GYPSY - 5

CHAPTER--5

By:- Rs Thangluah✍🏼

Amuana awmdan chu a rawn dik lo leh ṭan a, buaipui dan lah ka thiam lo in ka hre tlem si. Ka kuah a,"Amuan, tuar fan fan rawh aw i bulah ka awm reng a nia,"ka ti leh ringawt a. Amuana chu a khur chawr chawr a, a khawng deuh ti tih ta mai,"Amuan, i ṭha em?,"a lei a seh loh nan ka kut chu a kâ chhungah ka zen lut nghal vat a. Ka kut chu a lo seh nghal chat mai, a van na kher ve le! Ka thiam ang angin ka bawihsawm a, ka kut leh lam lah ka hmang thei tawh si lo. Rei tawk fang ka buaipui hnu chuan a rawn pangngai ṭan ta, a mit meng erawh a la pangngai chiah lo. A meng â ruai mai, ka kut pawh a kâ a ṭangin ka la chhuak ve thei ta. Mahse, a na ve vawng vawng khawp mai,"I ṭha em?,"ka tih chuan engtinmah min chhang lo. Ka ṭawng chu hre âwm pawhin a lang lo, a in hiat seuh seuh reng a. A pangngai deuh tawh tho bawk a, ka kut chu ka buaipui ve a ngai tawh a ni. Ka kut zunglai leh ka kut zungchal chu a duk deuh chur mai. Amuana chuan a hmu ang tih ka hlau kher mai, a hmuh loh karin ka tuai vut vut a ka chhem bawk a. Mahse, awmzia a nei thui vak lo, a nâ a ni tawp mai. Amuana pawh a rawn pangngai chho ṭan tawh a,"Nichin khan engtinnge ka awm a?,"a rawn ti ta chat mai. A awmdan dik tak ka sawi chuan ka lakah a inthlahrung ang tih ka hlau si a,"I muthlu a, i mutthlukna lamah khalaia thir ban kha i tauh a,"tiin dawt ka hrilh ta ringawt a. A hmelah chuan a awih chiah lo a ni tih erawh ka hai lo.

Zan dar 10:30pm vel a niin ka hria, ka lu chu tu emaw hian a rawn chhuih a. Ka lu a hai deuh mawih nghe nghe a,"Hey, helaiah hian eng nge in tih a? Tho vat rawh u,"tih ri chuan a rawn zawm nghal a. Amuana pawh a tho rang kher mai, Amuana chu ka hmaah a rawn ding nghal vat a,"Ka  pu, ani hi chu engtinmah ti suh u,"a lo ti nghal mawlh mawlh a. Kan hmaah chuan patling 2 hi an ding a, 1 zawk chuan,"Helai hmunah hian eng nge in tih a? In rui leh nghal emaw ni?,"tih pahin Amuana chu a beng sawk a. Amuana chuan,"Ka pu, kan rui lo,"tih chiahin a chhang a. Ka banah chuan min vuan a, min tlanchhiatpui a tum tih chu ka hai lo. Kei pawh chu tlanchhiat in ring rengin ka lo inpeih sa ve at bawk a.

"Dawt sawi suh, i mit meng aṭang khan hai theih i ni lo,"a ti vin ṭhak a. Amuana chuan ka kut chu a hma aia nghetin a vuan,"Engmah ka rui lo, medical test pawh ka ngam,"a ti let ve leh ngat a. Kei lah hlau in ka khur ti tih tawh mai si, ka lua min pet na kha ka lu a la hai muai muai leh nghal.

"Min chhang let ngam e law?,"tih pahin Amuana chu a rawn hnek chawrh a. Amuana chu a pai nghal chawn chawn a,"Ka pu, khawngaihin khawih tawh suh,"ka ṭap deuh ṭuau tawh mai a. Amuana chuan ka kut chu a la thlah lova,"Zawnga, i duh duha i khawih tur pawh ka ni bik lo,"tih pahin a nek sawn dawrh a, kan tlanchhia chu a ni nghal mai.

"Hey, ding nghal rawh u,"tia min auhna chu kan ngaithla hman tawh lo. Kan hma zawnah chuan chak thei ang berin kan tlan phei fua fua mai a, Treasury sa zawrhna lamah chuan kan tlan thla a. Kan hah dun khawp mai, kan thaw nghal hlawp hlawp a,"Hetah chuan min rawn hmu tawh lo ang,"Amuana chuan min kuah a,"Keimah vangin hrehawm tam tak i tawrh ve phah a, ka tihpalh lutuk aw,"a ti leh a.

"Nangmah vanga thil thleng a ni hleinem. Hrehawm ti duh suh,"ka lo ti nghal vat a. Kan awmna hmun chu rimchhe viau mah se, hmun danga kal nan hun a awm tawh si lo. Hmun rual rem laiah chuan in ngheng rialin kan ṭhu dun a, Amuana chuan min kuah a,"Hetiang reng renga nun hman reng hi chu a hahthlak ngawt mai tiraw?,"a rawn ti zawi sap a. A rilru ti hnual thei turin eng thu mah sawi ka duh si lo,"Engtikniah emaw chuan Pathian in min hmangaihtu a la rawn tir em em ang,"ka lo ti thung a. Pathian hming ka sawi hi chuan a thinrim nghal hlur zel,"Pathian Pathian ti reng mai. Pathian hi a awm lo ka tih kha, Pathian hming hi lam ri tawh suh,"a ṭawng chu a vin lek lek in ka hria.

"Pathian chu a awm a lawm,"ka ti leh nghat a. Engmah a sawi duh tawh lo, a ngawi reng a. Ka bul aṭanga kalsawn erawh a tum hran lo, mutthilh tum viau mah ila mut a chhuah miau si loh chuan mutthilh a har ngei mai.

Aw min ngaihsak fo tih ka hria,

Ka lungngaihin a ti nâ

Ngui châng ni leh zankhua rei hlauhawm hnuaiah;

Min ngaihsak tih ka hria.

Zawi te te in ka zai a, Amuana chu a muhil tawh emaw ka ti a. Mahse, a lo la muhil lo chu niin,"I zaithiam lutuk,"a rawn ti zawi sup a. Ka zak hnuhnawh leh ang reng hle mai,"I muhil tawh emaw ka ti a, i lo la muhil miah si lova. Min ti zak lutuk aw,"ka ti a, thim tham hnuaiah chuan ka hmai ka hup a. Amuana chuan,"Pathian chuan min ngaihsak ṭhin tak tak em ni?,"a ti thung a.

"Aw engtik hunah pawh min ngaihsak ṭhin a lawm,"ka lo ti vat a. Rei ngial a ngawih vang vang hnu chuan,"Humm Pathian hi ka tan a awm ve lo a nih hi,"rilru hah tih hriat takin a thaw deuh hak a.

"Ni love, Pathian chu mi zawng zawng tan a awm a lawm,"ka lo ti ve leh nghal vat a. Mahse, min chhang tawh lo, Pathian thu lamah hi chuan ka ti ti thui pui thei vak lo a ni ber mai. Mahse, ka ṭawngṭainaah erawh a tan ka dil sak reng ṭhin.

Zing khawvar hma in kan awmna hmun aṭang chuan kan in sa seng a. Amuana taksa chu a chhe chak khawp mai, pawisa lah kan nei tlem tawh si. Awmna tur hmun lah kan nei si lo, a chang chuan beidawn ve rum rum chang pawh ka nei ve ṭhin. Mahse, ka nu in min hrilh kha ka hre reng ṭhin,"Pathian chu kan tan a awm reng a. Aman ṭha a tih angin kan chungah ro a rel mai ṭhin,"tiin min hrilh ṭhin. Chu chu hre rengin ka in ti chak hram hram ṭhin, Amuana nen chuan Bazar lam panin kan in zui phei leh hnak hnak a. A hmaa min kalpuina hmunah khan min kalpui leh a, Nu Kimi chuan min lo be nghal luam a,"Bawiha, hmanni chu i nu a rawn kal a. Ka khawngaih lutuk a sin, haw tawh mai teh,"a lo ti leh a. Mahse, Amuana chuan Nu Kimi chu engtinmah a chhang lo, keimah min en a,"Ka rawn let leh hma chu hetah hian lo awm reng ang che,"a ti a, a kalna tur pawh sawi lovin min kalsan nghal daih a. Nu Kimi chuan,"Khawiahnge a kal dawn a?,"tiin min zawt vat a. A hre zawk tura ka rin in min zawt let hlauh mai,"Ka hre bik miah lo,"ka lo ti ve mai a. Nu Kimi chu a ngaih a ṭha lo deuhin ka hria,"A mak ṭhin em mai, kan naua hi chu aw,"tih pahin a Mobile Phone chu a phawrh a, tu emaw a call a, lo kal nghal turin a hrilh nghal bawk a. Min rawn en a,"Nang hi chu hmeichhe ṭha lo chu i ni hauh lo ang,"a ti zawi sap a. Ka nui ringawt a, engtinmah ka chhang lo.

Rei fê hnu chuan nutling pakhat, a incheina leh a hmel en reng reng pawha khawsa thei tih hriat reng reng hi a rawn kal a,"Bawiha chu khawnge?,"a rawn ti nghal tawl a. Nu Kimi chuan,"A kalna tur pawh a sawi lo, dar 4:00pm velah a rawn let leh ang ka ring,"a lo ti vat a. Chu nu rawn kal chu Amuana nu a ni tih ka hrethiam nghal mai. Min rawn en a,"A ṭhiannu i ni em?,"tiin min zawt leh nghal zat a.

"Aw ni e,"ka lu ka lo bu nghut a.

"A kalna tur chu a hrilh lo che em ni?,"a mangan hmel kher mai.

"Aih hrilh miah lo."

"Heiham, a van hahthlak ṭhin tak êm! Tunah dar 7:00am chauh a la ni si, tlai dar 4:00pm thleng ka nghak hman lo a sin,"a Mobile Phone a phawrh a, mi a be nghal mawlh mawlh a.

"Makim, Bawiha chu a rawn let hunah min lo hrilh ang che aw. Mahse, ka rawn kal tih hi a hriat ka duh lo a nia,"a ti leh a. Nu Kimi chuan,"Tehreng mai, ka lo hrilh vat ang che,"a lo ti ve bawk a. Kei erawh min be chhunzawm tawh lem lo, hmanhmawh takin Amuana Nu chu a chhuak leh nghal a.

Tlai dar 4:00pm rik hma hret chuan Amuana chu a rawn let leh a. Eng nge a tih pawh chu min hrilh lem lova, ₹200 note 2 hi min rawn pe a,"Riahna tur pawh ka hmu leh tawh e aw. Mahse, zan 1 chiah a riah theih a,"a nui suk a. Nu Kimi chuan a Phone chu a kheuh malh malh reng bawk a,"Bawiha, in kal leh mai dawn em ni?,"a rawn ti ve bawk a. Amuana chuan,"Aw kan kal leh mai ang, ka chhungte bulah ka chanchin hi hrilh suh aw,"ti mah se, awmzia a awm lo. Nu Kimi chuan,"Aw hrilh lo ang,"a lo ti liam ve mai a, Nu Kimi dawr aṭang chuan kan in zui chhuak leh nghal a.

"Tuikualah riahna tur ka hria a. Class-X ka nih laia ka ṭhianpa ṭhin a nia, naktukah a chhungte zin an lo haw dawn a. Zanin chu in lo riak dawn nia a ti hlauh a, a tih chi tak tak a ni,"a ti a, a hlim ve viau in ka hria. Bazar aṭang chuan Tuikual lamah kan inzui thla leh a, a ṭhianpa te In pawh kan thleng thla har lo kher mai. An In chu a zau in a nuam phian leh nghal a, chaw te kan ei kham fel hnu chuan Amuana ṭhianpa chuan,"Bawiha, Dawrah min han kalpui lawk teh aw. Ṭhiannu, In lo nghak la,"tih pahin a Bike chahbi chu a la a.

"In kal hla dawn em?,"ka lo ti vat a.

"Aih hla dawn lo, kan rei dawn lo bawk aw,"tih pah chuan a nui suk a. Amuana nen chuan Dawra kal turin min chhuahsan nghal a.

Rei fê an thang hnu chuan Amuana ṭhianpa chu anah chauhin a rawn ta mai. A mangan hmel em em mai leh nghal,"Ṭhiannu, Amuana kha an la daih,"a rawn ti ta mai si. Ka mangang lutuk chu sawi mai tur pawh ka hre lo,"Maw? Eng....engtinmaw? Amuana chu khawiah maw?,"ka lo ti nghal chûl a.

"Motor-ah an phur daih, kei pawh ka rawn inkhalh thleng thei ṭawk ṭawk a nih hi,"a Helmet chu a phelh a, a hmai vel chu a thi nuau mai a. A van mangan thlak leh zel ṭhin êm! Amuana chu khawiahnge a awm ang le? Amuana ṭhianpa chuan First Aid box a rawn la a,"Ṭhiannu, min lo pui lawk thei em?,"a rawn tih chuan ka pui ve nghal mai a. Ani pawh chu a mangang ve tih ka hai bik lo,"Police hnena report chi a ni ang em le?,"a ti leh ringawt ṭhin. Mahse, kei chuan report chi a niin ka hre si lo, zanah pawh a tu a mah mah kan muhil lo. Sitting room-ah chuan kan ṭhu zankhua ṭhak a, zingah a chhungte an lo thleng tawh dawn bawk si. Amuana ṭhianpa chuan min ngaihtuah ve tho bawk si,"Ka chhungte hi zing karah an lo thleng dawn a. An hmuh che chuan an a thin a rim dawn chiang sa a; mahse, a pawi lo, kalna tur dang i neih loh thu ka hrilh ang a, hetah i awm thei ang,"tiin min ṭawng thlamuan ve viau mah se, a hmel leh a mit meng aṭang chuan a chhungte chu a hlau a ni tih ka hai si lo.

"Ni love, keimah vanga i chhungte'n an hauh dawn che aichuan ka kal zawk mai ang. Bakah Amuana ka zawn a ngai tho a,"ka lo ti vat a. Min kal tir chu a hreh takzet tih chu ka hria; mahse, keimah vanga a chhungte'n an hauh chu ka rem ti bik si lo. In chhung dungah chuan a tei kual sek a, a lu thak lo pui chu a hiat a hiat a,"Aaaaa, a nih nih ni mai rawh se. Kal rih suh, Amuana pawh chu kan 2 in kan zawng dawn nia,"a tih tak tlat vang chuan ka kal lui duh ta bik lova.

Zing lam dar 6:00am velah Mapui(Amuana ṭhianpa) chhungte pawh an rawn thleng ve ta. An hriat ngai loh hmeichhia min hmu ta chu an phâwk hlawm kher mai. Mapuia nu chuan en pawh min en uluk kher zek leh nghal a,"Tunge i nih a?,"a ti chang nghal fak a. Chhan tuma ka kâ ka ân zuau lai chuan,"Ka ṭhiannu a nihkha,"tiin Mapuia chuan min lo chhan khalh vat a. Mapuia nu chu a meng no lo hle mai,"Engtia i ṭhiannu nge?,"a ti leh a. Mapuia chuan,"Iiiih eng lo a nia."

"Iiih eng lo chu eng nge?,"a nu chu a thinrim takzet tawh a ni. A nuam lo duh kher mai,"Mapui, ka kal phawt mai ang, pawi ka ti lutuk,"tih pah chuan kal mai ka tum a. Mahse, a nu zawk chuan a lo phal lo nasa mai a,"Engmah sawi lovin i kal ngawt thei lovang aw. Ṭhu rawh,"a ti ram hmak mai bawk si. Kal luih ngamna chi pawh a ni tawh lo, Mapuia farnu te chuan ngawi rengin min en reng a. Mapuia lah chu a ngawi reng tawh mai bawk si,"Ani hi tunge?,"tiin a nu chuan a zawt nawn leh a. Mapuia chuan min rawn en a,"Nizanah kan in ru a,"a ti ta mai. Ka meng rang nasa lutuk chu min rawn signal zui a, ka hlauthawng lutuk chu ka sa chhuak vek theiin ka hria. Mapuia nu chu a ding ngil auh mai,"Zorinpui, i zak miah lo em ni? Thla thar maia nupui nei tur i ni tih kha i theihnghilh em ni?,"a ti ta phiar phiar mai. Ngawih reng chuan awmzia a nei thui vak lo tih chu hrilh kher ngai lovin ka hre thiam nghal mai a,"Ka pi, chutiang engmah a awm lo. A ṭhian satliah ve mai a lawm ka nih. Nizanah ka ṭhianpa nen in Inah hian kan lo riak a, ka ṭhianpa in min hawsan a. Ka la awm khawmuang rih a nih hi, Mapuia sawi ang kha engmah a ni lo a nia,"ka ti bah nawk nawk mai a. Mapuia nu chuan,"Ummm a nihchuan i kal thei e, nangni ang hmeichhe duk dak lo tan kan In chhungah hmun a awm lo,"a ti chang fak mai si. Mapuia lah chuan engmah a sawi ngam tawh lo, ngawi rengin ka chhuak tur chu min thlir liam ta ringawt a.

Pan tur lam ka hre tawh lo, Amuana lah ka kiangah a awm tawh si lo. Engtinnge zan hun ka hman ang? Amuana chu khawiahnge a awm ang le? A tel lo chuan engtinnge pawisa ka thawh chhuah ve ang? Ka rilruah Nu Kimi a lo lang nghal zawk a, Nu Kimi Dawr lam panin ka chho nghal vat a. Mahse, Nu Kimi chuan a Dawr a lo hawng hauh lo mai. A Dawr sira nu 1 hnenah chuan ka zawt tawp a, ani lah chuan engmah a hriat loh thu in min chhang bawk si. Rilru hahdam taka awm a van harsa tak êm!

Zing dar 8:00am vel a ni a, ril a rawn ṭam ṭan a. Thingpui Dawr ka hmuh hmasak bernaah chuan inhnawh puar turin ka lut nghal a. Rilruah Amuana hlir a awm a, thil ei pawh a tui thei tak tak lo. Kan 2 a kan riah dunna ṭhin zawng zawngah chuan ka kal kim vek tawh, Bungkawn venga a ṭhianpa Inah pawh ka kal a; mahse, Amuana hmel hmuh tur a awm lo. Ka rilru in ka ṭawngṭai mawlh mawlh reng a,"Aw Lalpa, Amuana hi ka hmuh leh min remtih sak lo a nih pawn, khawngaihin veng him hram ang che aw,"tiin ka dil mawlh mawlh a.

Khua a lo tlai a, ni êng a bo a. Thim chuan Lalna hun a rawn chang ṭan ta, khawiahnge ka riah tak ang? Keimah chauh chuan kal ngaihna ka hre lo a ni. Amuana kha chu awm se, hmun him leh hmun fâl deuhah min kalpui ang a. Thlamuang takin a kiangah ka awm leh tawh awm si a. Mahse, tunah chuan Amuana tel lovin hun ka hman a ṭul tawh dawn si. Pan tur lam em em pawh hre lo chuan ka tei kual ka tei kual a, ka ke te chu an na zo tawh. Ka chauh tawng khawng hnu chuan, Vanapa Hall bul foothpath-ah chuan ka ding ta nge nge a. Ka piah deuhah chuan hmeichhe 1 hi a ding ve bawk a, a la naupan hmel viau leh nghal a. Chu nu chuan min rawn en leh ṭhin a; mahse, ka lo ngaihven lem lova. A hnu deuhah chuan min rawn pan ta nge nge a,"Ṭhiannu, ka lo tibuai lawk thei che ang em?,"a inthlahrun hmel kher mai.

"Aw eng nge ni ta?,"ka lo ti vat a.

"Engzatnge i inchhiar?,"a ti mauh mai. A awmzia ka van hre lo tak êm! Ka hawi â deuh hâ mai a,"Eng maw?,"ka lo ti vat a. Ka hmel a hmuh chuan a zawhna chu ka hrethiam lo a ni tih a hria a ni ngei ang,"Ooh, ka tihpalh, ka hai che a niang,"a ti a, kal leh mai a tum a. Mahse, ka lo pawt ding vat a,"Lawkin, khawiahnge i kal dawn?,"ka ti ve thawr mai a.

"Ka hre lo, kalna tur ka nei lo,"a ti zawi sap a. Keimah ang tho a, pan tur nei lo a ni tih chu ka hrethiam nghal a,"Kei pawh hian kalna tur ka nei bik lo a sin,"ka tih chuan a ding det a, a rawn inher a,"Kalna tur i nei bik lo maw?,"mak min tih hmel hle mai.

"Imm nei lo,"ka lo ti ve vat a. Ani nen chuan kan inkawm tlangnel chho a, kan hming te kan in hrilh a. A chanchin tlangpui min hrilh bakah kei pawn ka chanchin tlangpui ka hrilh ve bawk a. Kan inpawh dun viau mai; mahse, ani pawh chu Amuana ang tho in No.4 addict a lo ni ve tho a. Chumi avang erawh chuan ka lakah inthlahrung lo turin ka hrilh nghal bawk a. A hming chu Mahriati a ni a, kei aiin kum 2 in a naupang a. Ani chuan chhungte a nei a; mahse, a chhungte bula awm aichuan khawlai vela hun hman chu nuam a ti zawk tlat si a.

"Ka nu te chuan min zawng leh nasa tawh ngawt ang. Mahse, ho e pawi pawh ka ti lo, kan In chhung aichuan pawn hi nuam ka ti fê,"a ti ti siam siam chu ka en reng a. Chhungrilah natna tam tak a tuar mek niin ka hria, a chhan chu a mit meng chu lungngaihna mit meng a ni tlat a ni.

"I chhungte chuan an hmangaih che a sin,"ka lo ti vat a. A nui hak a,"Ka chhungte hian min hmangaih lo chu ka ti hauh lo. Mahse, min enkawl dan erawh ka vui ve khawp mai."

"Kan chhungte tluka min hmangaihtu hi an awm lo a sin,"ka ti leh hram a.

"Huh, nih pawh a ni ang. Nang pawh i chhungte'n an hnawh chhuah tho che kha,"min tih takah chuan chhan dan tur ka vân hle mai, ka ngawi kur  mai a. Amah vek chu a rawn ṭawng leh a,"Ka nu leh ka pa chu kohhran leh khawtlangah an inhmang em em a. Tin, ka nuṭa te pawh kohhran leh khawtlangah an inhmang bawk. An farnu neih chhun erawh ruihhlo ngâi, zan chhuah chîng, suahsual rawngbawl hrat mi ka ni. Mahse, ka tan hian vawikhat pawh an ṭawngṭai ka la hre lo. Thiamna lamah ka nuṭa te 2 chu an sang filawr lak a. Kei lah class-Xii pawh pass chhuak zo lo ka ni, an fanu hi chhuan tlak ka awm lo. Chumi avang chuan In chhungah ngaihsak ka ni ngai lo, ka duh leh mamawh ka sawi erawh chu min tihsak lo ngai lo. A chhan chu, min tihsak loh chuan chhungkuaah buaina ka siam a, chhungkua in kan mualpho ṭhin si a. Chumi chu hre rengin ka dil apiang min pe ṭhin; mahse, kan In chhung erawh nuam ka ti ngai lo. Chhung inkhawmnaah te pawh tel ve ṭhin mah ila, ka tan min dil sak ve ngai lo. Ka nuṭa te 2 erawh an hming lam meuhin an tan an dil sak ṭhin,"a chawl det a. A Jacket Ipte aṭang chuan bawm tereuhte a chhin sen hi a rawn phawrh a,"Ka chhungte aichuan he thil hian min hmangaih zawk. Ani hi chuan min ngaihsak lo ve ngai lo, ka mamawh hun apiangin ka bulah a awm ṭhin,"a ti leh mawlh mawlh a. A thil ken chu Amuana hnen aṭang khan eng nge a ni tih ka hriat tawh avangin, ka hawi â hû tawh lem lova. Mahse, Mahriati chu ruihhlo eichhiat atan chuan a uiawm mah mah a ni.