GYPSY - 3

CHAPTER--3

By:- Rs Thangluah✍🏼

Ka Sim Card chu ka phawi a, ka paihbo nghal hmak a. Amuana chu ka en a, a kâ âng phuau in a muhil a, a hnar kûk kûk a. Naktuk zan aṭang chuan helai hmunah hian kan awm a rem tawh dawn si lo, khawiahnge kan kal tak ang le? Duty zinga 1 Phone number min pek chu ka hre chhuak zawk a. Mahse, ka Sim Card kha ka lo paih hman tawh si. Ka nu thlan lung ngheng chung chuan ka ṭawngṭai ta ringawt a,"Aw Lalpa, tunah hian i puihna kan mamawh a ni. Khawngaihin min pui hram teh. Khawngaih takin, kan tan tu emaw tal rawn tir hram ang che aw,"ka inrin hma in ka ṭap chhuak hawm hawm a. Ka ṭap thawmah chuan Amuana pawh chu a rawn harh a, a rawn che ṭual ṭual a,"Ngatinge i ṭah a? Tunge hau che?,"tih pahin ka bulah chuan a rawn tawlh ve nghal hrut hrut a. Amuana chu engtinmah ka chhang lo, ka bianga mittui luang chu ka hru hul nghal sawk sawk a. Amuana chuan,"Ngatinge i ṭah a?,"a ti leh a.

"Engmah a ni lo, muhil leh rawh,"tih pah chuan za vak lo hian ka lo nuih a. Mahse, Amuana chuan a zawhna chhanna a hmuh hma chuan mut a tum tawh lo bur mai si,"Ngatinge i ṭah a?,"a ti sek mai si. A tawp a tawpah chuan,"Duty ho khan naktuk zan aṭangin hetah hian kan riah an phal tawh dawn lo,"ka ti ta nge nge a. Amuana chu a thaw hak a, a ruih a reh tawh a ni ngei ang. A ṭawng pawh a fel fai tawh khawpin ka hria,"Keimah vang vek a ni, ka tihpalh aw. Ka rui mah mah a ni,"a ti ve nuah nuah a. A ṭawng dan aṭang chuan a inthlahrung ve hle a ni tih chu hai rual a ni lo,"Ni love, i thiam loh vek a ni bik hleinem. Kei pawn thiam lohna tam tak ka nei a lawm,"ka lo ti vat a. A lu a thing nang nang a,"Nang chuan tihsual engmah i nei lo. Hmeichhe fel leh ṭha tak i ni a, i chan a chau deuh tih mai a ni e,"a lo ti ve thung a. Kan ti ti kan ti ti a, mut pawh mu hman lovin zankhua in kan ti ti dun a. A changin Pathian thu te kan han sawi leh ang lawp lawp a, a chang leh kan inhnial thûl. Chutiang reng renga zan hun kan hman ral meuh chuan zing khua pawh a rawn var ve ta. Tuk in khawvar chu boruak thiangin nuam hle mah se, kan tan erawh ni lungchhiat thlak a van ni tehreng êm! Amuana pawh chu a rilru a hah ve hle a ni tih chu ka hai bik lo. Ka Bag-a pawi ka ah chu ka la chhuak a, ka chhiar a, a vaiin ₹1500 a ni. Ei leh in man chu a lungngaih thlak loh phawt a; mahse, riahna tur kan nei tawh lo a ni. Amuana chuan,"Ka pa bulah ngaihdam ka dil ang a. Kan Inah i awm ve dawn nia,"a ti zawi sup a. Mahse, Amuana chhungte chuan kei hi an In chhungah min chen tir ve duh ang em? Ngaihtuahna a van vak kual nasa tak êm! Rei ngial ka in ngaihtuah hnuah Amuana thutlukna siam chu ka pawmpui ve tawp mai a. Mahse, eng nge thleng zel dawn? tih erawh ngaihtuah zui ngam chi pawh a ni lo.

Thlanmual aṭang chuan Amuana nen chuan kan inzui chho leh hnak hnak a. Kawngpuiah chuan Taxi kan chang a, Taxi lo kal hmasa ber chu kan hmang nghal a. Amuan te In lam pan chuan kan tlan chhuak nghal a. Amuana pawh chuan a thil tih tur chu a huphurh ru takzet a ni tih ka hria. Kei hi a kiangah awm lo ta ila, tuna a thil tih tum pawh hi a tih ka ring hauh lo. Mahse, min ngaihtuah vangin hreh tak chungin a pa hnenah chuan ngaihdam a dil a ngai dawn si a. An In chu kan thleng ta, chhungkaw khawsa thei tak an ni tih hriat takin an In te chu a lianin a ropui em em a. Compound lah an nei zau narawh e, Taxi pu hnenah chuan kan chuan man ka pe a. Amuana chuan ka Luggage chu a rawn khai chhuak bawk a. Phur lo tih hriat zetin an Gate bula bell push chu a hmet a. Rei vak lo hnuah hmeichhe 1 hi a rawn kal a,"Awii nangmah maw? Ka pu in a hmuh che chuan a vaw hlum duh ngei ang che. Khawngaihin kal leh mai rawh,"an nula a nih ngei ka ring. A mit meng aṭang chuan a hlauthawng tih a hriat reng mai. Mahse, Amuana chuan chu hmeichhe thusawi chu a ngaithla duh lova. Gate-ah chuan a pen lut a, ka kutah min kai a, ngawi rengin an kawngkapui zawn lam pan chuan min kal phei phui hlawk hlawk mai a. Kan hnungah chuan hlauthawng takin an nula chuan min rawn zui nghal bawk a.

"Zomuanpui, he In hi rawn rap tawh lo turin ka ti che a ni lawm ni?,"Amuana hmaiah chuan a beng ri sawk mai a. Ka hlau lutuk chu ka tha a khur der der mai, an nula pawh chuan a hlau ngei mai. Amuana erawh a ngawi ngul thung a,"Ka sawi kha i la hria em? Nang nen hian inzawmna engmah kan nei tawh lo. Fapa sual enkawl reng hi ka peih tawh hleinem,"a ti vin tuarh tuarh mai a. Amuana chuan,"Ka pa, engkim vang khan ka tihpalh lutuk aw. Khawngaihin min ngaidam thei ang em?,"a pa ke bulah chuan a ṭhingṭhi ta nge nge a. Mahse, pa chuan a fapa ngaihdam dilna chu a pawm duh si lo. Ngawi rengin dawhkana Briefcase chu a khai a, chhuah pahin an nula bulah chuan,"Ka lo let leh hma in anni 2 kha lo chhuah tir ang che. A nih loh chuan i hna aṭangin ban i ni ang,"a ti ram hmak a, min chhuahsan nghal a. Amuana erawh a la ṭhingṭhi char char thung a, sawi tur a van vang tak êm! An nula chuan,"Ka û, khawngaihin kal mai rawh u. A nih loh chuan ka hna hi ka chân mai dawn a sin,"a ti mawlh mawlh bawk si. Amuana pawh chu ngawi rengin a rawn tho chhuak ve mai a,"A ṭha e, tun bak hi chu ka pa khan ka hmel a hmu tawh lovang. Chuan, hei hi ka nu hnenah min lo pek sak dawn nia aw,"tiin a ṭhi awrh lai chu a phelh a, an nula chu a pe a. Kan inzui chhuak leh hnak hnak a, an nula chuan Gate thleng min rawn thlah a,"Ka û, kha hei hi in mamawhna apiangah in lo hmang dawn nia. Tih theih ka nei si lo,"tiin ₹500 note hi Amuana chu pek a tum a. Mahse, Amuana chuan,"Aih a ngai love, kan lawm e. Nangman i mamawh zawk ang,"a ti a, pawisa chu a la duh lova.

Pan tur lam bik pawh hre lo chuan kan in zui chhuak leh hnak hnak a. Amuana chuan,"I ril a ṭam tawh em? Hei a tlai tawh viau a sin,"a tih chuan zing aṭangin engmah kan la ei lo tih ka hre chhuak ve chiah. Ka ril chu a ṭam ve deuh tawh tho mai a,"Immm ṭam ve deuh tawh tho mai. Nang a ṭam ve tawh em?,"ka lo ti vat a.

"Imm ṭam ve reng, sawlai thingpui dawrah sawn thil ei ila,"a lo ti ve vat a. Kan piah deuha thingpui dawr lian vak lo ah chuan kan in zui lut a, ṭhutna âwl ah chuan kan ṭhu nghal a. Ei tur kan order a, nghah pahin kan ti ti dun malh malh a. Kan luh tirh khan ka lo hawi kual lem lova, ei tur an rawn dah lai chuan ka hawi chhuak zauh pek a. Kan hma zawn chiah ah chuan U Hriatpuia leh Kimkimi(ka ṭhiannu) chu ka va hmu hlawl mai a. Min lo hmu ve ang tih chu ka hlau hle mai, ka kun nghal vat a. Amuana erawh chuan engmah a hrethiam lovin ka hria, ngawi rengin ei tur chu kan ei dun malh malh a. Ka ei zawh chuan a rang a rangin thingpui dawr chu ka chhuahsan nghal vat a. Amuan pawh ka nghak lo, pawnah tlema hmun biru deuhah Amuana chu ka lo nghak a. Ka chhuak hmanhmawh lutuk chu Amuana pawh a ngaih a ṭha lo deuh nghe nghe a,"Ngatinge i van hmanhmawh ve a?,"a rawn ti chhuak nghal a. Mahse, engtinmah ka chhang lo, hmanhmawh zetin ka kalpui nghal hlawk hlawk a. Thui fê kan kal hnuah ka Luggage kan keng lo tih kan hre chhuak chiah. Amuana chu a chek tlawk tlawk a,"A van pawi tak, a chhungah khan ka Phone ka dah a sin le,"a ti vawng vawng a.

"Kei pawn ka Phone ka dah daih,"ka lo ti ve vat a. A chal a dawm vawng vawng a,"Tah hian min lo nghak la, ka va la ang aw,"a ti a, kal mai a tum a. Mahse, helaiah mahni chauha lo nghah chu ka duh bik si lo,"Aih ka lo kal ve ang,"ka tih tlat si takah chuan ani pawh chuan min hnial lem lova. Kan Luggage kan theihnghilhna hmun lam pan chuan kan inzui phei leh hnak hnak a.

Thingpui Dawr kan thlen chuan Luggage chu Dawr neitu chuan a lo kawl ṭha a, kan lawm kher mai. Lawmthu kan hrilh mawlh mawlh hnu chuan kan kal leh nghal a. Amuana chu a ṭawng tawh lova, a pa in a ṭawngkhum dan vang khan a rilru a na a nih ka ring a. Ngawi rengin a kalna ah chuan ka kal ve zel a, a tawpah chuan ka hriat ngai pawh ni lo hmun 1 ah hian min kalpui a,"Amuan, hei hi khawi hmun nge?,"ka ti a. Amuana chuan,"Pawisa kha engzatnge kan la neih?,"tiin ka zawhna pawh min chhang lo chuan zawhna dang min zawt let zawk a. Ka bag chu ka en a,"₹1300 a la awm,"ka ti sap a. Amuana chuan a Luggage put lai chu a nghat a, a hawng nghal a,"I thil hlu la chhuak rawh,"a ti bul hmuk a. A ngaihna ka hre lo kher mai,"Eng nge i tih dawn?,"ka lo ti hâ mai a. Amuana chuan,"I tana hlu ber la chhuak la, kan thil neih ho hi kan hralh ang,"a ti ta mai.

"Ni lo, hetiang thil hi kan ti thei lo ang. Ngaihtuah chiang leh rawh,"ka ti nghal mawlh mawlh a.

"Ngun taka ka ngaihtuah hnuah duhthlan tur dang ka hriat loh vangin he thil hi ka ti a ni. Pawisa kan nei lo tih i hriat kha,"a ti thawp sut a. Ni e, a dik reng mai, pawisa kan nei tam tawh lo. Tunah hian pawisa kan neih a ngai tih ka hria, ka ngawi reng a, ka Luggage chu ka hãi a a nu thlalak chu ka la a, ka Bag-ah chuan ka dah lut nghal a,"A dang chu engmah lak tur ka nei lo,"ka ti sap a. Amuana chuan ngawi rengin ka Luggage chu a chhin ṭha leh a, ka banah chuan min rawn kai a,"Engmah lo sawi ve suh ang che aw,"a ti sup a. Kan hma zawna kawng te tek te awmah chuan min kal pui a, a thim in a rimchhe ngei mai.

Nutling 2 leh mipa 3 hi an lo awm a, min en uluk khawp mai. Amuana Luggage put chu an la a, an hawng a, an en vek a an nui var var a,"A ṭha e, kar 1 chhung chu hetah in cheng ve thei ang. Chuan, hei aw,"tiin ₹2000 note hi Amuana chu an pe a. An in dawr dan chu ka hrethiam lo kher mai, mipa 1 chuan,"Min zui ru,"a rawn ti a, ngawi rengin a kalna lamah chuan kan zui nghal a. Room 1 lian vak lovah hian min hruai a,"Thil ṭha lo engmah tih tum suh ang che u,"a ti a, min kalsan leh nghal a. Amuana chuan,"Khumah hian i mu ang a, kei chu chhuatah ka mu mai ang,"a rawn ti a. Mahse, keimah khuma mut a, Amuana chhuata mut tir bik chu ka duh bik si lo,"Aih ni love, chhuatah ka lo mu zawk dawn nia,"ka ti ve ngawt a. Amuana chuan chhuata ka mut chu rem a ti lo nasa mai,"Hmeichhia i nihkha, khumah khan mu rawh,"a ti bul hmuk a, bath room lamah min luh san nghal daih a.

"In indawr dan kha ka hrethiam lo reng reng,"tiin Amuana chu ka melh a. A lo nui hak a,"Nakinah i hrethiam mai ang, tikhan lo awm la. Room hi lo chhuahsan suh ang che, kawngka hi chhung lamah kalh la. I hmingin ka rawn ko che a nih loh chuan tu pawn kawngka rawn kik se, lo hawn sak suh ang che aw,"a ti a, kal mai a tum a. Mahse, a hmaah ka kal khalh vat a,"Khawiahnge i kal dawn?,"a mitah tak chuan ka en kar a. Ka kokiah a rawn vuan a,"Heta kan awm man hi ka rulh a ngai a lawm, ka lo haw har dawn lo. Buaina i nei a nihchuan khum bulah khan Phone 1 a awm a, khami Phone-ah khan Number 1 a awm a, chu chu i call dawn nia,"a ti a, min chhuahsan nghal a. A chhuah veleh chuan room kawngka chu ka kalh nghal hmak a, zep lo chuan helai hmun hi ka ngaina thlawt lo a ni.

Zan dar 9:30pm velah chuan Amuana chuan,"Te, keimah aw,"tiin zawitein kawngka chu a rawn kik a. Ka hawng rang kher mai, ka thil hmuh chuan min van ti phu chiang tak êm! Amuana chu mit vûng vekin a lo haw a, a hnar leh a hmui vel chu a thi hnuang bawk a,"Amuan, eng nge thil awmzia?,"ka ti nghal mawlh mawlh a. Khumah chuan ka mut tir nghal a, Phone chu ka la a, number awm chhun chu call mai ka tum a. Mahse, Amuana chuan ka Phone ken lai chu a rawn la vat a,"Tumah call suh,"a rawn ti nghal vat a. A hnar thi chu a reh mai si lo, ka hlauthawng takzet a ni,"Eng thil nge thleng a?,"ka ti leh a. Amuana chuan a kut zaizirin, ngawi turin min hrilh a. Ka ṭawng lai pawh chu ka tawp nghal chawt a, pawn lamah chuan ṭawng ri kan hre zui nghal a. Rei vak lo hnuah kan room kawngka chu an rawn chum ri dawt dawt. Amuana chuan a kut zaizirin hawng turin min ti a, hlau leh khur der der chungin ka va hawng a. Kawngka bulah chuan mipa 2 palian em em mai hi an lo ding reng tawh a. Amuana an hmuh chuan an thin a rim hmel hle mai a, Amuana chu an rawn pan a,"Vawikhat chiah chance kan pe leh ang che. I bawhpelh leh a nihchuan i lu kan la ang,"an ti chhur chhur mai a. Ka hlauh lutuk vang chuan kil khatah chuan ka lo ding khawng reng ringawt a. Amuana chuan engmah a sawi lo, khum aṭang chuan a rawn ṭhu chhuak a min rawn en a. Ka hlau tih a hria a ni ngei ang, min rawn pan a ka kutah min rawn vuan a,"Awle, eng pawh thleng dawn se. Hun min pek leh theih dawn chuan chu hun chu ka bawhpelh tawh lo ang. Ka tiam a che u,"a ti nghal mawlh mawlh a. Paliana te 2 zinga 1 chuan,"A ṭha e, i hliam te kha enkawl dam phawt la, kan inbe ṭha leh dawn nia. Kha a hliamah khan i hnawih sak dawn nia,"ka kutah chuan Penisilin powder hi a rawn hmehbel chawt chawt a, min chhuahsan leh nghal a.

"Eng thil nge i tih? Ngatinge engmah ka hriat ve loh?,"ka ti zui leh mawlh mawlh a. Amuana chuan,"Nakinah ka hrilh ang che,"tih bakin min chhang lo, a hliamah chuan damdawi chu ka hnawih a. Ka rilru a nuam lo khawp mai, Amuan kutah chuan ka vuan a,"Amuan, Pathian hnenah min puitu tur tu emaw tal an lo lan theih nan dil ang aw,"ka ti tawl mai a. Mahse, Amuana chu a nuih a za ngei mai,"Pathian hian kan tan tumah a rawn tir lo ang. Ka lei Pathian hmuh theih ka pa pawn a fapa ah min pawm duh tawh lo a nia. Tunge kan tan in hawng ang?,"a ti ta chiam mai a. A ngaihdan chu ṭha ka ti lo khawp mai,"Ni love, Pathian chuan min hmangaih a lawm. Hrehawm taka kan awm hi a phal teuh lo mai,"ka lo ti nghal vat a. Mahse, Amuana chuan min la hniar char char a,"Pathian hian hrehawm taka kan awm a phal lo a nihchuan, tunah te hian hetiang hmunah te hian kan awm lo ang. I duh leh nang chu ṭawngṭai rawh, kei chu ka ṭawngṭai ve peih lo,"a hmel chu ka en a, a thinrim takzet tih ka hai lo. Ṭawngṭai tura tur luih chi a ni lo tih ka hria, ngawi rengin Bath room lamah ṭawngṭai turin ka lut phei nghal a.

[5/6, 10:29] RZ Thangluah: