hmangaihtu leh khawngaihtu kan mamawh lo,"a ti bul bul a, min kalpui nghal dawr dawr a. Nu Kimi'n min rawn auh lawm lawm pawh chu hre mah ila, min kaitupa chu ka hneh si lova, thei leh thei lovin ka hawi let a, Nu Kimi chuan sawi a nei tih ka hria. Mahse, a thusawi erawh ka hre thei lo.

Amuana nen chuan ka nu thlan lamah bawk chuan kan inzui thla leh hnak hnak a. Ei tur kan lei ho chu Amuana chuan ngawi rengin a ei mawlh mawlh a. Kei erawh ka la puar rih êm avangin ka ei chak lem lova,"Nang chuan hmangaihtu chhungkua i la nei a. Kei chuan min hmangaihtu pawh ka neih ve loh hi, ngatinge luhlul i chhuah tlat a?,"tia ka zawhna chu Amuana chuan hre âwm pawhin a lang lo. A thil ei lai chu ngawi rengin a ei mawlh mawlh a, a ei zawh chuan a kekawr ipte aṭangin Syringe a rawn phawrh ta mai. Ka hmu thut chu ka phu deuh zawk nghe nghe a,"Khatiang kha i ti ṭhin maw?,"ka lo ti deuh hâ mai a. Amuana chuan engtinmah min la chhang lo, ka piah deuhah chuan a phei a, min hnungchhawn zawngin a ṭhu a. A kun a, rei vak lo hnuah a muthlu nghal lup lup a, tih vak ngaihna ka hre si lo. Ka nu thlan lung ngheng chuan ngawi rengin Amuana muthlu chu ka thlir reng ringawt a.

Amuana nen ngawi renga kan ṭhut dun hnu chuan ṭawng ri ka hria a. Chu ṭawng ri chu mipa âw a ni, Amuana lah chu a la muthlu tui bawk si. Ṭawng ri chuan min rawn hnaih telh telh a, an ṭawng dan aṭang chuan zan lam duty an niin ka hria. Amuana chu ka sawi nawk nawk a,"Hey, harh teh, duty an lo kal a nia. Amuan, harh teh,"a hmaiah te ka beng sawk sawk a. Mahse, a harh thei lo, kan bihruk loh chuan duty ho hian min man dawn chiang si. Amuana lah a harh thei si lo,"Amuan, harh teh,"ka sawi nawk nawk pawh chuan a harh thei lo. Tih ngaihna dang a awm lo, duty chuan min man mai rawh se ka ti ta a. An rawn hnai zel a, light in min rawn chhun fuh ta ngei e. Patling 3 an ni a, min rawn pan nghal vat a, an zinga 1 chuan,"Heng lai laiah te eng nge in tih a?,"a rawn ti nghal bawrh bawrh a. An hmel pawh ka en ngam lo, ka kun char char a,"Iiiih eng lo, riahna tur kan nei lova,"tiin ka chhang a. Pakhat chuan Amuana chu kaihthawh tumin a lo bei ve ngar ngar bawk a,"Chhungte in nei em?,"tia min zawhna chu engtinmah ka chhang lo. A hnuah,"Ka zawhna chu i hria em? Chhungte in nei em?,"a rawn ti vin ṭhak a. Ngawi rengin ka lu ka bu ringawt a,"Min en teh, helaiah hmunah hian eng nge in tih? I ṭhianpa lah chu a harh thei der mai si lo,"a aia vin chuan a rawn ti leh a. Ngam leh ngam lovin a hmel chu ka en a, ani pawh chuan min en chiang kher mai,"I mitmeng aṭang chuan i ruih ve hmel si lohva. I ṭhianpa lah a rui em em mai bawk si,"a ti nuah nuah a. An hnunga pakhat ding erawh chuan engmah a sawi ve lo, ngawi rengin Sikret a lo zu mial mial a.

Rei fê kan buaipui hnuah Amuana pawh a rawn harh ve thei hram a. Mahse, a rui khawp mai,"E he! Ṭhianpa, engtinnnge hetah ka awm tih i hriat a?,"nui heu chungin duty pa chu a lo be vel a. A bulah chuan ka ṭhu a,"Amuan, duty an nih hi. I ṭhianpa a ni lo, duty an nih hi,"a beng bulah chuan ka hrilhru ve nasa. Mahse, ani rui lutuk chuan engmah a hrethiam lo,"Bawiha, nizanah ka pa in min knock-out a, a hit lo raps,"huiham a van zahthlak ṭhin tak. Duty ho pawh chuan tih vak ngaihna an hre vak bik lo niin ka hria. Mahse, min kalsan erawh an tum mai bik lo,"Ka pu, khawngaihin min ngaidam hram mai teh u,"tiin ngaihdam ka dil ta ringawt a. A hmaa thil min zawt tu bawk khan,"Eng pawh nise, helaiah hian engvanga awm nge in nih reng reng a? Thuamhnaw leh ei tur nen in ni nuai bawk si,"a ti leh a. Min zawh sek ta si ah chuan, ka pitei te nufa in min tihdan vel chu ka sawi nghal vek a. Amuana chanchin erawh ka la hriat chian loh vangin engmah ka sawi lem lo. Kan intawn dah erawh min zawh zui zel vangin ka hrilh nghal vek a.

"Tun hma in kan vengah in awm ṭhin tihna a ni maw?,"a van dil chhut tak.

"Kum 13 ka nih thlengin ka awm a. Chumi bak chu ka putea te bulah ka awm,"zep lo chuan ka mut a chhuak tawh khawp mai. Amuan lah chu a lo hnar leh kûk kûk tawh mai bawk si.

Amuana bula ṭhu 1 chuan,"Awle eng pawh nise, zanin chu kan in ngaidam phawt ang. Mahse, zan dangah erawh kan veng chhungah kan hmu leh che u a nihchuan ngaihdam in ni tawh lo ang,"a ti bur mai si. Sawi tur dang pawh ka hre tawh lo, ka ngawi reng ringawt a. Pahnih chuan min kalsan a, ṭawng ve miah lo 1 erawh a la tawi khawmuang a. Ngawi rengin a Sikret chu a ṭan leh a, a kal mai dawn ema ka tih laiin min rawn pan a, lehkha them hi min rawn pe a, ngawi rengin min kalsan ve leh mai a. A lehkha min pek chu zan thim hnuaiah chuan chhiar a har kher mai. Ka Phone ka on a ṭul ta, ka ṭhiannu message a tam viau tawhin ka ring a ni. Tin, ka putea pawn min rawn biak a tum tawh ngei ang. Ka nu thlan lung ngheng chung chuan ka ṭhu leh a, ka Phone ka on a, message chu a hlawm hlawmin a rawn lut ruih ruih mai. Ka putea message leh ka ṭhiannu message a tam ber nghe nghe a. Mahse, chhan erawh ka la tum lo, ka Phone flash light chuan lehkhate chu ka chhun a. Phone number leh thu tawi te a lo in ziak a,"Harsatna i neih chuan he number hi i call dawn nia,"tih a lo in ziak a. Number chu tunah mamawh viau lo mah ila, mamawh hun ka la nei dawn tih erawh ka hria. Chuvang chuan ka Phone-ah chuan a number chu ka save nghal hmak a. Ka Phone chu off leh ka tum lai takin ka Putea chuan a rawn call hlawl mai. Ka chhang tur a ni lo, ka awmna a hriat chuan min rawn zawng ngei ang. Ka ring ral tir ṭhak a; mahse, a rawn call leh a, ka reject a. A rawn call leh nghal a, a tawp a tawpah chuan ka chhang ta nge nge a;

"Aw Hello."

"Khawiahnge i awm a? I pitei te hnen aṭangin engkim ka hre vek tawh a. Engvanga khatiang ti duh nge i nih le? Ka fanu te aipawn ka hmangaih che a sin,"Pitei te nufa chuan Putea chu dawt thu an lo fah leh tawh a ni ngei ang.

"Engmaw?"

"I thil tih pawh i hre lo maw? A pawi lo e, ka lo ringsual che a ni. I duh na hmunah chuan awm ta poh che."

"Pute."

"A tawk."

"Ka tihpalh lutuk."

"Tihpalh tikhan awmzia a nei lo. Ka dah a nia."

A reh nghal tlawk tlawk a, ka thawm hriat chhun chu ka bula tui taka muhil Amuana hnar ri chu a ni mai si. Mut chhuak zawng zawng an bo zo vek tawh si, ka ṭhiannu message chu phûr lo zetin ka hawng ta nge nge a;

"Mate, in Inah ka lo kal a. I pitei te nufa in In aṭanga i chhuah thu min hrilh a. Khawiahnge i awm a? Phone i off tlat bawk si, ka ngaihtuah lutuk che a nia."

"Mate, i pitei te nufa in an sawi dan che hi keichuan ka ring thei hlawl lo. Ka hre chiang che a, misual i ni lo tih ka hria. U Hriatpuia pawn a ngaihtuah lutuk che a, i number a nei si lova. I chanchin min zawt reng zel a."

"Engtikange ka message hi i hmuh ve ang le?"

"Ka message hi i hmuh hun hunah i awmna min hrilh la. Kan lo kal nghal ang."

"Huiham, Phone lah chu i off daih bawk si."

"😢."

Ka ṭhiannu message chu ka chhiar chhuak dap a. A last seen pawh today at 9:30pm a ni, tunah hian dar 9:40pm a ni a. A message ho chu ka chhang ve nghal mai a;

"Ka ṭha nia aw, min ngaihtuah suh. Ka Phone number ka thlak dawn a, ka thlak veleh ka rawn hrilh ang che aw,"tiin ka chhang a. Ka out nghal a, ka Sim card ka phawi a, ka Phone chu ka switch off leh nghal a.