GYPSY - 6

CHAPTER--6

By:- Rs Thangluah✍🏼

Mahriati nen chuan Zodin Bridge lamah kan inzui phei ta hnâ hnâ a. Pawisa chu a ngah ngang mai, a ṭhiante a be kual nghal bawk a. Zodin Bridge-ah chuan a ṭhiante nghah pah chuan kan ding rân mai a. Tun ang hun tlai tawh taka helai hmuna awm hi chu a nuam chiah lo. Mahse, ka hun tawn hian a zir miau si lova. Mahriati chu ka rin aiin a lo fel zek mai, min ngaihsak em em mai bawk a,"Te, i ril a ṭam tawh em? Ka ṭhiante hi lo thleng phawt se, thil kan ei dawn nia aw,"a rawn ti a.

"Aih ṭam love, a la hma a lawm,"ka lo ti liam ve mai a. Kan ti ti mawlh mawlh lai chuan mipa 3 hi kan dinna lam pan chuan an rawn kal a, Mahriati chu an rawn bekbawr sur sur a. An hmelhriat loh min hmu ta chu min en deuh hrek hrekin ka hre leh nghal a. Mahse, Mahriati chuan a ṭhian chhar thar ka nih thu leh ka hming te chu a hrilh nghal zung zung a. Anni 3 pawh chu an hming a sawi nghal bawk a, ti ti siam siam pahin a thil chah chu an in pe a, an in pek zawh chuan min kalsan leh nghal a.

Mahriati nen chuan Bazar lamah kan phei a, zep lo chuan ril a ṭam ve tawh khawp mai. Mahriati chu ka zui tawp a, min kalpui na tur pawh ka zawt hran chuang lo.

"Ka tawng che chu ka vannei kher mai. Tawng lo che ila chuan, sawlai hmunah khan ka ruang an hmu ang,"a kekawr ipte aṭangin Sikret a rawn phawrh a, a ṭan a a pak khu nghal tulh tulh a.

"Engvangin maw?,"ka lo ti vat a.

"In aṭanga ka rawn chhuah hma hian, ka nu nen kan inhau a. Tuman ka thlavang an hauh lo, an vaiin min chilh rawn a. Ka rilru nat zia chu i hrethiam phak kher lo ang. Ka thinrim chu In aṭangin ka tlan chhuak a, min ngaihsaktu tu emaw tal ka hmuh loh chuan ka inti hlum ang tiin ka rilru ka siam a. Mahse, nang hi ka tawng ta che a, ka nunna min chhanhim sak a nih hi,"tiin a sawi siam siam a.

"Kei pawh ka lawm a sin, pan lam tur pawh ka hriat loh laiin i lo lang a ka lawm lutuk,"ka lo ti ve vat a. Mahriati chuan a Phone chu a kheuh mual mual a,"Yes, ka ṭhiannu te Inah riahna a awm hlauh e. Chhinga Vengah nia, Taxi la ila kan kal nghal dawn nia aw. Mahse, ka ril a van ṭam tak,"a rawn ti nghal bawrh bawrh a.

Thingpui Dawr in hawng a vâng tawh hle mai. Vanneih asiamin Dawr te inhawng 1 kan hmu hlauh mai,"Tah sawn ei tur chu lei mai ang,"tiin kan pan phei nghal a. A chhung kan luh hma chuan Dawr chhungah chuan U Hriatpuia ka hmu hlawl mai. Mahriati bulah chuan,"Mahriat, pawnah hian ka lo nghak mai ang che aw. Ka rawn lut ve lo mai ang,"ka ti a, a thim lai chu ka chuh nghal rawk rawk a. U Hriatpuia chuan min rawn hmu ang tih ka hlau ngei mai, Mahriati pawh chu Dawr chhungah chuan amahin a lut ve nghal mai a.

Rei pawh rial lovin Mahriati chu a rawn chhuak leh nghal a. Ei tur eng eng emaw a rawn khai chhuak ṭûn a,"Ke in kal mai ila, Taxi hi a van hmel tawh si,"tih pah chuan min rawn pan a.

"Nia a pawi hleinem,"ka lo ti ve nghal vat a. Ka awmna hmun aṭanga ka chhuak chiah chu, U Hriatpuia chuan min rawn hmu chiang ngei mai,"Te, nangmah i ni em?,"a rawn ti mai chu(h). Ka chhang lo chiang teh a sin, Mahriati chu ka kai dawr dawr a,"Kal vat vat ang,"ka hmanhmawh lutuk vang chuan ka la inpal khut khut zui leh nghal. U Hriatpuia lah chuan,"Lalramnunthar, lo ding teh,"tiin ka hming pum meuhin min rawn âu a. Mahse, din chu sawi loh hawi pawh ka hawi let eih lo, Mahriati lah chuan a ngaihna a hre lo em em bawk si,"Eng nge a awmzia? Tunge khapa kha?,"tiin min zawt nghal chûk bawk a.

"Nakinah ka hrilh ang che, i ṭhiannu te Inah chuan kal phawt ang,"ka lo ti ve thung a. Hmanhmawh ang reng takin Chhinga Veng lamah chuan kan kal thla nghal hlawk hlawk a. Kar lovah a ṭhiannu te In chu kan thleng thla nghal mai a, an lo ri luih luih mai a. Zu rim leh meizial rim chu a nam chum chum bawk a, thâwk a har ngei mai. Mahriati chuan,"Ka bulah awm tlat la, khawiahmah kal hrang suh aw. Heng ho hi ka rin zawng an ni lo a nia, i pawisa ah kha fimkhur deuhin ak bawk la aw,"tiin min hrilh thlap bawk a. A ṭhiannu ni áwm tak chuan nui sângin min rawn pan a,"Ṭhian thar kan nei dawn a ni maw? Khawi lam mi nge a?,"a rawn ti nghal bawrh bawrh a. Mahriati chu ka hmaah a ding a,"Tunah chuan riahna tur chiah kan mamawh. A dang chu engmah min zawt suh, ani chungchang ngat phei chu,"a ti chang fak mai a. Kan hmaa hmeichhe ding reng chuan,"Aaa aw awle, min lo zui ru,"tih pahin a inher nghal vut a. Mahriati chuan ka kutah min kai a,"Tuman an biak loh che chuan tumah hi be suh aw. Anni hnenah hian zanin chiah kan riak ang,"tiin ka benh bulah chuan min rawn hrilh a. Kei chuan ka lu ka lo bu ve nghat nghat bawk a, room 1-ah chuan min hruai lut a.

"Naktuk zing khawvar rualin kan chhuak leh nghal ang. I û khan min lo hmu rawh se aw,"Mahriati chuan hmeichhia chu ₹200 note a pe a. Hmeichhia pawh chu a kal ve leh nghal mai a, Mahriati chuan,"Hrehawm i ti em?  Chuan, khapa tunge a? A âu nasa bawk che sia,"a ti ta nge nge a.

"Aih hrehawm ti love, khapa chu kan Branch Leader a nihkha. U Hriatpuia a nia."

"Mak chu a ti ve ngawt ang."

"Nia, min rawn zawng tih chu ka hlau ve reng mai."

"E, ti daih ila a hma in engtinnge i khawsak ṭhin? Kan intawn hma in."

"Ka pitei te In aṭanga ka chhuah khan ka nu thlanah ka riak a. Chumi tuk chuan mipa 1 nen kan intawng a, ani nen chuan kan inzui char char ṭhin a. Mahse, nizan aṭang khan a bo daih a, zawn vak ngaihna pawh ka hre lo. Kan pahniha kan riah dunna vel chu ka en kual vek tawh a. Mahse, ka hmu lo."

"A zia lo hle mai, tunge ni reng reng a? A hming min hrilh thei ang em?"

"Zomuanpuia a nia, a fel lutuk."

"Amuana maw?,"mak a tih hmel hle mai.

"Aw ni e, i hre ṭhin em ni?"

"Zomuanpuia, Amuana ka hria a lawm. Kan inkawm ve nasa ṭhin; mahse, ani pawh a pa in In aṭanga a hnawh chhuah aṭang khan a chin ka hre tawh lova."

"In veng a inang em?"

"Kan veng chu a inang lo. Mahse, an Inah chuan ka leng ve zeuh zeuh ṭhin."

"Nia, kei pawh vawikhat chu an Inah chuan min kalpui tawh a. A pa hnenah pawh ṭhingṭhiin ngaihdam a dil; mahse, a pa in a ngaidam duh lo."

"A pa saw misual a nih saw, ka hua so bawrh bawrh. In la fekfawn si, engmah ni si lo,"a ti nghal bawrh bawrh a.

"Amuana chu an In ah a awm i ring em?"

"Ka hre lo le, naktuk lamah kan va kal chhin dawn nia aw."

"Mahse, a tihchi dawn em ni?"

"A chanchin hriat nan hrim hrim pawh a ṭha lawm."

Kan ti ti malh malh lai chuan hmeichhe 1 hi a rawn lut a,"Zanin chiah maw in riah duh?,"a rawn ti lut nghal a. Mahriati chuan,"Aw zanin chiah a ni mai,"tiin a lo chhang vat a. Chu nu chuan min en chîk viau mai leh nghal a,"Ṭhian thar kan nei a ni maw?,"a ti sup a, a nulian bawk si a ka hlau lek lek a ni. Mahriati chuan,"Ani chungchang hi chu tunah chuan min zawt rih lo mai la aw. Ka mamawh chu i hriat kha,"a lo ti bul hmuk a. Mahse, chu chuan ka chanchin hre lova room chhuahsan chu a tum lo bur mai si,"I sawi dawn nge? Hei hi ka paih bo dawn?,"tih pahin Syringe hi a rawn lek kâng vâ vâ mai a. Mahriati chu a ding hluai a, an intibuai ang tih chu ka hlau zek zek mai. Ka tirilah ka khur der der tawh mai a,"Pawisa kha min rawn pe let leh rawh. A nih loh chuan min hriat chian kha,"an indin chilh ran tawh mai a. Mahriati chu te zawk ni mah se, a tlawm duh bih hauh lo. Chu nu chuan,"Hey, nang kha kan hnenah i awm duh a nihchuan, kan nun dan anga i awm ve a ngai ang aw,"tih pahin min rawn melh a. Mahriati chuan chunu chu bangah chuan a nawr bet nghal rawp rawp a,"Engmaw i sawi kha? Ani hi chu hmer tel ve suh ang che, mi thianghlim a nih hi. Kan zinga a tel ve vang hian kan nundan anga a nun ve kher a ṭul lo ang,"a ti vin hlawk hlawk a. Chunu chu lian zawk ni mah se, a tlawm ta,"Awle ka hria e, kha la rawh,"tih pahin Syringe chu a pe a, kei erawh min la rawn melh rum ngat ngat khawp mai.

Mahriati chu ka bulah a rawn ṭhu a,"Min hrethiam dawn nia aw. Tuna ka tih loh chuan ka buai dawn si a,"a ti a, a kawr ban chu a pawt hlim a,"Min lo vuan lawk mai,"a la ti zui a. A ban chu lehlam hawi pahin ka vuan a,"Khanu kha i hlau lo em ni?,"tiin ka zawt a. A nui hak a,"Kei aia lian pawh nise, ka hlau bik lo. Chuan, a tih dan che kha ka duh lo bawk a,"a lo ti nghal vat bawk a. Kan ti ti dun malh malh a, a chang leh Pathian thu te kan sawi a. A chang leh kan inhnial leh bap bap ṭhin, rei fê kan ti ti hnuah chuan Mahriati chuan min mutthilh san ta a. Kei erawh mutthilh tum sateh mah ila, mutthilh a har ngei mai. Leh lamah lah an la ri luih luih mai si, Mahriati chu a mutui tawh khawp mai.

Zing dar 1:30am velah chuan mut tumin ka intintuah ve ta a. Ka ṭawngṭai a, ka ṭawngṭai zawh chuan Mahriati bulah chuan ka mu ve ta nge nge a. Mahse, rei pawh ka mut hma in, room kawngkhar chu a rawn ri ṭhuai ṭhuai a. Ka phu nasa ngei mai, ka tho nghal vat a. Mahriati pawh a rawn inperh tho rang ngei mai,"Eng nge a?,"a rawn ti nghal tuarh a. Pawn lam aṭang chuan mipa âw hian,"Rawn chhuak u la ni mai,"a rawn ti vin nghal tuarh bawk a. Mahriati chuan ka hlau tih a hria a ni ngei ang, ka bulah a rawn ding vat a,"Engmah hlauh tur a awm lo a nia aw,"tih pahin ka banah chuan a rawn vuan vat a. Kawngkhar lam pan chuan min kal phei pui a,"Rawn chum tawh lo teh, ka rawn hawng dawn reng a lawm,"tih pah chuan room kalhna chu a hawng nghal rawk rawk a.

Room pawnah chuan patling 2 hi an lo ding reng tawh a. Mahriati chuan,"Eng nge ni ta?,"tiin dam deuh chuan a zawt ve mai a. Pakhat zawk chuan,"In rui em? In va bengchheng ṭhin em em ve maw le?,"a lo ti nghal chhur chhur a. Mahriati chuan,"Ka ṭhiannu hi chu a rui lo a nia,"a lo ti nghal vat a. Kan hmaa patling 2 ding te chuan min en ngun kher mai. Pakhat zawk chu a rawn ṭawng leh a,"Helai hmun hi bar a ni lo a nia, vawi tam kan warning tawh che u. Tun hi last warning a ni tawh ang, zing khua a var rualin he lai hmun aṭang hian chhuak nghal ang che u,"a ti leh chhur chhur a. Mahriati chuan tlawm a tum hauh lo mai,"Keini hi kan bengchheng ve em ni? Kan mutui lai min ṭhawng harh zawk a nih hi, ka rui tih chu ka hai lo. Mahse, kan bengchheng ve lo,"a ti ve nghal bawng bawng a.

"Eng pawh chu ti u la, naktuk zing khawvar rualin chhuak ang che u."

"Helaiah hian zan khat bak riah kan tum bik hleinem,"Mahriati chu ka rin aiin a kawlhrawng zêk mai.

"I va ṭawng peih reuh tak e aw, lut rawh u,"tih pah chuan min kalsan nghal a.

"An duh hun hunah min rawn hau ve leh ringawt zel. Heng ho hi ka ning a nia,"tih pah chuan room-ah min luhpui leh nghal a. Mutthilh leh chu ani pawh chuan tum sateh mah se, a thei bik tawh lo.

Zing dar 5:00am velah chuan kan tho a, Mahriati ṭhiannu te In chu kan chhuahsan nghal a. Ke in kan kal ngar ngar a, Vanapa Hall bula eitur an siamna hmunah chuan kan phei a. Ril a ṭam bawk a, kan ei ṭeuh mai. Kan duhtawk kan ei hnu chuan Mahriati chuan,"Amuana te In lamah chuan kan kal chhin dawn em ni?,"a rawn ti leh a. Ka hreh viau a; mahse, Amuana chanchin hriat nan hrim hrim pawh ṭha ka ti si a,"Nia, a pawi hleinem a chanchin hriat nan hrim hrim pawh a ṭha lawm,"ka lo ti ve mai a. Ke bawkin Amuana te veng lam pan chuan kan inzui phei leh hnak hnak a.

Amuana te In chu a hma aiin Security an lo bei khauh tawh a. Gate bulah chuan Security guard 2 an lo duty tawh a, kan hmel an hmuh chuan min lo dang nghal vat a. Mahriati ngaihdan a ni lo nasa mai si,"Ka ṭhianpa te In a nih hi, engvanga min dang khanglang nge in nih a?,"a ti leh nghal tûn tûn mai a. Guard 1 zawk chuan,"Kan pu thu ang a thil ti kan ni a, gate-ah hian in lut thei lo ang,"a lo ti nghal vat a. Mahriati chu a ter nghal at a,"Huh in pu maw? Rawn ko teh u, keiman ka lo hmachhawn ang,"a ti vin nghal tuarh tuarh mai. Ka lo hlauthawng leh hle tawh mai a, ka khur chhe lo chauh a ni,"Mahriat, kan kal mai dawn em ni?,"ka lo ti khur dar dar a. Mahriati chuan ka kutah a rawn kai vat a,"Tikhan thlamuang deuhin lo awm rawh, engmah hlauh tur a awm lo,"tiin min hnem tak na a, ka hlauhna a nep phah chuang lo.

Guard 1 chuan a walkie-talkie chuan tu emaw a be mawlh mawlh a. Rei lo te hnuah Amuana pa chu a rawn lang nghal vat a, min melh dan chu a lungawi vak lo tih hai rual a ni lo. Mahriati chu a en a, za vak lo leh ngeiawm zeta nuih pahin,"Nang bawk maw? Eng nge i duh a?,"a rawn ti chu, Mahriati chuan a hmaiah chil a chhak phur mai. Amuana pa chuan a beng hawi sawk mai a,"Hmeichhe kawlhrawng lutuk mai, ka In chhungah hian vawikhat pawh i rawn pen lut leh a nihchuan i lu ka la ang,"a ti bawrh bawrh mai a. Ka hlau lutuk chu ka khur chhia a ni nghal der mai,"Mahriat, kal mai ang,"ka ti nghal chûl tawh mai a. Mahriati chuan ka thusawi chu a bengkhawn tawh lem lo,"Khawnge Amuana?,"a ti leh nghal zat a. Amuana pa chuan,"Ka fapa chungchang hi i hriat ve kher a ṭul lo aw. Tunah hian helai hmun aṭang hian in kal lo a nihchuan Police ka ko ang,"a ti ram hmak mai bawk si. Mahriati lah a dinna ngaiah a ding ngar mai a,"Ka fapa a? Ani nen in inzawmna chu i chhu chat tawh a ni lawm ni? Khawiah pawh awm se, ka zawng hmu tho ang. Ani kha i tih duhdah mai mai atan ka phal lo,"Amuana pa chu a hlau bik hauh lo mai. Amuana pa chuan ben leh a tum a; mahse, Mahriati chuan Amuana pa kut chu a lo man ve chat a,"A tawk aw, kan kal ang. Mahse, Amuana kha lo tina tawh suh ang che. A nih loh chuan ka sawi duh loh thleng thlengin ka sawi a la ngai ang,"a ti hmak a, ngawi rengin Amuana te In chu kan kalsan leh rih a.

"Engtinnge Amuana pa kha i hlauh loh zawk a?,"tia ka zawhna chu engtinmah min chhang lo.

"A ngam chuan Amuana chu tina leh vaih teh se, a duh loh thleng rakin ka kalpui mai ang,"a ti bawrh bawrh a, a thinrim viau tih chu hai rual a ni lo. Engmah pawh ka zawt zui ngam tawh lo.

Chhun lamah chuan kan tei kual kan tei kual a, awm hahdamna hmun tur chu kan nei ve thei mai zel a. Mahse, zan lamah erawh khawiahnge kan riah ang tih ngawt a ni ka rilrua awm chu. Mahriati chuan In leh lo hawna tur a nei a, kei erawh hawna tur ka nei ve si lo. Mahriati chuan ka rilru hahna chu a hre tlang thei emaw tih mai tur a ni,"Te, eng pawh thleng se awmdun zel ang aw. Khawiahmah in kalsan lo ang aw,"a rawn ti chhuak hlawl a.

"Tehreng mai, tunah chuan ka neih chhun i ni a, ka phatsan lo ang che,"ka lo ti ve vat a.

"Chuan, zanin chu kan veng thlanmualah kan riak dawn nia aw,"a lo ti leh a.

"Mahse, duty an awm lo ang maw?,"ka lo ti vat a. A nui suk a,"Buaina kan siam loh chuan min man theihna dan an nei ngawt hleinem,"a lo ti sam et a.

Khua a lo tlai a, ni pawh a her liam dawn ta. Zan lo thleng tur chu a huphurhawm ngei mai, Mahriati nen chuan an veng thlanmual lam panin kan inzui thla det det a. Zan thim hnuaia thlanmuala riah chu a nuam viau lo a ni; mahse, riahna tur dang kan nei si lo. Thlan lung 1 nghengin kan ṭhu dun a,"Nang chuan Pathian hi a awm i ring tiraw?,"a rawn ti chhuak hlawl a.

"Aw ring e, i ring ve lo em ni?,"ka lo ti vat a.

"Aih, Pathian hi a awm ka ring ve lo. Ka tan hian Pathian hi a awm ve ngai lo,"ani pawh hi Amuana ang deuh a niin ka hria.

"Engvanginnge Pathian awm chu i rin loh a?,"tiin ka zawt let thung a.

"Kum 16 ka nih lai khan bialpa ka nei ve ṭan a. Khatih lai khan ruihhlo engmah ka la khawih lo, ka bialpa erawh zu ngawl vei a ni thung. Mahse, khatih hun lai khan Pathian hnenah dilin ka ṭawngṭai ṭhin a sin. Ka bialpa kha miṭha a nih theih nan ka dil hin. Mahse, tun thlengin a chhanna ka la dawng lo. Ruihhlo khawih ve duh ngai miah loh kha, ruihhlo bâwihah ka tang ve ta a nih hi. Khatih hun lai khan khati khawp khan Pathian ka âu nasa a; mahse, khatih hun lai aṭang tawh khan Pathian hi ka tan a awm ve ngai reng reng lo a ni tih ka chiang tawh."

"Pathian hian a hnena kan dil ṭhin te hi thawkleh khatah min pe nghal mai ngai lo a sin. Pathian hi a awm tih chu i hria tiraw?,"ka tih chuan min chhang lo. A ngawi reng a, van lam a en a,"A chang hi chuan engmah hre tawh lo tura thih daih te hi ka chak ṭhin,"a rawn ti zawi sap a.

"Kan nunna te hi kan thu a ni si lo a le. Kan nunna hi kan thu thu nise, kei tak hian a sin thih chak ni. Nang chuan chhungte pan tur i la nei tal a, kei hi min han en teh, khawvelah hian tumah chhungkua tia koh tur ka nei lo a sin."

"Ka chhungte hian min hmangaih lova, ka tan anni chu pan tlak an ni lo."

"Anni chuan an hmangaih che a, an hmangaihna che hi i haider zawk niin ka hria,"a rilru ti hnual tur zawngin engmah sawipui ka duh lova.

"Min hmangaih lo a lawm,"a ti bung nghut a.

Ka kuah a,"A chang chuan min hmangaihtu te hi kan hre lo hre lo palh ve fo ṭhin a nia. Mutthilh tum ila, a tlai tawh sia,"ka tihchuan a lu a bu nghut nghut a, in ngheng rialin kan ṭhu dun a. Thlanmual chu a rehin a reh tlawk tlawk mai, vana arsi erawh an engmawi hlawm kher mai. Mahriati pawh a hnar ri sûk sûk tawh a, kei erawh ka mut a la chhuak lo ngei mai.

Lei lungngaihna ka chhiar kim ta,

Thinlai hnemtu reng ka tawng si lo;

Lei lung mawina min hnêmtu pawh

Ka tan par ang an chuai zo ta.

Hrilh ka hai ngei ka han dawnin,

Lunglai a phang ka riang chuang e;

Riangvai hnêmtu Krista lo chu ka tan belh tur an awm si lo.

Dawn lungrukah kimte'n dawnin,

Tawnmang chang mai se ka hringnun hi;

Hai ang ṭhangin van lal run nuam ka lawi ngei ang.

Ka mut a chhuak thei si lo, mutthilh tumin ka bei ve ngial ṭhin. Mahse, ka harh kur reng mai si. Mahriati lah tui takin a mu a, a hnar sûk sûk mai a. Zan thim tham hnuaiah chuan ka harh kur mai, hawi kual vel mah ila a thim in a thim mup mai si. Khawvar hun ka nghakhlel khawp mai, zan lah a la rei dawn si a.

Zing lam dar 3:30am velah chuan Mahriati chu a rawn che hrut hrut a, a harh dawn emaw ka ti a. Mahse, a muhil chhunzawm leh nghal a. Kei erawh nghate rep ang kar ka la ni, thim hnuaiah chuan ka meng kual hrak hrak a. Ka hlau em em pawh a ni hran lo; mahse, thlanmuala riah hi chu a nuam hauh lo mai. Rilruah Amuana a rawn lang a, khawiahnge a awm ang? Hrehawm takin a awm ang nge? Nuamsa takin a awm ang? Ka ngaihtuah ang hian min ngaihtuah ve ang em le? Zawhna tam tak chhan sen loh chu keimah leh keimah ka inzawt nawn tlut tlut a. Amuan ka ngaihtuah rualin U Hriatpuia chu ka ngaihtuah lo thei bik si lo, hman zan khan min hmu chiang si a. Ka hriat loh lai hian ka chanchin hi a lo ngaihven viau ang em le? Ka number-ah khan min rawn biak a tum ve nasa viau ang em? Zantin min zawng turin a chhuak ṭhin ang em? Heng zawhna pawh hi chhanna awm lo zawhna mai a ni.

Zing khua a rawn var a, zing ni chhuak chu a mawi ngei mai. Mahse, kan tan erawh ni lungchhiat thlak rawn her chhuahpui tu mai a ni si. Mahriati chu ka en a, a la mutui sûk sûk khawp mai. Van lam ka hawi a,"Aw Lalpa, hetiang renga nung tur hi chuan min phal bik lo ang tiraw?,"ka ti zawi sap a. Ṭawngṭai ka tum viau a; mahse, tun ṭum chu ka ṭawngṭai thei hauh lo mai. Chham tur reng reng ka hre lo, a van hrehawm tak êm! Thil tam tak ka ngaihtuah a, Mahriati leh Amuana'n Pathian awm an ring lo pawh hi ka dem ta lo.

Zing dar 7:00am velah chuan Mahriati pawh a rawn harh ve ta. A mit a rawn nuai chawt chawt a,"I harhna a rei tawh em?,"a rawn ti nghal vat a.

"Ka harh ve deuh chiah,"ka lo ti mai a. Mahse, min en vang vang a ka thusawi chu a awih lo ngei mai,"I mit meng aṭang khan nizan i mu lo tih ka hre mai. I ṭha meuh maw?,"tiin min zawt nghal chûk chûk a.

"Ka ṭha a lawm, ka mutui lutuk tak tak,"ka ti leh hram a.

"Hummm, i tih tlat chuan ka awih mai ang. Chuan, ka ril a ṭam e, i ril a ṭam ve em?,"a ding a, a zi mar uan uan a.

"Umm ṭam ve tawh tho mai,"ka lo ti vat a.

"Nihchuan, chhuak chho ila thil eitur han zawng ila,"a lo ti leh nghal vat a, thlanmual aṭang chuan kan inzui chho leh hnûp hnûp a.

Kan inbual lohna a rei tawh bawk a, kan pawr fep tawh mai a. Kan sam te chu a khawngin a khawng vek tawh maiin ka hria. Thingpui dawr kan hmuh hmasak berah chuan ka lut nghal chawt a, ei tur kan order nghal vat a. Kan piah deuha ṭhu hmeichhe 2 chuan min en duh ang reng khawp mai. Mahriati chuan a tei thei leh ta lo,"Eng nge min en reng a? Kan hmuhnawm viau em ni a?,"a tih leh zek mai a. Anni pahnih pawh chuan an thil ei lai chu an chhunzawm ve leh mai a. Mahse, a khat tawka min rawn en hrek hrek erawh an tawpsan lem lo.