GYPSY - 4

CHAPTER--4

By:- Rs Thangluah✍🏼

Amuana hliam chu ka buaipui nghal char char a. Engthil nge a tih tih chu zawh pawh ka tum buai duh tawh lova, ngawi rengin a hliamah chuan damdawi chu ka hnawih a. Ani pawh chuan engmah a sawi zui lem lo, ngawi rengin a ṭhu a. A rilru erawh a hah ve viau a ni tih chu ka hai lo, chutia rei fê kan ngawih dun reng hnuah chuan,"Te, hetiang dinhmuna kan ding chung pawh hian Pathian hi i la ring cheu a maw?,"a rawn ti chhuak hlawl mai a.

"Aw ring e, i ring ve miah lo em ni?,"ka lo ti vat a, a hmel chu ka en reng a. Za vak lo hian a rawn nui a,"Pathian hi awm tak tak ni se, ka âuh vak vak lai khan ka âu thawm hria in ka thil dil te kha min tih hlawhtlin sak ngei ang,"a ti a, a hmel chu a dur khup mai a.

"Pathian hi kan duh hun huna kan duhzawng kan tih tir tura awm a ni hleinem. Ani chuan kan tana ṭha lo tur chu kan chungah engmah a thlen tir ngai lo a sin,"ka thiam ang tawk chuan ka sawi ve a. Amuana thinlungah chuan engtintak thu sawi ve ang maw?

"Nihchuan kum 6 mi ka nih lai ka pa in min boralsan te, ka nu in pasal dang a neih te. Ka pa hrawn, min hringtu ka pa min theihnghilh tir hial thei khawpa ka nganat em em in kan inkar chu a tih chah te, Addict leh fahrah ka nih te hi ka tana ṭha tura Pathian ruat vek maw? He saltanna aṭanga ka chhuah theih nan hian vawi tam Pathian ka âu ve a sin. Mahse, tun thleng hian eng chhanna mah ka dawng lo, ka ṭawngṭai chhan a hnekin kan In aṭanga pet chhuah ka nih zawk hi. Khawngaihin ka beng hriatah chuan Pathian hming hi lam ri tawh lo hram ang che,"a thusawi zawng chuan a âw chu a khur der der a, a thinrimin a rilru pawh a na hle tih a hmelah chuan a lang reng mai. Tih vak ngaihna ka hre si lo,"I tan ka ṭawngṭai ṭhin ang,"ka ti zawi sap a.

Hunawl ka neih apiangin Amuana tan ka ṭawngṭai ṭhin. A nunah hian eng nge thleng a, eng harsatna nge a tawh tih erawh ka hre tam lem lo. Mahse, kan nun nena ka tehkhin chang hian mi vanduai tak chu a ni ve tih erawh ka hai lo. A hliam te pawh an dam ve ṭan a, kar tawp Zirtawpni zanah chuan palian 2 te bawk kha an rawn lang leh a. Amuana hnenah chuan thil fun hi an rawn pe a,"Zaninah chuan i mission hi i tih hlawhtlin ngei ngei a ngai tawh ang aw. I tih hlawhtlin loh chuan, thil thleng tur chu i hriat kha aw. A hun ngai, a hmun ngaiah aw,"an ti a, engmah sawi zui lovin min chhuahsan leh nghal a.

"Eng thil nge?,"tiin Amuana chu ka lo zawt vat a. Mahse, min chhang lo sana a en a, a insiam zui malh malh a. A insiam zawh chuan ka bulah a rawn kal hnai a,"Tunah rih chuan engmah ka la hrilh thei lo che, min hrethiam dawn nia aw. Keimah lovin mi dangin kawngka an rawn kik chuan hawn sak suh aw. Ka rawn let leh vat ang,"engmah ka sawi ve hma in a kal nghal daih a. A thil tih tur chu eng nge ni ang le? tiin ka ngaihtuah zui nasa mai a; mahse, rin zawn tur lah engmah ka hre si lo. A lo haw hma chu ngawi rengin kan room khawhar takah chuan ka lo nghak ngar ngar mai a.

Zan dar 11:30pm velah chuan,"Te, keimah aw kawngka lo hawng la,"tih ri chuan ka muthlu chu min ti harh zawk a. Ka tho rang kher mai, kawngka chu ka va hawng nghal vat a. Amuana chu a lo ding reng tawh a, a lo nui var var a,"Ka hlawhchham tawh love,"a lo ti sap a. A thil tih ka hriat loh vang chuan ka lungawi lo ve ṭep tawh a ni, engtinmah ka chhang lova kawngka chu ka khar a, ka kalh leh nghal a. Amuana chuan ka lungawi vak lo a ni tih a hrethiam a ni ngei ang,"Te, ka tihpalh lutuk aw. Eng lo a nia, helai hmunah hian kar 1 bak kan awm thei dawn si lova. Sum ka thawh chhuah a ngai a lawm,"a ti a. Mahse, ka la ṭawng duh chuang lo,"Nichina ka thil tih kha chu mi Bike ka ruk sak a. Chuan, Damdawi ka pe bawk a,"a ti ta nge nge a.

"Eng maw?,"ka lo ti deuh hâ mai a. A thil tih chu ṭha ka ti lo ang reng khawp mai a. Ani pawh chuan ṭha ka ti lo tih a hrethiam a nih ngei ka ring,"Ka tihpalh lutuk, a thleng nawn tawh lovang,"a zawi sap a. A hmel aṭang chuan a inthiam lo ve hle a ni tih pawh ka hai lo,"Ka tihpalh lutuk aw,"a ti leh sap a. A kekawr ipte aṭang chuan pawisa a rawn phawrh a,"Hetah hian zan 1 chiah kan awm thei tawh dawn a. Kan chhuah hunah In luah tur kan zawng dawn nia,"a tih chuan mak ka ti ngei mai.

"In luah tur a? Sum engmah kan neih loh hi,"ka lo ti vat a.

"Ka awm hi, a ṭul ṭul ka thawk ve tawh mai ang chu,"tih pah chuan a nui suk a. Mahse, In luah chu a ngaih anga awlsam a ni ngawt si lova.

Riahra hmun tur kan nei tawh si lo. In luah tur lah Vana rah ang mai a ni si, Amuana nen chuan kan tei kan tei kual a, kan pawisa neih sa chu a vaiin ₹5000 a ni. Mahse, chu ringawt chuan rei min daih dawn si lo. Amuana lah a damdawi tih chu vawi leh khatah a nghei ngawt thei bik bawk si lo, rilru chu a hah ve takzet zet a ni. Mahse, min hmangaihtu Pathian a awm a, ani chuan kan tana ṭha lo turin engmah min ruat sak ngai si lova. Amuana awmdan chu a dik lo tih ka hai lo,"Amuan, i ṭha em?,"tiin  ka zawt vat a.

"Aw ka ṭha lawm,"tiin min lo chhang vat a. Mahse, a ṭha lo tih ka hai si lo,"Amuan, i dik miah lo a nia,"ka ti leh a. Mahse, engtinmah min chhang lo, a kut a hum ruh a, a khur ngat ngat a. Tih ngaihna vak ka hre bawk si lo, ka rilru in ka ṭawngṭai mawlh mawlh mai a,"Aw Lalpa, tunah hian i puihna ka mamawh takzet a ni. Khawngaihin min pui hram ang che aw,"ka ti mawlh mawlh a. Amuana lah chu a hma aiin a awmdan a dik lo nasa tawh a,"Amuan, engkim a ṭha vek mai ang,"ka ti leh ringawt a. Amuana chu a rum ṭuah ṭuah tawh mai bawk si, ka hawi kual a mi tumah hmuh tur an awm bawk si lo. Ka buai tawh takzet a ni, Amuana chu a khur hlawk hlawk a, a meng rang vek a, zep lo chuan hetiang hi ka vawikhat buaipuina a ni a. Ka hlau takzet a ni, Amuana chu ka kuah a,"Amuan, engkim a ṭha leh vek mai ang,"ka ti leh ringawt a.

Amuana chu ka thiam ang angin ka bawihsawm a, rei ngial kan inbuaipui hnuah chuan ngai a rawn awh ve ṭan ta. Zan a rei tawh a, mi vei vak pawh hmuh tur an tlem tawh khawp mai. Amuana chuan in thiam lo hmel zet hian,"Te, ka tihpalh lutuk aw,"a rawn ti thâm ṭiak a.

"Nuam lo ti duh suh, ka hrethiam che a lawm. I zia deuh tawh em?,"ka lo ti vat a. A in kuangkuah hlun a, vawt a ti deuh niin ka hria,"Imm ka ṭha e, khatiang khan ka awm zeuh zeuh maithei a nia aw. Min hrethiam dawn nia aw,"a ti leh a. A bulah chuan ka tawlh hnai a, ka kuah a,"Imm pui tur che in i bulah ka awm reng dawn a lawm,"ka ti ve mawlh mawlh a. Kan awmna hmun chu a him chiah lo deuha a hriat vangin hmun biru deuh hlekah kan kal a. Zan a rei tulh tulh a, rilru a hah tulh tulh thung si. Amuana chuan,"Mutthilh tum la, ka lo veng ang che. Khua te han var phawt se, awmna tur kan ngaihtuah dawn nia,"tiin mu tur in min tur reng mah se, mut a chhuak thei si lo. Ngaihtuahnaah thil tam tak a rawn lut zut zut reng a, ka nu damlai a  a thu min hrilh ṭhin te. Zan tin mut dawn apianga ka lu chunga kut nghata min ṭawngṭai sak ṭhin te, Bible chang min chhiar sak ṭhin te chu ka ngaihtuah let neuh neuh a. Ka in rin loh karin ka biangah chuan mittui a rawn luang a, Amuana chuan ngawi rengin min lo en reng chu niin,"Te, i ṭha em?,"tih pahin ka mittui luang chu a rawn hru a. Ka ṭawng chhuak thei rih lo, ka ṭawng chhuah chuan ka ṭap dawn si. Tun ṭum chu ka rilru no a chhuak tlat, ka lu ka bu ringawt a. Amuana chuan min kuah a,"I ṭap duh a nihchuan ṭap bawrh bawrh rawh, a pawi lo a nia,"ka samah chuan a chûl hliau hliau a. Amuana min ngaihsak lutuk vang hian ka no ni berin ka hria, ka inhnît feih feih a,"Ka nu kha chu la dam se chuan, hetiang hian ka awm awm si lova,"ka ṭap ṭuau tawh mai. Amuana chuan min kuah a,"Ti chung hian Pathian a awm i la ring che em?,"chu zawhna chu zawhna âtthlak tak ni mah se, zawhna awm thei a ni ve miau si a.

"Aw ring e, Pathian hi a awm a lawm,"ka tihchuan, Amuana chu a nui suk a,"I mak ve ngawt mai. Keichu maw, ka pa in min boral san aṭang khan Pathian hi a awm tak tak pawh ka ring tawh lo,"a lo ti ve thung a.

"I thlirna aṭang chuan ka hriat thiam pui lutuk che nia aw. Mahse, Pathian hi a awm a, a hun takah a che ṭhin a sin,"ka ti leh a. Amuana chu a nui leh suk a,"Pathian thu i sawi hi chuan ka ngei ru riau ṭhin che, ka mut san dawn che. Mut i tum ve hmel si loh, ka na ṭhum mai,"tih pahin a che sut sut a, ka sirah chuan a mu hlun a. Ngawi rengin Amuana chu ka en reng a,"Misual chu i ni lo maw le,"ka ti sap a. Ka awmhmun ka siam rem a, ka ṭawngṭai a ka ṭawngṭai zawh chuan mutthilh tumin ka insiam rem ve ta a.

"Hey, hetah eng nge in tih a? Tho rawh u, in rui leh nghal emaw ni?,"ti a vin tuarh tuarh thawm chuan min ti harh chiang hle mai. Amuana pawh kaihthawh ngai lovin a rawn inperh tho at mai a,"Ka pu, ka pu, kan rui lo a nia,"a rawn ti nghal mawlh mawlh a. Kei lah hlauthawng hma chi ka ni bawk nen, min rawn kaitho tu pa lah chu a thinrim hmel em em bawk si,"Kalsawn rang rawh u, a nih loh chuan Police ka ko ang,"a ti leh khur khur a. Amuana chuan,"Awle ka pu, kan tihpalh lutuk aw. Kan kal dawn e aw,"tih pahin min kai a, min kalpui nghal hlawk hlawk a.

"Heng mifel ho bulah hian kan tan hmun a awm ve lo,"a ti bul hmuk a. Engtinmah ka chhang lo, ngawi rengin Amuana chu ka zui a. Khawilamah nge min kalpui a tum tih pawh ka zawt lem lo, ka hmaah a kal a. Keiin ngawi rengin ka zui zel a, min kal peltu ṭhenkhat te chuan mak tih hmel takin min enzui vung vung zel leh nghal a. City Park kan thleng phei a, foothpath-ah chuan hah chawlh pahin kan ding dun a. Amuana chuan,"Kawng 1 ka hria,"a rawn ti chhuak hlawl a. Ka lo en deuh hâ nghe nghe a, amah bawk chu a rawn ṭawng leh a,"Bungkawnah ka ṭhianpa a awm a lawm. Pan tawp mai ang,"a rawn ti leh a. Mahse, ka inthlahrung ve tawh khawp mai,"A tih chi ang maw?,"ka lo ti vat a. A lu a bu nghut nghut a,"A tih chi ang, Taxi chang ila Taxi in kan kal dawn nia. Ke chuan a hla em mai,"a hmel ka en a, a hah ve tawh hle a ni tih ka hai lo. Zep lo chuan kei pawh ka hah ve tawh khawp mai, ka chawn te chu a na vek tawhin ka hria. Taxi lah chu a vâng pherh erh leh nghal a.

Rei tawk fang Taxi kan chan hnu chuan, Taxi hi a lo kal hlauh mai a. Amuana chuan a lo phar nghal a, kan kal duhna lam sawiin Bungkawn lam pan chuan kan tlan phei nghal a. Bungkawn kawnah chuan min drop a, chuan man te kan in pek fel hnu chuan,"Min lo zui rawh,"tih pahin Amuana chuan min kai a, High School veng lamah chuan min kal phei pui nghal a. Thui pawh kan kal hma in hmana a ṭhianpa a hnek hrep pa kha kan tawk thut mai a. Amuana nen chuan an in din chilh nghal rap a,"Nangni 2 hi eng thil nge tih in tum a?,"an inkarah chuan ka ding nghal vat a.

Rempuia chuan,"I inla pa ve khanglang a ni maw? Min hnek kha ka la theihnghilh lo a nia aw,"an inkara ka ding chung chuan an in nam sawk sawk mai a. Amuana chu ka nam sawn a,"A tawk duhtawk rawh u, a zahthlak kal ang,"tih pahin ka pawt dawr dawr a. Rempuia chuan,"Zomuanpui, kan la inhmu leh khawp ang hre rawh,"tiin a rawn âu nasa mai a. Amuana lah chu a thinrim nasa mai si,"Hmela, kan la inhmu leh khawp ang,"ka nam phei dawt dawt a,"A tawk in bengdai hram hram teh,"ka ti a, kawngpui zau lai deuh ah chuan kan ding a. Amuana chuan,"Ka hnek chak a sin, kha mi tenawmpa kha. Engvanginnge min lo dan a?,"a ti vin tuarh tuarh mai a.

"Ṭhian in nihkha, ṭhian leh ṭhian an insual ngai lo. Bakah khawlaia insual chu a mawi lo a lawm,"ka lo ti nghal vat a.

"Ani nen khan ṭhian kan ni tawh ngai lo ang. Kumkhua in ka hmelma kumhlun a ni reng ang,"a ṭawng chu a vin hle mai. A thinrim takzet tawh tih ka hai lo, chhan let zel aiin ngawih chuh mai chu ṭha zawkin ka hre ta a. Engtinmah ka chhang duh tawh lova, amah in a phun a phun a, ngawi rengin ka ngaithla a, rei ngial a phun hnu chuan a in phun lungawi a ni ngei ang,"Kal ang, kan tlai lutuk dawn,"tih pahin min rawn kai a, a ṭhianpa In lam pan chuan min kalpui leh nghal hlawk hlawk a.

Amuana hi damdawi ngawl vei ni mah se, kawng engkimah ka tan a ṭha in min ngaihsak em em bakah min zah thiam ve hle ṭhin. A ruih ṭhin vang hian ka lakah hian a inthlahrung in a inkiltawih ve em em ṭhin.

"Ka ṭhianpa In chu kan thleng ṭep aw, i chau tawh em?,"min rawn en a, a nui deuh suk a. Ka lu ka lo thing mai a,"I hah chuan sawi mai rawh aw,"a rawn ti leh a.

"Ka la hah hleinem, kei chu ka fit a lawm,"tih pahin ka lo nui hawk hawk a. Ti ti pahin kan kal a, a ṭhianpa In luah pawh chu kan thleng ve mai a. Rin aiin a lo zau zêk leh nghal a,"Bawiha, i bulah kan 2 hian lo awm ve thei ang em? A ṭul ṭul kan thawk ve lawp lawp ang a, chawi tur ang ang chu kan chawi ve mai ang,"tiin Amuana chuan inthlahrun hmel deuh chuan a dil a. A ṭhianpa chuan,"Naktukah ka u fate 2 an lo thleng dawn a. Ka hnenah lehkha zir in an awm tawh dawn a, chuti ni lo se in awm chu ka phal lutuk a sin maw le. A reng reng thu ah, ani hi tunge? Nupui i ruk chu ka ring chiah bawk si lova,"a lo ti ve siam siam a, a fel hmel phian mai. Amuana chuan kan intawn dan chanchin te chu a hrilh a, min lainat ve hmel hle mai. Mahse, a Inah chuan kan riah a rem rih si lo, kan inbual lohna a rei tawh viau tih chu Amuana chuan a hai lo,"Nihchuan, kan rawn riah a rem loh pawn, in tihfai vel i phal tal em?,"a ti leh hram a. Lawma(Amuana ṭhianpa) chu a nui huk huk a,"Tehreng mai, tehreng mai in silfai rawh u. In silfai u la, thingpui te kan in ho dawn nia,"a lo ti hlauh a. Kan inbual lohna a rei tawh bawk a, inbual chhung pawh a rei ve ngang mai. Mahse, kan thuamhnaw ngai bawk chu kan hak leh a ngai dawn si, taksa fai vur mah se, thuamhnaw erawh a fai lem lo khawp mai. Mahse, a hma ai chuan a nuam hrim hrim e.

Lawma Inah chuan thingpui te kan in a, kan ti ti nasa khawp mai a. Lawma chuan,"Bawiha, i pa hnenah chuan ngaihdam dil leh la. A lo ngaidam duh tawh maithei che a sin, hetia awm reng ringawt zawng a dik ber lo a nia,"a ti ve bap bap a. Amuana chuan,"A teuh lo lutuk, vawikhat a hmaah ṭhingṭhiin ngaihdam ka dil tawh a min ngaidam duh hleinem. A fapa a min pawm lo tu hi ngaihdam ka dil reng nachhan tur ka hre lo,"a ti ram hmak hmak mai a. Lawma chuan,"Bawiha, i pa chuan a hmangaih che tih i hriat kha,"a ti leh a. Amuana chu a ding nghal awt a,"Ka pa chungchang min sawipui dawn aichuan kan kal mai ang,"a ti vin ṭhak mai a. An insual ang tih ka hlau ngei mai, ka thinphu a rang nghal vek thei nia,"Amuan, insum deuh la,"ka lo ti vat a. Lawma pawh chuan,"In inkar thu engmah ka hriat loh vang a ni, ka tihpalh aw ṭhianpa,"a lo ti dam thluam a. Amuana thinur lutuk pawh a zia deuhin ka hria, Lawma chuan zan riah ei turin min sawm ngawr viau na chu; mahse, Amuana chuan a duh tlat lova tlai dar 5:00pm velah chuan Lawma In luah aṭang chuan kan inzui chhuak leh nge nge a.