GYPSY - 9

CHAPTER--9

By:- Rs Thangluah✍🏼

Kan vai chuan Y.M.A Office-ah min hruai chho a. Min din tlar tir ṭhap mai a, kan hming min zawt vek a. Amuan pawh chu a bang bik lo, ani phei chu an veng thlengin an zawt vek a. An hotupa ve deuh a ni ngei ang, palian deuh chuan min rawn pan hnai a,"Kan veng chhungah hian nangni ang mi bawlhhlawh hi awm kan phal lo a sin. In thil tih leh in awmdan tenawm zia hi in hria em?,"a ti nghal bawrh bawrh a. Amuan chu ka hmaah dingin ka thlavang a rawn hauh vat a,"Ka pu, ani chu mi thianghlim a nih hi. Khawngaihin engtinmah ti suh u,"tiin ka ban ah chuan min rawn vuan vat a. Chu veleh Lily leh Mahriati te pawh chu ka thlavang hauhin an rawn ding hnai ve nghal a. Mahriati chuan,"Ani hian engmah tihsual a nei lo. Khawngaihin hmer tel ve suh u, ani chuan kawng dik kan zawh theih nan min pui zawk ṭhin,"a rawn ti ve mawlh mawlh bawk a. Min man tu te chu an ngawi ṭhiap hlawm mai a, Mahriati chu ka kut leh lamah a rawn vuan a, a kut leh lamin Lily a kai tel bawk a,"Matei hi kan tan chuan vantirhkoh a ni. Ani hi in tinâ emaw in kut hmawr pawha in khawih a nih vaih chuan eng pawh huamin ka hmachhawn ang che u,"a ti rap rap mai bawk si. An leader ber ni a ka rin chuan a âw a rawn thian kharh kharh a,"In him theihna tur a nihchuan dawt sawi hi in hreh lo tih kan hai hleinem. Mi â nileng kan nih loh hi, min bum theih in inring reng reng em ni?,"tih leh Mahriati sama keh chu a rual nghal a. Mahriati lah hmeichhe kawlhrawng tak a lo ni ve bawk nen, kutthlawn tawrh chu a tum lo kher mai. A sama kek tu pa hmaiah chuan a beng ve sawk mai a, kan phek buai ta luai luai mai. Amuana chu keini hmeichhe ho hmaah chuan a ding a, keini a hnungah kan ding ve thung a. Engtiklaiin Chemte hi a phawrh ka hre lo, a Chemte ken chu a vilik fua fua mai a,"A ngam chuan min rawn pan rawh u. A rawn che hmasa ber kha ka lo vit nghal ang che u,"tiin min man tu te chu a vau let nasa mai a. Min man tu te pawh tumah chet la ngam an awm meuh lo, Mahriati chuan Lily nen min kai a, hun remchang a awm veleh a tlanchhuak nghal thei turin kan in ring rân hlawm tawh a. Min mantu te zinga 1 chuan,"Khawngaihin in bengdai hram hram rawh u le. Ṭha deuhin kan sawifel dawn a nia, khawngaihin in thlahdul rawh le, tlangval,"tiin dam thluam hian Amuana chu inbengdai turin a rawn ngen a. Mahse, Amuana chuan in bengdaih chu a tum tawh lo bur mai bawk si,"A teuh lo, ka hmuh laiin ka ṭhiannu kut in thlak a. Ka inbengdaih chu beisei duh suh u,"a lo ti hmak hmak thung a. Rei fê inbengdai tura an in thlem hnu chuan Amuana pawh tlem chuan a inthlah dul ve deuh ta; mahse, tlanchhiat kan tumna rilru erawh kan la sut hran lo. Hun remchang a awm veleha tlanchhiat chu kan la tum ngar ngar tho a ni.

"Tlan rawh u,"tih pahin Amuana chuan a hmaa dawhkan chu a namthlu ṭhuai a. Keini pawh bak lêngin kan tlan nghal puat puat a, kan tha neih zawng zawngin kan tlan a. Khawilamah nge kan tlan pawh ka hre lo, thui fê kan tlan hnu chuan min rawn nang ching ta si. Car 1 ah min nam lut rawk rawk a, kan vai chuan kut tuar lo kan awm lo. Kan ri chawrh chawrh hlawm a ni ber mai,"Tlanchhiat te in tum vel khang lang a, zah pawh in va zak lo ve,"tih pah chuan min beng ri chawk chawk hlawm a. Mahriati lah chuan tu kutthlawn mah tawrh a tum lo, a theih ang angin a lo bei let ve zel bawk a. Mahse, kan kut min hnung khirh vek takah chuan tumah che thei kan awm tawh lo.

Kut hnung khirh chung chuan chhuat charah chuan kan ṭhingṭhi ṭhap hlawm a. Hmeichhe ho chu kan sam min meh kawlh sak vek hlawm a, ka rilru nat zia chu sawi hian a fiah zo lo ang. Ka biangah chuan ka mittui a rawn luang zawih zawih a, ka rilru in ka ṭawngṭai mawlh mawlh a,"Aw Lalpa, heng kan chunga thil thleng te hi nangmah kan hmuhfiah zel theih nan che hmanrua ni se, chhel taka kan tawrh theih nan min pui zel ang che aw,"tiin ka ṭawngṭai mawlh mawlh a.

Hmeichhe 3 te chu kan lu ah sam zai pakhat pawh hmuh tur a awm tawh lo. Hawi pawh ka hawi chhuak ngam tawh lo, Lily leh Mahriati te chu an ṭap a ni tih hriat takin an in sût ri hraih hraih bawk a. Amuana erawh hnuai lam bih ngar chungin kan sirah chuan a lo la ṭhingṭhi ve char char bawk a. An hotupa chu kan hmaah chuan a vei kual thauh thauh mai a,"Tun hi last warning a ni tawh ang. In inzuar leh tih kan hriat vaih chuan kan veng chhung aṭang hian hnawhchhuah in ni ang. Haw u la, ṭha takin in nun hmang ang che u,"tiin min haw tir mai an tum a. Mahse, Amuana chuan,"Ka pu, khawngaihin sawi duh ka nei a min ngaithla lawk thei ang em?,"tiin in phah hnuai tak chung chuan a rawn ti a.

"Hummm, awle sawi ta che kan lo ngaithla ang e,"a lo ti ve vat bawk a.

"Kan ṭhiannu Lalramnunthari hi engvanga tawrh tir ve kher nge in nih? Ani hiang engmah tihsual a nei lo a sin, ani chuan nunkawng dik kan zawh theih nan min pui a, kan tan Pathian hnen ṭawngṭaiin min dil sak ṭhin a sin. Ani hi chu kan tan mi thianghlim a ni a sin."

"Nangni ang ngawlvei ho zingah hian khawia mi thianghlim mah va awm suh. Haw u la, in zawrh leh ruih hi sim ang che u. Kan enthla reng dawn che u a, kan duh loh anga in khawsak vaih chuan in chak lo ang. Haw rawh u,"tiin min haw tir ta a. Min man hun hi chhun ên lai a ni a, a zahthlak duh khawp mai. Kan In luah awmna leh Y.M.A Office awmna chu in kar hlat tak a ni si a, ke a kan chhoh chuan mi tam takin min hmu ngei dawn tih kan hai lo. Chu chu hre rengin thui kan kal hma in Amuana chuan Taxi 1 a lo phat vat a, mi tam zawkin min hmuh hma in kan In luah chu kan thleng chho thei ta. Mahse, kan In luah kan thleng chho chu khawvel hi a tawp ni mai hian ka hria. Kan In luah lai kawtah chuan In nei tu nu leh an chhungkhat laina hnai te chu an lo awm ṭhap tawh a. Min hmuh chuan tenna mit mengin min melh ni mai hian ka hria. Kan In luah neitu nu chuan,"Hmeichhe nikhua lo ho, naktukah In luah man min rawn pe u la, chhuak nghal ang che u,"a lo ti nghal buan buan mai a. A va beidawn thlak ṭhin teh lul êm! Lily leh Mahriati chuan min rawn melh a, eng emaw sawi turin min duh tih ka hrethiam nghal a,"Ka pi, khawngaihin min hrethiam hram la. Khawngaihin thla 1 chhung tal hun min pe hram la, chumi chhung chuan In luah tur dang te pawh kan zawng ve ang a. Tunah chuan kan tan kawng a thim em mai, khawngaihin min hrethiam hram la,"tiin a ngen tak meuh meuhin ka ngen a. Mahse, chu ka ngenna chuan ngaihthlak a hlawh lo kher mai.

"Ka sawi ang chuan awm u la a ni mai. A nih loh chuan Police-ah ka pe ang che u,"tiin min vau let zek bawk si. Khua a va han var lo tak êm! A duhtawka min ânkhum hnuah an chenna In lamah min chhoh san ta hlawm a.

In chhungah chuan kan lut ve ngei; mahse, a nawmna a awm tawh lo. Tu pawh mai chuan hrehawm kan tiin kan rilru a na a ni. Kan ngawi tlawk tlawk hlawm a, inhnêm tur chuang pawh kan awm lo a ni ber mai. Chutia rei fê kan ngawih tlawk tlawk hnu chuan,"Eng pawh nise, Pathian hnen in hlan in i ṭawngṭai phawt ang u. Ani chuan min kalsan ve ngai dawn si lova,"tiin rawtna ka siam tawp mai a. Amuana chuan,"Tun ang hunah pawh Pathian hi i la beisei a maw? Kan hun tawn hrehawm zia hi i hmu em? Ani chu i phatsan ngai lo a ni thei; mahse, ani hian i chungah a thlen tir hi en ta che. I tihsual pawh ni miah lovah i tawrh tak hi, ṭawngṭai ṭawngṭai a ngai lo,"a lo ti nghal hmawk hmawk a.

"Amuan, khawngaihin i mit lo chhing ve ang che aw,"tih bak ka sawi lo. Amuana chuan engtinmah min chhang tawh lo; mahse, ka lakah chuan a lungawi lo tih chu hai rual a ni lo. Mahriati leh Lily pawh chu ngawi rengin an mit a chhing ve nghal bawk a.  Chhuatah chuan ka ṭhingṭhi a, chung lamah ban ka phar a,"Aw Lalpa, nangin engkim i hria a. Kan chunga thil thleng pawh i hria e, kan hun hman dan tur zawng zawng hi i kutah kan hlan a. Heng kan harsatna tawh te hi nangmah kan hnaih zual zelna theihna tur che atan hmanrua lo ni se. Nangin kan hma min hruai la, ṭha i tih ang zelin kan chungah ro min rel sak ang turin kan rawn dil che a. Kan chungah eng pawh thleng se, lungawi taka tawrh dan kan thiam theih nan min pui turin kan rawn dil bawk a che. Kan tihsual leh kan sawisual a lo awm palh a nihchuan, min ngaidam la, chung zawng zawng chu i fapa Isua Krista hmingin kan rawn dilin kan rawn ngen e, Amen!,"tiin ka thiam ang tawkin Pathian hnenah chuan ka ṭawngṭai ta a. Ka ṭawngṭai zawh chuan ka thaw ipik lutuk te chu a veng huaiin ka hria. Lily chuan min rawn en a,"Tun anga dinhmun ah pawh engtinnge Pathian i la auh theih le?,"a rawn ti ve hlawl mai a.

"Pathian chu mangan laia kan kulhbing sang a ni a lawm. Ani chuan kan ṭawngṭaina te chu min ngaihthlak sak ṭhin a lawm,"tiin ka lo chhang vat a. Amuana chu za vak lo hian a lo nui leh hak a,"I mak ve ngawt mai, Pathian tia i chhal ve i Pathian chu i theih tawpin i fak a. He khawvela i awm chhung hian a duh loh zawnga awm i hlau em em a. Mahse, ani erawh chuan a tawrh tir reng si che a nih hi,"a rawn ti leh a.

"Ka biak Pathian hian ka tawrh a phal a nihchuan, kei chuan vuina tur ka nei lo. Tunah hrehawm mah ila, nakinah chuan ka hlim dawn si a."

"Huh, keini ve hi engtinnge ni ta ang? Nangmah anga fel kan ni ve si lova,"Amuana chu a nui leh suk a.

"Nangni aia ka fel bik na ka hre lova. Kei aia in sual bik na ka hre hek lo, Pathian chuan kei min hmangaih ang chiahin nangni pawh a hmangaih vek che u."

"Kei pawh Matei nen kan intawn hma kha chuan Pathian hi a awm ka ring ngai bik lo. Mahse, Matei nen kan intawn tak aṭang hi chuan Pathian hi a lo awm ngei a nih tih ka chiang tawh,"Mahriati chuan a lo ti ve bawk a. Amuana chuan Mahriati chu a rawn nuih a,"Nang lah hi rilru mumal hi pu ve deuh teh,"a rawn ti leh hram pek a. Mahriati chuan,"Ni e, i thlirna aṭang chuan ka hriatthiam pui lutuk che. Mahse, tun thlenga ka nunna pawhseia a la awm chhan hi Pathian min khawngaihna vang a ni ka ti lo thei lo,"a lo ti ve thung a.

"A ninawm a(h), Pathian Pathian ti reng hlawm mai. In duh leh nangni chu ṭawngṭai ṭhin u la, kei chu min hmer tel ve tawh su aw,"Amuana ṭawngkam chuan ka rilru a tina kher mai. Pathian hnenah Pathian a hmuh theih nan ka dil sak mawlh mawlh ṭhin. Pathian a hmuh hma in Pathian hian a nunna hi a laksak mai ang tih hi ka thil hlauh ber a ni ṭhin.

"Eng pawh nise, in hnial tawh lo teh ang u. Engtinnge kan khawsak dawn? tih lam hi ngaihtuah zawk teh ang u,"tiin Lily chuan ti ti dang a rawn vawrh a. Ni e, kan khawsak dan chu sawi ho hmasak ber tur chu a ni. Huiham ngaihtuah na hi a tawi tup maiin ka hria, kan pawisa neih chhun ang ang chu In luah man ah kan pek a ngai si. Kan hmabak chu a thim kher mai, Mahriati chuan,"Naktukah chuan ka pa biak dan ka lo ngaihtuah dawn nia,"a lo ti ve bawk a.

"I pa chuan a ngaihsak ang che maw?,"Amuana chuan a lo ti vat a. Mahriati chuan,"Min be duh ang ka ring,"a lo ti zawi sap a.

Zingah chuan kan bungraw neih ang ang chu kan in pack a, bungrua kan ngah lo bawk a in pack tur kan ngah lo kher mai. Amuana chuan Taxi hman tur a lo zawng ve mek bawk a, kan in pack zawh chuan In luah man pe turin In neitu te chenna In lam pan chuan ka chho hnak hnak a. An In chhung luh chu ka in thlahrungin ka phûr teh chiam lo kher mai.

In neitu te chenna In ka thlen hma chuan min tawk zawnga U Hriatpuia rawn kal chu ka hmu leh hlawl mai. Let leh chi a ni si lo, ka lukawlh vek thup nana ka puan bah chuan ka hmai chu ka khuh nghal a. Mahse, U Hriatpuia chuan min hai mawlh si lo, kal pelh ngial ka tum a kal pelh thei zia zang a ni ta lo,"Lalramnunthar,"fiah takin ka hming pumin min ko fak mai. Ka hre lo der tlat a, ka kal lui zel a; mahse, thui pawh ka kal hma in ka banah chuan min rawn pawt a,"Lalramnunthar, ka biak che chu i hria em?,"a hma aia fiah chuan a rawn ti leh a. Ngawi rengin ka ding a, a hmel pawh ka en ngam tawh lo.

Ka lu khuhna chu a rawn pawt hlim a,"Khatiang ho bulah khan engvanga khawsa reng nge i nih a?,"a ti chang fak a. Engtinmah ka chhang lo,"Ka zawhna chu min chhang rawh,"âwka vin lek lek hian a ti leh a.

"Khawngaihin min kalsan rawh."

"Min zui haw ang che,"tih leh ka bana min kaih chu a rual nghal a.

"U Hriatpui, min kalsan mai rawh. Ka ṭhiante hi ka kalsan thei lo."

"I â tawh nih hi."

"Khawngaihin min kalsan mai rawh,"ka ti leh a, ka bana min chelhna chu ka phih thla a, kal mai ka tum a. Mahse, U Hriatpuia chuan awlsam taka min kal tir a tum hauh lo mai,"Tunah hian min zui dawn em? Ka chhungte hnenah pawh engkim ka hrilh vek tawh. Hetianga mi bawlhhlawh ber anga i awm hi ka phal tawh lo,"a ti a, ka hmaah chuan a rawn ding nghal vat a.

"Mi thianghlim ka ni bik hleinem, khawngaihin min rawn ngaihven tawh lo mai rawh,"ka ti a, kal ka tum a. Mahse, min la dang ṭalh a, chutia kan in nek buai lai chuan Amuana chuan,"Hey, nang kha ani kha i kut hmawr pawn khawih suh ang che,"tiin a rawn âu ṭhawt a. Kan awmna lam pan chuan a rawn tlan a, ka hmaah chuan a rawn ding nghal vat a. U Hriatpuia nen chuan an in hmachhawn ta ut mai a,"Ani hi rawn hnaih hlek suh ang che,"Amuana chuan ka banah min kai vat a. U Hriatpuia chu a nui suk a,"Ani thlavang hauh tur hian a eng nge i nih a?,"Amuana nen chuan an in hnaih chilh tawh khawp mai. Amuana chuan a hma aia nghetin min vuan a,"Ani hi ka vantirhkoh a nih hi. I kut hmawr pawh khan khawih suh ang che, mi thianghlim a nih hi,"a ti leh a.

"Te, heng ho bulah hian engvanga awm reng nge i nih a? Anni vanga hrehawm i tawrh zo zai te hi i hre lo em ni?,"a âwki chu a vin lek lek in ka hria.

"Anni hi ka ṭhian te an ni a, ka phatsan ngai lo ang. Anni pawn min phatsan ngai lo, khawngaihin min kalsan zawk mai rawh,"ka ti leh a.

"Umm a ṭha lawm; mahse, ka beidawn san dawn lo che tih hi theihnghilh ngai suh ang che,"a in her a, a kal nghal a.

"I ṭawngṭainaah min lo hre reng ṭhin dawn nia,"ka tih chuan, a ding det a, hawi erawh a rawn hawi let tawh lo.