GYPSY - 7

CHAPTER -- 7

By:- Rs Thangluah✍🏼

Mahriati nen chuan kalna tur leh pan tur em em pawh kan hre bik lo. Kan 2 chuan Amuana chu kan ngaihtuah dun hle tih erawh kan in hriat sak tawn ve ve thung a. Mahriati chuan a Phone chuan tu emaw hi a be mawlh mawlh hnu chuan,"Treasury-ah phei ang,"a rawn ti nghal zat a. Engmah sawi lovin ka zui ve nghal mai a, Treasury kan thlen chuan U Hriatpuia ka hmu leh hlawl mai, ani hian min zawng reng a ni ngei ang,"Mahriat, sawlai Scooty var bula ding mipa saw hman zan a mi kha a nia. Min hmuh chuan min hruai haw ngei a tum dawn a nia aw,"ka ti nghal vat a. Mahriati pawh chuan U Hriatpuia lam chu a en phei vat a,"Nihchuan, khalaiah khan lo min lo nghak mai rawh aw. Ka rei lo ang,"a ti a, min kalsan nghal a.

Rei pawh rial lovin Mahriati chu a rawn let leh nghal a,"I ṭhianpa chuan min hmu a, min rawn pan nghal vat mai. I chanchin min zawt nual a; mahse, engmah ka hrilh lo a nia aw,"a lo ti nghal vat a. Bazar lam pana phei kan tum mek lai chuan, patling 3 hian min rawn pan a,"Nangni 2 kha ding teh u,"an rawn ti phei nghal ṭhawt a. Chu veleh Mahriati chuan ka kuta min kaih leh min tlanpui a rual nghal a, patling 3 te pawh chuan min rawn ûm zui nghal bawk a. Hmeichhia zawk na na na chu min ûmpha rang ngei mai. Vanapa Hall kawt kan thleng phei hman ṭawk tihah chuan min rawn nang ching nghal ta mai si. Vanapa Hall kawta awm ho leh Hawker awm ho te chuan min en ṭhup hlawm a, pa 1 chuan,"Nangni 2 hi kan enthlak mek in ni a, duh aiin in huangtau mah mahin ka hria,"tih pahin min rawn pan nghal a. Kei lah hlauthawng chi ka ni bawk si, ka khur leh der der tawh mai a. Mahriati lah chu a zam hauh si lo,"Buaina kan siam em? Engvanga min chhui zui leh min tam tum nge in nih?,"a ti let nghal tâwn tâwn mai a. Kan bul vela awm ho chuan an smart Phone an rawn lek chhuak nghal sup sup hlawm bawk a. Mahriati chuan chung ho chu a hlau eih lo,"Nangni ho kha helaiah hian movie kan chhuah em ni? Video a cover ho zawng khan, Social Media-ah min vawrh darh leh ngei ang a. A chhe thei ang berin min chhuah leh bawk ang a, ti rawh u in duh duh chu ti rawh u. Mahse, ani hi nangmahni vanga a mualpho a nih vaih chuan in chak lo khawp ang,"tih pahin ka kutah chuan min rawn vuan nghal a.

"Hmeichhe kawlhrawng tak chu i nih hi maw le, i zak thei lo hle mai,"tih pahin patling 1 chuan Mahriati hmaiah chuan a rawn beng sawk a. Chu em em zawng ka tuar thei tawh bik lo,"Ka pu, khawngaihin kut êm chu in thlak tawh lo hram ang u aw. Min man duh a nihchuan min mai rawh u,"tiin Mahriati hmaah chuan ka va ding nghal chat a. Ka hmaa patling ding reng chuan min melh rum khawp mai,"Tun ṭum chu kan ngaidam ang che u. Mahse, a leh pek a awm leh a nih erawh chuan kan ngaidam tawh lo ang che u,"a ti bung hmuk a, min kiansan rih a.

"Zawngkhawro ho chu le,"Mahriati chu a phun nang nang a.

"Khawngaihin inbengdai hram hram teh. Helai hmun aṭang hian kan kal vat a ngai nia,"ka lo ti nghal vat bawk a. Kan bul vela mipui pungkhawm pawh a hma aichuan an zia deuh tawh e. Mahse, mi 10 vel chuan hmuhnawm thlirin min la thlir ṭhap hlawm mai,"Nangni ho kha, tih tur in nei lo em ni? Haw darh vek rawh u,"Mahriati thinrim chuan in hrikthlakna tur a mamawh tih ka hai lo. Min en ṭhup tu te pawh chu an bo zo ve mai a; mahse, video-a cover tu te khan Social Media-ah engtin tak min theh darh hlawm ang maw?

Vanapa Hall kawt aṭang chuan Bazar lam panin kan inzui phei leh a. Pan tur kan hre lo takzet a ni, Mahriati chuan a bag chu a hâi rawk rawk a,"E hee, ka ATM Card a bo daih. Pawisa lak chhuah sa hi ₹500 chiah ka nei tawh a sin maw le. Khawiahnge a bo ang le?,"a chek nghal tlawk tlawk a.

"Pawisa chu ka la nei ve nual a sin. Mahse, kei pawn ka ngah tawh bik lo,"ka ti a, ka neih zawng zawng chu ka phawrh a, ₹700 vel ka lo la ak a. Mahriati chuan,"Ka ATM Card hi a bo ka hlauh vangin ka dahna pawh ka uluk a. A khat tawkin ka check reng ṭhin, Treasury kan thlen hma pawh khan a la awm a sin. Damdawi ka lakna pa kha a ni ngei ngei ang, ani khan ka ATM Card password a hre vek a sin. Hrep tak chuan, hmela chu(h) ka call leh nghal teh ang,"a ti a, a Phone a phawrh a, a call leh nghal a.

"Hmela chu le, call a chhang duh lo reng reng,"a thinrim vang chuan a meng sen rûm a, a hmai te chu a sen vek in ka hria.

"I password chu engtinnge a hriat theih a?"

"Kan ṭhian ho zingah chuan ani leh Amuana kha ka rin ber an ni ṭhin. Ka password hre tu awmchhun chu ani kha a ni. Pawisa la tura kan tirh ber ṭhin leh damdawi la tura kan tirh ber ṭhin a nih vangin ka password chu ka hrilh a."

"A van pawi leh zel ve aw."

"Eng pawh nise, hmun fal deuh hlekah min kalpui vat vat teh. Ka buai hma in."

"Awle tehreng mai,"Zodin kan thleng phei tih chuan Mahriati chu a hmanhmawh tawh kher mai,"Bridge-ah khian chho ila, ka ti lawk mai ang. A nih loh chuan ka buai mai ang,"a ṭawng te chu a khur dar dar tawhin ka hria. Bridge-ah chuan kan chho a, ka phênah chuan a ṭhu a mi awm loh lai tak a ni bawk a, a zia phian mai. Bridge-ah chuan rei tawk fang kan awm hnuah Bazar lamah chuan kan inzui phei leh hnak hnak a.

Bazar bungkawn kan kal phei lai chuan keimahni min tawk zawngin U Hriatpuia chu a rawn phei nulh nulh mai. Bihrukna hun a awm tawh lo, ka ding ta ngawt mai a. U Hriatpuia chuan min rawn pan ding nghal chawt bawk a,"Ka zawng nasa tawh lutuk che,"a rawn ti nghal chawt a. Chhan mai dan tur pawh ka hre lo, hnuai lam ka en a ka ngawi reng ringawt a. Amah bawk chuan,"Min zui haw dawn em?,"a ti leh a, engtinmah ka la chhang lo. A ãw ki ngai rengin a hmaa aia fiahin,"Min zui haw dawn em?,"a ti leh a. Ka lu ka thing a,"Min zui haw dawn lo maw?,"ka dar tawn tawnah chuan min vuan a,"Min zui haw dawn lo maw?,"a ti leh a.

"Ka ṭhian hi ka kalsan thei lo,"ka ti ta nge nge a. Mahriati chu a va en a,"In 2 in min zui haw thei ang tiraw?,"a ti leh a. Chu erawh chhanna ka nei thei lo, U Hriatpuia chuan Mahriati chu a pan a,"In 2 in kan Inah in rawn haw thei ang em?,"tiin a zawt ve nghal a. Mahriati chuan,"I chhungte'n rem an ti ang maw?,"tiin a lo zawt let thung a. U Hriatpuia chu a ngawi reng a, engtinmah a chhang lo. Ni e, a chhungte hian keini 2 an Ina min hruai luh hi an phalsak ka ring lo a ni.

"A pawi khawp mai, kan zui haw lo mai ang che min hrethiam dawn nia,"a ti chang fak a. Ngawi rengin U Hriatpuia chu kan kalsan ta a.

"Kohhrana in hmang leh chhungkaw fel tak nia kam hriat te pawh hian, an hmelhriat loh chu an Ina tap lut tur hian an duh ngai lem lo a nia,"tiin Mahriati chu a phun leh nuah nuah a. A thusawi chu ngawi rengin ka ngaithla a, ka sawipui zui duh lem lo,"Amuana chu khawiahnge a awm ang le?,"tiin thudangah ka pakai pui daih a.

"An Inah a awm ang, ani pawn a ngaihtuah ngawt ang che. A pa saw ka haw so bawrh bawrh,"a rawn ti nghal hlaih hlaih a.

"An Inah a awm tih chu engtinnge i hriat a?"

"A pa ṭawngkam aṭang khan ka hrethiam nghal mai a lawm,"a lo ti nghal vat a.

Nî chu khawthlangah a her liam a, thim chuan lalna a rawn chang leh ta. Mahriati nen chuan thlanmual bak pan tur dang kan nei leh ta lo. Ngawi rengin thlanmual lamah chuan kan inzui thla hnak hnak a, zanin chu thla bial zan a ni bawk a a êng nuam kher mai. Mahriati nen chuan thlan lung 1 nghengin kan ṭhu dun a,"Pathian hian kan ṭawngṭaina zawng zawng hi a chhang vek ngai lo em ni?,"tiin Mahriati chuan min rawn zawt hlawl mai a.

"Rilru leh tih takzeta kan ṭawngṭai a nihchuan min chhang ṭhin e,"ka lo ti nghal vat a.

"Nihchuan, ngatinge hmana ka bialpa tan ka dilna kha tun thleng hian chhanna ka la dawn loh?"

"Pathian chuan a hun takah kan tana ṭha turin kan dilna te chu min tih hlawhtlin sak ṭhin a lawm."

"Hei chu ka ring ve thei lo."

"Kan duh hun chauha min chhan kan duh vang hian kan na ṭhin. Mahse, kan duh hunah chauh min chhang ta se, amah kan hlat leh thung si ṭhin a. Chu chu Pathian hian a duh lo a ni, amah kan hnaih theih nan kan hmaah hian harsatna te min chhawp sak ṭhin zawk a sin. Mahse, chu harsatna chu amah vêkin min hnehsak leh ṭhin."

"Amah vêkin min hnehsak leh dawn tho chuan ngatinge harsatna chu min siam sak kher?"

"Amah kan hnaih a, a lam kan hawi theih nan kan hmaah hian fiahna a rawn tir ve ṭhin. Chu fiahna chu kan paltlang theih nan amah kan hnaih a ngai ṭhin a sin."

"Engmah ka hrethiam nek love. Ka hriatthiam awmchhun chu, Kohhrana in hmang leh fel in ti ho zingah hian keini misual ho hi kan leng ve lo tih hi a ni."

"Chutiang a ni ringawt lo a sin. Kohhran mite hi kan pawngpaw dem ngawt ṭhin hi a dik lo. Ni e, i sawi ang khan mi ṭhenkhat chuan Kohhran hi kawrah hmangin Biak In leh a chhehvelah chiah rawng an bawl ṭhin. Mahse, chung ho vang chuan Pathian hi rin loh phah nan hmang suh ang che."

"Mahse, anni hian vanram kawng min kawhhmuh si loh chuan kawng kan bo mai dawn a sin."

"Anni rinna hmang khan Vanram i lut dawn lo. Nangmah kha i pawimawh ber."

"Pathian hi a awm tak tak pawh ka ring lo."

"I thlirna aṭanga ka thlir chuan ka dem lo che. Mahse, Pathian hi chu a awm ngei a nia."

"Ka ṭawngṭai chhanna ka hmuh hma chu Pathian a awm tih hi ka ring ngai lovang."

"Pathian hi a fiah a fiah chi a ni lo a nia. Pathian fiah i tum chhung chuan i ṭawngṭaina khan chhanna a hmu ngai lo ang."

"Huiham, ka ning mutthilh ka duh ka muhil dawn, muttui,"a ti bul hmuk a, a ṭhut hmun a siam fel a. A reh hmak mai, ngawi rengin a bulah chuan ka ṭhu a, thla êng hnuaiah chuan kan hmaa thlan lung te chu an lang iar hlawm a. Thla êng chuan lung te pawh a ti leng lek lek mai, rilruah Amuana leh U Hriatpuia an lo lang a. U Hriatpuia chu ka ngaihtuah phak ni hauh lo mah se, rilru ah erawh a cham ve reng mai. Min ngaihtuah em em a, hetianga hrehawm taka ka awm hi a phal lo tih pawh ka hai lo. Tin, Amuana pawn min ngaihtuah dawn lutuk tih ka hai lo. Kei pawn ani chu ka ngaihtuah zet si a, Mahriati chu a muhil leh der tawh mai. Henu mutthilh awlsam lutuk hi chu a awhawm ve ngawt mai, kei erawh ka la meng kar mai si. Ka ngaihtuahna ka kawm melh melh a, hetia ka awm chhan hi Pathian in min hman ṭangkai a tum a nih ka ring tlat a.

He minung ramah hian Lalpa,

I chakna hmuh in ring suh ila chuan;

Ka chau tawh tur a ni a

Vengtu ten khawvar an thlir aia nasa in

Ka nunna hian nangmah leh i ram a thlir ṭhin.

Mahriati chu a rawn che hrut hrut a,"I zaithiam lutuk, ka muhil thei lova khawngaihin min zai sak thei ang em?,"a muhil daih tawh emaw ka tihkha, a lo muhil lo chu niin,"Immm eng hla nge i duh?,"ka lo ti nghal vat a.

"Eng hla pawh a ni mai."

"Awle."

Lalpa-ah chuan chawl la, amah chu,

Nghak fan fan rawh beidawng lovin;

Tichuanin, in thinlung duhzawng te chu

Lalpan a pe zel ang che.

I awmdan tur chu Lapa chungah nghat la,

Amah chu ring la a ti vek ang;

A thutiam ropui takah chuan in nghat zelin

I mamawh a pe zel ang che.

Lapa chu amah nghaktu te tan,

A ṭha a, a ti thlawn ngai lo;

Lalpa chhandamna ropui beisei a

Nghah veng veng chu a ṭha a ni.

Rei deuh mah se la, nghak hram hram rawh,

A lo thlen ngei dawn avangin;

Lalpa chu a tlai ve ngai lo a sin

A hun takah a lo thleng ṭhin.

Ka zai zawh meuh chuan Mahriati chu a muhil tui tawh ngei mai. Kei erawh ka la muhil thei chuang lo, Sana ka en a zan dar 11:30pm a lo ni duai tawh a. Ka mutthilh loh chuan ka chau ang tih ka hlau ve tho bawk si, ka ṭawngṭai a mutthilh tumin ka inbuatsaih ve ta a. Mahse, eng nge a chhan pawh ka hre lo, ka muhil thei leh tlat tawh lo. A van hrehawm ṭhin tak êm! Zan thla êng hnuaiah chuan Mahriati chu ka en a, ka lainat thar thut emaw ni ka mittui te chu a rawn parawl ringawt mai a. Rang deuhin ka hru a, Mahriati chu ka kuah a, ka rilrua hla awm reng chu in awihmut nan tiin zawi te te in ka sa leh a.

Lungngaihni leh lawm lai ni ah hian,

Lal Isua'n min ngaihsak ngai em?

Buaina te'n min chîm ka kawng a sei lua;

Ka lo chau ta phurrit tak nen.

Aw min ngaihsak fo tih ka hria,

Ka lungngaihin a ti nâ;

Ngui châng ni leh zankhua rei hlauhawm hnuaiah

Min ngaihsak tih ka hria.

Ka kawng a thim hlauhawmin min bawm,

Lal Isuan min ngaihsak ngai em?

Ni êng a lo chuai zan thim a lo hnai;

Min vengin a lo hnai ngai em?

Thlemna dovin ka bei a lo dawng,

Lal Isuan min ngaihsak ngai em?

Lungngaiin ka chau chhantu an awm lo;

Zan khaw tlai tluanin mittui nen.

Leiah Lungduh ber ka ṭhen laiin,

Lal Isuan min ngaihsak ngai em?

Tuar rual loh lungchhia thinlai min run hi;

A hria in a ngainep ang em?

Zing lam dar 5:00am velah chuan ka harh hlawl mai. Ka mit erawh a thip viau mai, Mahriati pawh a lu mutui khawp mai. Zawi te in ka tho a, ka zi mar vel a, nî chu a la rawn chhuak chiah lova. Mahse, chhuah tumin a in sang mar ve mek a ni tih erawh kâwl sen phût chuan min hriat tir a.

Kan awmdan tur chu ngaihtuah thiam a har khawp mai. Engkim chu a tlachawp vekin kan ti a ni ber mai, Mahriati bulah chuan ngawi rengin ka ding a. Mahriati chu ka en vawng vawng a,"Nang chuan keimah vangin kutthlak hial i tuar a. Kei ve hian i tan theih ka van nei tlem tak êm! Mahse, ka tih theih awmchhun leh ka tih reng tur 1 erawh chu i tana ṭawngṭai a ni,"tiin ka phun sep sep a. A muhil lai chu tih harh ka hlau si a, kan piah deuha thlan ah chuan ka phei a. Ṭhingṭhiin Mahriati leh Amuana tan ka ṭawngṭai ta a.

Ka ṭawngṭai zo ka phei chu Mahriati pawh a lo harh tawh a, min lo nuih var var a,"I van tho hma thei bik ve a? Nizan ka mumang chu a nuam lutuk, ka hrilh chak tawh lutuk che a,"a lo ti nghal chûl a.

"Min hrilh la, ka lo ngaithla ang chu,"ka lo ti ve nghal vat bawk a.

"Kan pahnih hian inkhawm turin kan lo kal a. Chuan, kan hnungah hian Amuana hian min rawn zui bawk a. Kan 3 chuan chuan kan inzui a, inkhawmnaah chuan nangmah hi i lo zai bawk a. Nizana min awihmut nana i sak kha i lo sa a, inkhawm banah kan Inah kan lut khawm a, thingpui te kan in ho a, a nawm zia kha aw. Mahse, mumang mai mai a ni bawk si, ka ui tak tak a ni,"a ui lutuk chu a ṭap lek lekin ka hria. Ka kuah a,"Ni e, mumang mai mai mah nise, engtikniah emaw chuan Amuana te nen kan 3 in hlim takin kan la inkhawm ngei ngei ang. Chumi tur chuan Pathian hnenah kan dil ṭhin dawn a lawm,"tiin ka thiam ang tawk chuan ka lo hnem ve bawk a.

"Pathian chuan kan ṭawngṭaina chu a chhang ṭhin tak tak em?,"a rawn ti leh a.

"Aw rilru leh tih takzeta kan ṭawngṭai a, kan dil a nih phawt chuan min chhang ngei ngei ang tih ka ring. Mahse, kan nghah peih ve deuh a ngai ṭhin a nia. Nang pawn i ṭawngṭai chhanna chu engtikniah emaw ila hmu ve ngei ngei ang. Beidawng lovin nghak fan fan la, chhanna chu a la rawn thleng em em ang."

"Nihchuan tunah hian ani tan khan ṭawngṭaiin min dilpui thei ang em? Kei pawh ka ṭawngṭai ve tho ang a,"a ti chiah chu ka hlim ngei mai.

"Tehreng mai, ṭawngṭai ila,"ka lo ti nghal vat a.

"Mahse, ka ṭawngṭai lohna hi a rei tawh a. Ṭawngṭai dan pawh ka thiam tawh lo maithei a nia aw,"a ti leh a.

"Pawi ti duh suh, thinlung a pawimawh zawk. Pathian chuan i thiamna ni lovin i thinglung kha a duh ber."

"Nihchuan, min nuih suh aw."

"Aih ka nuih lo ang che, immm ṭawngṭai ang aw."

"Awle."

Kan 2 chuan kan ṭawngṭai dun malh malh a. Kan ṭawngṭai zawh chuan Mahriati hmel chu a hma aiin hmuh a nuam sawtin ka hria,"Ka lawm e aw, nang hi awm lo la chuan ka chhe vek tawh ngei ang,"tiin lawmthu min hrilh nghal mawlh mawlh a.

"Ni love, keimah vang ni lovin Pathian vang zawk a lawm. E chuan, i hmangaih em em chu a chanchin i la ngaihven ṭhin em?,"tiin ka zawt ve thawr mai a.

"A chanchin ka hriat tawp ber kha chu, zu a in nasat lutuk vangin a chhungte'n Home-ah an dah tih kha a nia. A hnuah chuan engmah ka ngaihtuah zui tawh lo, a number ka nei tawh lova, biak pawh ka duh tawh hek lo. Mahse, ka thinlung chuan a la ngaihtuah reng tho."

"Engtikniah emaw chuan Pathian hnena i dilna te kha chhan in an la awm ngei ngei ang."

"Ni e tiraw? Chu chu beisei phawt ang. Chuan, amah chu hei hi a ni a, a hming chu Rinzuala a nia,"tiin a Phone-a mipa 1 thlalak chu min en tir a. A hmel en mai chuan zu ngawl vei hmel pawh a pu lo, tlangval fel leh hmelṭha tak a niin ka hria.