GYPSY - 8

CHAPTER--8

By:- Rs Thangluah✍🏼

Mahriati nen chuan ṭhian ṭha tak kan ni chho zel a. Ka theih tawpin Pathian thu te hrilhin a tan ka ṭawngṭai ve ṭhin. Tin, Amuana tan pawh ka dil bang ngai lo, zan khat chu kan vanneih a siamin ṭhian thar 1 kan chhar a. Ani chu a hmel en mai chuan hmeichhe fel tak a niin ka hria. Mahnia awm a ni a, zan lamah a inzuar ṭhin tih thlengin min hrilh tlang vek a. Zan tin thlanmuala riah reng aichuan a In luaha lut ve turin min sawm ta a. Mahriati nen pawh chuan zan tin thim hnuaia thlanmuala riah reng aichuan kan duh zawk ve ve a. Ani chu kan zui haw ve ta nge nge a, a In erawh a awmna a mawng ve hle mai. Mahse, rin aiin a lian a, a nuam phian leh nghal a.

Kan ṭhian chhar thar chu Lily a ni a, hmeichhe che fel tak a niin ka hria,"Ka eizawnna chu in hriat ang kha a ni mai a. Engmah ka ni bik lo tih chu in hriat kha; mahse, hrehawm taka in awm aichuan hetah hian hlim taka awm ho kan tum dawn nia. In luah man hi ₹3000 a ni a, bill engmah ka chawi ngai lova a zia lutuk. Engkimah kan theih ang anga in puih tawn zel kan tum dawn nia,"tiin fel fai takin a duh dan leh a ngaihdan chu a sawi a. Mahriati chuan,"Ni e, a ṭha lutuk a lawm. Naktuk aṭangin keini pawn eng emaw thawh tur kan zawng ṭan dawn nia,"a lo ti ve bawk a. Lily chuan a thuamhnaw te min pe a, kan inbual fai bawk a, kan hlim kher mai.

Mahriati chuan engkimah min ngaihtuahin min ngaihsak em em ṭhin. Lily chu zan dar 10:00pm ah a chhuak ṭhin a, zing dar 5:00am velah a rawn haw ṭhin. Chhun lamah erawh engmah ti lovin Inah a awm thung ṭhin, keini pawh chuan hnathawh tur chu kan zawng ve reng bawk a. Mahse, Social Media-ah khan kan lo lâr fe hman tawh a ni ngei ang le. Kan hmel min en a, tuman Aw min pawh duh hauh lo mai. A beidawn thlak ṭhin kher mai, engmah ti lova Lily bula awm reng pawh chu kan inthlahrung takzet tawh a ni.

"Te, Mahriati nen hian ruahmanna thar kan siam a. Kan 2 hian hnathawkin kan chhuak ṭhin ang a, nangman In lam lo enkawl la tiin kan lo ruahman ve tawp a. Eng nge i ngaihdan le?,"tiin Lily chuan zai dawh tak hian an ruahmanna te chu min hrilh a. Dik tak chuan Mahriati leh Lily hian min zah tih hi ka hai lo; mahse, hemi avang hian hrehawm ka ti leh ling zawk si. Mahriati chuan Lily hnung zuiin a inzuar ve dawn tih erawh min hrilh ngai lovin ka hre chiang em em bawk si. Rilru chu a nuam zan lo; mahse, hei bak tih theih kan nei si lo.

Mahriati leh Lily chu zan tin inzuar turin an chhuak dun ziah ṭhin a. Kei erawh In lamah ka lo awm thung ṭhin, ka hunawl neih apiangah ka ṭawngṭai ziah ṭhin a. Chhanna erawh engtikahnge a rawn thlen dawn tih ka hre si lo. A chang hi chuan ka beidawng ve lek lek ṭhin; mahse, kan rin Pathian hian min kalsan ngai lo a ni tih hi ka theihnghilh ngai lo.

Inrinni zan a ni a, Mahriati leh Lily chu chhuak turin an insiam malh malh a. Choka lamah chuan eng eng emaw tifelin ka awm a, anni 2 chu sitting room-ah chuan an ti ti dun malh malh a. Lily chuan,"Ka rilru a hah e, zanin chu nizana kan kalnaah khan kal hmasa phawt ang aw. Pawisa kha ka bag-ah ka ak tih kha ka hre chiang lutuk, miin min ruk sak a nih loh chuan tihbo na tur a awm lo,"tia ka hriat hlau taka a phun sep sep ri chu ngaihthlak loh tum mah ila, ka bengah chuan ring takin a ri lawi si. Mahriati chuan,"Matei hian a hria ang tih ka hlau ber,"a rawn ti ve bawk a. Lily chuan,"In luah man hi ni 5 ral hmaa pek ngei ngei a ngai bawk si. Vawiin ni 3 a ni tawh a, ka rilru a hah e a van hrehawm tak,"a ti leh a. An pawisa tihbo chu zawn hmuh ngei an duh vang a nih ka ring, zan dang aiin an chhuak hma a.

Zan dar 11:30pm a ri tawh a, mut châk na reng reng ka nei thei lo. In chhung dungah chuan ka tei kual sek a, vawiin hi ni 3 a ni a. In luah man hi ni 5 hma a pek ngei ngei a ngai si, Lily te hian an pawisa tihbo an hmuh loh chuan engtinnge kan awm ang? Lo hmu tehreng pawh nise, ei leh in man tur engtinnge ni ang? Chung zawng zawng ka ngaihtuah chuan ka rilru a buai ve map map khawp mai. Eng pawh nise, engkim ti thei tu Pathian kan nei a lawm tiin ka ṭawngṭai leh tawp mai a,"Aw Lalpa, tunah hian eng kawng nge ka zawh ber ang tih pawh ka hrethiam lo. Nang chuan ka nun engkim i hria a, kan tana ṭha tur angin rem min ruatsak ṭhin. Zaninah pawh hian kan tan rem min ruatsak ngeiin ka ring a ni. Engkim ti thei, khawvel chunga roreltu ka dilna te hi min ngaihthlak sak la, kan tih sual te a awm a nihchuan min ngaidam turin ka dil bawk a che. Heng zawng zawng hi i fapa Isua Krista hmingin ka rawn dil a che, Amen,"tiin ka ṭawngṭai ta tawp a. Mut tumin ka inbuatsaih nghal a, ka mut erawh a chhuak lo khawp mai. Khumah chuan ka let ka let a, rilruah chuan pawisa bo hlir chu a awm a. Engmah ngaihtuah mang lo chuan ka tho thurh a, ka inchei mawlh mawlh a, In aṭang chuan ka chhuak a Zodin lam ka pan ding nghal chawt a. Eng nge tih ka tum pawh ka hre lo, hetih lai hian ka rilruah engmah a awm lo ni berin ka hria. Ka rilru ngaihtuahna te chu an cháwl a, an chawmawlh zo in ka hria.

Zodin ka thlen chhoh hma chuan ka hnung aṭang chuan tu emaw hian min lo kuai her sawk a. Thim thamah chuan min pawt lut nghal a,"Helaiah hian eng nge i tih?,"chu âw chu ka hriat ṭhan em em Amuana âw a ni tih ka hai lo.

"Amuan, nangmah maw? Khawiahnge i awm char char a?,"ka in rin hman hma in Amuana chu ka kuah nghal vawng vawng a. Ani pawh chuan engmah sawi lovin min kuah ve vawng vawng a,"I lo ṭha em?,"ka zawhna pawh min chhang lo chuan zawhna dang min zawt daih a.

"Imm ka ṭha a lawm, nang zawk i ṭha em? Ka ngaihtuah thei lutuk che a sin,"kan inkuahna chu kan la inthlah phal lo. Heti khawp hian kan lo in ngâiin kan lo in thlahlel hman ang tih hi ka ring pha ngai lo.

"Kei pawn ka ngaihtuah thei lutuk che. Engtinnge i khawsak ang? Khawiahnge a riah ang? tih te, a tam mai. Kan inhmu leh chu ka lawm kher mai,"a ti ve mawlh mawlh bawk a.

Amuana nen chuan Zodin Bus stand-ah chuan kan ding dun a. Amuana hnenah chuan Mahriati nen kan intawn dan te, Lily kan tawn dan zawng zawng te chu ka hrilh vek a. Amuana pawh chuan,"Kan In aṭangin ka chhuak ru a, Mapuia te Inah khan ka kal hmasa ber a. Mapuia'n i kalna lam a hre zui si lova, ka zawng nasa lutuk che,"ka kutah chuan a rawn vuan a,"Khawiahmah ka kalsan tawh lo ang che. I kiangah ka awm reng tawh ang,"a tih zawm leh nghal a. Amuana nen kan intawng chu kan lawm dun kher mai, zanin ka chhuak hi Amuana nen a kan intawn nan tura Pathian remruat a ni ngei ngei ang.

Amuana nen chuan In lamah kan inzui haw ve thawr mai a. Amuana bulah chuan,"Dam takin kan inhmu leh a, a lawmawm em mai. Pathian hnenah lawmthu sawiin ṭawngṭai ang aw,"ka tih chuan a nui suk a,"I la ngai reng a nih hi, i duh leh ṭawngṭai rawh. Kei chu ka ṭawngṭai ve peih lo, i rin Pathian hi kei chuan ka ring ve love,"a ti leh hmak mai si. A van beidawn thlak ṭhin tak êm! In tih luihna chi a ni lo tih chu tu min hrilh hriat ngai lova hre sa ka ni,"A nih khawiahmah lo chhuak suh aw,"ka ti a, room lamah chuan Pathian hnena ṭawngṭai turin ka lut phei nghal a.

Ni e, Amuan thlir dan aṭanga ka thlir chuan Pathian awm a ring lo pawh hi ka dem hran lo. Mahse, a tan ṭawngṭai erawh ka bansan phah chuang lo. Ka ṭawngṭaina chu engtikniah emaw chuan chhan in a la awm ngei ang tih hi ka ring in ka beisei tlat a ni.

Ka ṭawngṭai zawh chuan sitting room lamah chuan ka phei leh a, Amuana chu ngawi rengin a ṭhutna ngaiah a lo ṭhu la ṭhu reng a. Ka hmel a hmuh chuan a lo nui suk a,"Mahriati chu ka hmu chak tawh hle mai,"a lo ti vat a.

"Nia, ani pawn a sawi reng ṭhin che a lawm. Zing dar 5:00am velah an lo haw chauh ang, engtik aṭangin maw In aṭangin i rawn chhuah a?,"a thuamhnaw vel a balh hrep hrup danah chuan a chhuahna a rei tawh a ni ngei ang.

"Diktak chuan In aṭangin ka rawn kal lo. Home aṭangin ka rawn tlan chhuak a nih hi, Mapuia te Ina kan kal zan khan ka nu mi tirh ten min rawn man a. A tuk aṭang khan Home-ah min dah lut nghal a lawm, ni 2 vel chu ka vakvai tawh,"a chawl det a,"Saw Inah sawn ka dam chhungin ka let tawh lo ang,"a ti leh a. A bulah chuan ka ṭhu hnai a,"Tunah chuan ka bulah i awm leh tawh a lawm. Pathian kan lamah a ṭan chhung chuan hrehawm in kan awm reng bik lo ang,"tiin ka thiam ang tawk chuan ka hnem ve a. Mahse, Pathian hming ka lam rik apiangin a thinrim hmel ka hmu ziah ṭhin,"A ninawm khawp mai, Pathian Pathian ti reng mai. Ka ning, ka hnê,"a rilru a nâ tih chu hai rual a ni lo. A indawm kun tlawk tlawk a,"Hetianga nun hrehawm taka kan awm chung pawh hian engtinnge Pathian hming hi i la lam rik reng theih zawk le? Mi mak tak chu i nih hi,"a ti thlawt a.

"Hun harsa kan tawh lai hian amah chu kan hnaih zual ṭhin tur a sin. Ngatinge vuina tur hlir i zawn mai le, Pathian chuan kan ṭhatna tur vekin kan chungah ro a rel ṭhin a sin. Tunah hrehawm takin kan nun hmang mah ila, amah kan rin a, a lam kan hawi tlat chuan nakinah Vanramah hlim takin kan la lut ve ngei ang tih hi kei chuan ka ring nghet tlat a sin,"a hmel chu ka en reng a. Thinrimna leh rilru natna hlir ka hmu in ka hria,"Vanram pawh hi a awm tak tak pawh ka ring lo e a,"a ti bung nghut a.

"Nih leh hremhmun hi a awm i ring em?,"ti a ka zawhna chuan chhanna a dawng lo. Hnuai lam a bih ngar ngar a, engtinmah min chhang lo,"Hremhmun leh Vanram hi a awm a sin,"ka ti zawi sap a. Amuana chuan engmah a sawi tawh lo, a in hiat sut sut reng a,"Iih intifai la, i mu dawn nia aw. Tui ka lo lum ang aw,"tih pahin thawh mai ka tum a. Ka banah chuan min lo pawt a,"A ngai lo, tikhan lo awm rawh,"a rawn ti zawi sup a. Engmah sawi tawh lovin bath room lamah chuan a phei tlang nghal a. A in tihfai chhung chuan Pathian hnenah ka ṭawngṭai a, kan hun hman dan leh kan hman leh zel tur te leh kan hman mek te chu Pathian kutah ka hlan a. Tin, Amuana, Mahriati leh Lily te pawn nunthar an lo neih theih nan an tan ka dil sak bawk a.

Zing lam dar 5:00am pelh hretah chuan Mahriati leh Lily pawh chu an lo haw ve a. Mahriati'n Amuana a hmu chu a hlim kher mai; mahse, Lily lakah inthlahrun a na duh ngei mai. Lily hnenah chuan engkim kan hrilhfiah a, kan ṭhianpa a nih thu te kan hrilh tlang vek bawk a. Ani pawh chuan a hrethiam khawp mai; mahse, In nei tu te hnenah engtinnge kan sawi tak ang? In neitu te hian unau kan nih loh chuan mihrang daih mipa chu kan chenpui an phal lo bur mai si. Lily chuan,"A pawi lo, ka cousin tiin ka sawi mai ang,"a ti a. Mahse, dawt sawi chu keiin ṭha ka ti si lo.

"Dawt sawi chu a ṭha dawn em ni? Nakina an hriat leh tur tho tho a nia,"ka lo ti vat a. Amuana leh Mahriati chuan engmah an sawi lo. Lily chu a ngawi vang vang a, ani pawh chuan dawt sawi chu ṭha a ti vak lo tih chu ka hai bik lo.

"Imm eng pawh nise, khua te han var phawt se kan sawi ṭha leh dawn nia. Tunah chuan ka chau rih em mai, ṭhianpa, nang pawh inthlahrung lovin awm bawrh bawrh rawh aw,"tiin mu turin a insiam nghal a. Mahriati erawh kan kiangah a la ṭhu rih a,"Mawla, Home-ah te chuan awm rih ve mai ta che. Rawn tlan chhuah kher pawh a ṭul lo,"a ti nghal hlak hlak a. Amuana chuan,"A ninawm ve a lawm, in kan niah tuman min kan ve ngai si lo. Ka nu tal chuan min rawn kan ka ringin ka lo beisei ve ṭhin a; mahse, tumah an rawn kal ngai lo. Bakah Home-a ka awm hian ka ṭhat phah lo,"a lo ti bak hluk a. Mahriati chuan,"I tum lo a niang chu, kei pawh ni 4 chu ka dry ve tawh. Mahse, ka buai ngai hran lo,"a tih chuan Amuana chu za vak lo hian a nui a,"Ni 4 lek a nih chu, kei chu dry ka tum buai peih tawh lo,"a lo ti ham ham a. Mahriati chuan,"Huiham ka mut san dawn che, muttui u aw. Te, nang pawh mu rawh i chau lutuk ang,"a ti a, room-ah chuan min luhsan nghal a.

"I dry tawh lo maw?,"mak tih hmel zet chuan ka en a. Amuana chuan a dar a chhîn ûk a,"Eng nge?,"a ti duh chauh mai si.

"Mahriati hian tih tak zetin damdawi a tih hi nghei a tum ve mek a sin. Khawngaihin a rilru ti hnual thei tur zawng chuan ṭawng tawh lo hram ang che aw,"ka ti a, mu turin room lamah ka pheisan ve nghal a. A ṭhat duhin ngaihsak viau ṭhin mah ila, eng emaw chang hi chuan ngaihsak loh luih a ngaih châng te pawh hi a awm ve ṭhin.

Lily leh Mahriati chuan min û en tlat tawh vangin In neitu te pawh chu keiman ka biak a ngai ta a. Zingah tuk ṭhuan ei hma in In neitu te In lam pan chuan ka chho ta a. Kal pah chuan ka rilru in ka ṭawngṭai chho mawlh mawlh a, dik tak chuan ka hlauthawng ve takzet a ni. Min hnawt chhuak mai ang tih te pawh chu ka hlau rum rum mai, In luahman pe tura kal ka ni si lo. In luah man pawh zaninah Mahriati leh Lily te an chhuah leh phawt loh chuan kan nei daih dawn si lo. Chung te chu sawi vek a ngai bawk si, kan pawisa kawlsa lah chu buhfai lei nan kan hmang ve bawk si. Lily chungah pawh ka inthlahrung takzet tawh a ni.

In neitu te In chu ka thleng ta, thinphu dep dep chungin an bell push chu ka hmet a. Rei vak lo hnuah an rawn hawng a, chhungkaw nu ber chuan,"Lo lut rawh,"tiin hmel hlim pu vak lo chung chuan min lo chhawn a. Ka zui lut ve mai a, an sitting room lamah chuan kan inzui phei zel a,"Lo ṭhu rawh,"a ṭawngkam chu nidanga a ṭawng dan nen a in ang miah lo. Tun ṭum chu kan lakah thinrimna a nei a ni ngei ang le,"Eng nge i duh?,"a ti leh hmuk a. Sawi ṭan mai dan tur pawh ka hre lo, a van hrehawm tak êm! In pet ruh fan fan chung chuan,"Aah eng lo a nia, kan In luah laiah hian kan ṭhianpa pakhat....,"sawi pawh ka sawi zo hman lo,"Aw ka hria, a hmaa kan sawi kha in hre lo em ni?,"a ti nghal buan buan mai a. Thudang sawi leh chu a ngam awm ta lo hle mai,"In luah man pawh min la rawn pe lova. Engtikah nge min rawn pek in tum a?,"a tih zawm leh zat a.

"In luah man chu naktukah kan lo pe ang che u. Tunah chuan kan la nei daih rih lova, khawngaihin min lo hrethiam hram ru aw,"a van hrehawm tak êm!

"In luah man chu kan hrethiam hram ang che u. Mahse, in ṭhianpa erawh a awm ve ka rem ti lo bur a nia,"a ti leh hmarh hmarh a. Engmah sawi zui ngamna chi pawh a ni tawh lo, engmah dang sawi tawh lovin ka haw nghal nal nal a.

In lama haw pawh chu ka van châk tawh lo tak êm! Rilru siam dan tur pawh ka hre tawh lo, Amuana chu amah chauha chhuah tir ngawt chu ṭha in ka hre bawk si lo. Mahse, kan kiangah a awm ve a rem bawk si lo, rilru a van  buai chuar tak êm! Phur lo tak chungin In chhungah chuan ka lut a. Anni ho pawh chuan hrehawm an ti ve tih chu ka hai si lo, a van hrehawm tak êm! Lily chuan,"Eng nge chanchin?,"tiin inthlahrung tak chung chuan min lo zawt a.

"Engkim a buaithlak vek tawh. Mahse, In luah man  chu naktuk chiah min la nghak thei, buaithlak ber chu Amuana hi a ni. Hetah a awm ve min phalsak lo,"tiin tlang takin ka sawi pawp mai a. Amuana chu en pawh ka en ngam lo, tupawh mai chu kan ngawi ṭhap hlawm a. A tawpah Amuana chu a rawn ṭawng chhuak ta nge nge a,"Keichu mipa ka ni a lawm, khawiah pawh awm ila ka in chingfel thei em em ang. Hrehawm ti duh reng reng suh u,"tiin a thiam ang tawk chuan min ṭawng thlamuan ve bawk a. Mahriati chuan,"Mahse, kan ṭhian i ni a. Kan thlah thlam ringawt thei hleinem che,"a lo ti ve vat bawk a. Amuana chuan,"Min thlah thlam tihna a ni hleinem. Hrehawm ti suh u,"a ti leh a. Ka tho lawk a, Amuana chu ka kai a,"In be lawk ang,"tih leh room-a pawh luh ka rual a. Mahriati leh Lily pawh chuan mak ti takin min en zui nghal vung vung nghe nghe a.

"Enteh Amuan, nangmah chauh chuan khawiah mah i kal ka remti tawh lo ang. I chhuak dawn a nihchuan ka zui ve ang che,"tiin Amuana hmaah chuan ka ding a. Amuan chuan ka dar tawn tawnah chuan min chelh a,"I â em ni? Tun hi ât chhuah hun a nih loh hi,"a ti mawlh mawlh a. Mahse, Amuana thusawi chu ka ngaithla duh lo,"I bulah ka awm reng ang, eng pawh tawk dawn ila, i bulah ka awm reng ang,"ka ti ve tlat a. Ani pawh chuan tih vak ngaihna a hre tawh lo a ni ngei ang,"A ṭha lawm, ka kiangah ka rualin i vakvai leh duh a nihchuan i thu thu le,"tiin min hnial duh ta bik lova.

Amuana nen kan ruahmanna chu Lily leh Mahriati chu ṭha an ti lo kher mai,"In neitu te chu ṭha deuhin dil leh ila, an phal em em ang,"tiin Lily chuan min rawn melh a. Ka chhan leh hma chuan tu emaw hian kawngkhar hi a rawn kik dawt dawt a, ka va hawng nghal vat a. Pawnah chuan patling 5 leh nutling 2 hi an lo ding ṭhap tawh hlawm a. Tu te nge an nih erawh ka hre lo, ka rin dan chuan veng chhung N.G.O hruaitu te an nih ka ring deuh chawt a,"Aw lo lut rawh u, eng nge in duh?,"tiin ṭha deuhin ka lo chiau âu nghal vat a. An zinga pakhat chuan,"Eng lo a nia, nangni ho hi zan lamah in inzuar ṭhin tih hriat a ni a. In In hi kan rawn check lawk dawn a,"a ti a, min kal pel a sitting room lamah chuan a lut tlang nghal a. Lily chuan,"Eng thil nge in duh a?,"a lo ti ve nghal vat a. Pa pakhat chuan Lily chu a kek bu lawp a,"Lo ṭawng hlek suh, In chhung zawng zawng hi kan dap kual vek dawn,"a ti nghal khur khur a. Mahriati chu a lo ter leh nghal at tawh a,"Eng dan in nge he In hi in rawn dap a? Tu hnen aṭanginnge phalna in lak a?,"a rawn ti leh piap piap mai a. Ka lo khap nghal vat a,"Mahriat, a tawk rih in bengdai rih rawh,"tiin a bulah chuan ka lo ding vat a. Nu 1 chuan Mahriati chu a rawn pan a,"I va han rapthlak ve le, lo ngawi hle hle rawh,"tih pah chuan Mahriati chu a rawn beng hawi sawk mai a. Mahriati hmaah chuan ka ding vat a,"Ka pi, ka pi, khawngaihin zah ngai hram teh u. Khawngaihin,"tiin ka ngen nghal mawlh mawlh a.